13. १३. इस्राएलतनापं परमेश्वरं बाचा चिनादीगु
इस्राएलित लाल समुद्र छिनाः वने धुंकाः परमेश्वरं इमित मरूभूमिपाखे जुयाः सिनै पर्वतय् यंकादिल। मोशां च्यानाच्वंगु झाःयात खंगु व हे पर्वत खः। मनूतय्सं पर्वतया क्वसं थथःगु पाल ग्वला।
परमेश्वरं मोशा व इस्राएलया मनूतय्त धयादिल, “छुं जुया छिमिसं जिगु आज्ञा मानय् यात व जिगु बाचायात मानय् यात धाःसा छिपिं जिगु सर्बय्, पूजाहारीया छगू राज्य व छगू पवित्र जाति जुइ।
स्वन्हु लिपा मनूतय्सं थःत आत्मिककथं तयार याये धुंकाः परमेश्वर नन्यागु सलं हावलासा, कुँ व तःधंगु सःनापं सिनै पर्वतया च्वकाय् क्वहांझायादी। व पर्वतय् मोशा जक थाहां वनेफु।
अले परमेश्वरं वयात व बाचा बियादिल अले धयादिल, जि “याहोवे खः, छिमि परमेश्वर, गुम्हय्सिनं छिमित मिश्रदेशय् दास जुया च्वंबलय् बचय् यानादिल। छिमिसं मेपिं सुं द्यःतय्त पुजा याये मते।”
“छुं नं कथंयागु मुर्तित दय्के मते वा उकियात छिमिसं पुजा याये मते छाय्धाःसा जि याहोवे, डाहा याइम्ह परमेश्वर खः। जिगु नां म्वाय्कं म्वाय्कं काये मते। विश्रामबारयात पवित्रगु धकाः मानय् यायेत ल्वमंके मते। छिमिसं खुन्हु (६) तक धाःसा न्ह्यागुं ज्या यायेफु अय्नं न्हय्नुया दिंखुन्हु धाःसा छिमिसं आराम कायेगु व जितः लुमंकेगु दिं खः।”
छिमिसं थः मां-बौयात हनाबना या। सुयातं स्याये मते। व्यभिचार याये मते। खुया काये मते। मखुगु खँ ल्हाये मते। थः जःलाखःलाया छेँय्, कलाः, च्यःभ्वातिं, द्वहं, गधा व छुं खँय् नं ल्वःवंके मते।”
अले परमेश्वरं थुपिं झिगू आज्ञात निपा ल्वहँपौलय् च्वयादिल अले उपिं मोशायात बियादिल। परमेश्वर मेमेगु नं यक्व व्यवस्था व नियमत मानय् यायेत बियादिल। छुं जुया इमिसं उपिं व्यवस्था मानय् यात धाःसा परमेश्वरं इमित आशिष बियादी अले इमित रक्षा यानादीगु बाचा यानादिल। छुं जुया इमि उपिं आज्ञात मानय् मयात धाःसा इमित परमेश्वरं दण्द बियादीगु खः।
परमेश्वरं इस्राएलितय्त थःम्हं इच्छा यानागु थें हे पाल दय्केत फुक्क् खँया नमुना नं बियादिल। उकियात नापलायेगु पाल धकाः धायेगु याइ अले थुकि निगू क्वथात दु थुकियात छगू तःधंगु पर्दां छुतय् यानातःगु दु। दक्वसिबय् तःधंम्ह पुजाहारी जक उकि दुने च्वंगु क्वथाय् दुहां वने दइगु खः, छाय्धाःसा परमेश्वर अन च्वनादीगु खः।
सुनानं परमेश्वरया आज्ञायात त्वाःथुल धाःसा वं छम्ह पशु नापलायेगु पालया न्ह्यःने दुगु वेदीइ हयाः परमेश्वरयात बलिकथं छायेगु यायेमा। छम्ह पुजाहारीं व पशुयात स्यायेगु याइ अले उकियात वेदीइ तया छ्वय्काबीगु खः। बलि छाःगु पशुया हिं व मनूया पाप क्षमा जुइगु खः अले परमेश्वरया न्ह्यःने व मनू शुद्ध ठहरय् जुइ। परमेश्वरं मोशया दाजु हारून व वया सन्तानयात पुजाहारी जुयेत ल्ययादिल।
फुक्क मनूतय्त परमेश्वरं बियादीगु आज्ञा छम्ह हे जक परमेश्वरयात आराधना यायेगु अले उपिं वय्कःया विशेष मनूत खः धकाः मानय् यायेत राजी जुल।
यक्व दिंलिपा, मोशा परमेश्वर नापं खँल्हाय्गु निंतिं सिनै पर्वतया च्वकाय् वन। मनूत व लिहां वइला धकाः पिवा च्वच्वं आय्बुल। अथे जुयाः इमिसं हारूनयाथाय् लुँत हल अले इमिगु निंतिं छगू मूर्ति दय्की धकाः धाल।
हारूनं द्वहं लसिवय्कः लुँया छगू मूर्ति दय्कल। मनूतय्सं व मुर्तियात पुजा यात अले उकि बलित नं छायेगु यात।
मोशा क्वय् क्वहांवलय् वं मूर्तियात खन, अले व तसकं तंम्वया परमेश्वरं बियादीगु झिगू आज्ञाया ल्वहँपौत वांछ्वया तछ्यानाबिल।
अले मोशां व मूर्तियात दाया चुं चुं यानाबिल, व चुंया छुं ब्व कया लखय् तल अले मनूतय्त व त्वंकेबिल। परमेश्वरं मनूतय्थाय् महामारी छ्वयाहयादिल अले उपिं मध्ये अप्वःथें मनूत सित।
मोशा हाकनं पर्वतय् च्वय् थाहां वन अले उपिं मनूतय्त परमेश्वरं क्षमा यानादिसँ धकाः प्रार्थाना यात। परमेश्वरं मोशाया बिन्ति न्यनादिल अले उपिं मनूतय्त क्षमा यानादिल। थःम्ह तछ्यानागु न्हापायागु ल्वहँ पौलय् दुगु झिगू आज्ञायात मोशां छगू न्हूगु पौलय् च्वया हाकनं थापं यात। अले परमेश्वरं इस्राएलीतय्त सिनै पर्वतपाखें बाचा यानादीगु देशय् यंकादिल।
बाइबलया बाखं : प्रस्थान १९-३४ पाखें
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।