11. फसह

परबु मूसा आउरी हारून के फिरोन लगे ए बोलबा काचे पटाउआय कि इस्रायली मनके जायके दो। हायमन हाके सांगू आत कि अगर हाय हायमनके जायके ना दे, तो परबु मिस्रर लोक मनर आउरी पोसु मनर सबु पहिलोठा के मरी देयशी फिरोन एटा सुनिकारी बले परबु र उपरे विसवास करबा काचे आउरी हातार बात मानबा काचे मना करी देउआय।

परबु हातार उपरे विसवास करबा लोक र काहरी बाले पहिलोठा बेटा का बचयबा काचे गोटक उपाय करुआय। सबु परिवार के गोटक निष्कलंक मेमना के दरी करि हाके मारबा टा रहुआय।

परबु इसरायली मनके हाय मेमनार लहू के निजर घरर कोपट ताने लगायबा काचे बोलुआय। हाय मनके हतार माउस के भुन्बा टा रहुआय आउरी हाय मनके आखमरी रोटी संगे हाके फुरती ले खयबाटा रहुआय। हाय हांयबीती भात के खायलार बाद हाय मनके तुरंत मिस्र छाड़बा काचे तिआर रेबा काचे बोलुआय।

जसन करबा काचे परबु इसरायली मनके आदेस दि रहुआय हाय मन हातार अनुसार सबु करुआत। मजी रातीने, परबु सबु पहिलोठा बेटा मनके मारी मारी करी मिस्र र मजिगता ले जीबा टा रेउआय।

इसरायली मनर सबु र घर र कोपाट ताने लहू लगी रहुआय, एकाचे परबु हाय घर मनके छाड़ी देउआय। हाय भीतरर सबु लोक मन सुरक्षित रहुआत। हाय मन मेमना र लहू र लागी करी बाची जाई रहुआत।

मानतर मिस्री मन परबु उपरे विश्वास ना करी रेउआत आउरी हातर आदेस के ना मनि रेउआत। एकाचे परबु तिकर घर मनके ना छाड़ला। परबु मिस्री मनर सबु पहिलोठा के मारी देउ आय।

जेल खाना भीतरर पहिलोठा मानले दरी करी, फिरौनर पहिलोठा तक, सबु पहिलोठा नर मोरी जाउआत। खुबे दुखर लागी करी मिस्रर खुबे लोक मन कांदते रेउआत आउरी विलाप करते रेउआत।

हाई राती फिरोन मूसा आउरी हारून के हागदेउआय आउरी बोलुआय, ‘’इसरायली मनके दरी करी एबेच मिस्र थानले निकली करी जाहा!’’मिस्रर लोक मन बले इसरायली मनके झोपके निकली करी जिब काचे निवेदन करुआत।