28. २८. तःमिम्ह ल्याय्मम्ह शासक
छन्हु, छम्ह तःमिम्ह ल्याय्मम्ह शासक येशूयाथाय् वया थथे धकाः न्यन, “भिंम्ह गुरू, छु याःसा जितः अनन्त जीवन दइ?” येशूं वयात धयादिल, “छिं जितः छाय् भिंम्ह धकाः धयादियागु? भिंम्ह ला छम्ह हे जक दु, अले वय्कः परमेश्वर खः। अय्नं छिं अनन्त जीवन काय्गु खःसा परमेश्वरया आज्ञात मानय् यानादिसँ।”
व मनुखं न्यन, “उपिं मध्य छु छु उजंत मानय् यायेमा?” येशूं वयात धयादिल, “स्याये मते, व्यभिचार याये मते, खुइ मते, मखुगु साक्षी बी मते, थः मांबौयात हनाबना ति अले थः जःलाखःलायात थःत थें हे माया या।”
व ल्याय्मम्ह मनुखं थःत पाय्छिकथं क्यनेगु निंतिं धाल, “जिं थुपिं फुक्क उजंत मचाबलय् निसें मानय् याना वया च्वनागु दु। अले जि सदां म्वानाच्वनेगु निंतिं अझ मेगु छु याये मानि? येशूं व मनूतयात स्वयादिल अले वयात माया यानादिल।
येशूं लिसः बियादिल, “छ सिद्ध जुइगु इच्छा दःसा, हुँ अले छंके दुगु फुक्कं मियाः नयेमखंपन्त इना बयु, अले छन्त स्वर्गय् धन दइ। अनंलिपा छ जिगु ल्यू ल्यू वा।”
व ल्याय्मम्ह मनू तसकं तःमिम्ह जूगुलिं थ्व न्यनाः व तसकं दुःखमन ताय्कल छाय्धाःसा वं थम्हं अधिकार यानाच्वनागु थःके दुगु फुक्क चिजत वं अथे यायेगु इच्छा मदुगु खः। अले व तःमिम्ह मनू अनं लिहां वन।
अले येशूं वय्कःया थः चेलातय्त धयादिल, “धन सम्पत्ति यक्व दुपिन्त परमेश्वरया राज्यय् दुहां वनेत तसकं हे थाकू।
वय्कःया खँ न्यनाच्वंपिं चलातय्सं थ्व खँ न्यना अजूचाया थथे न्ह्यसः यात, “अय्सा सुनां जक मुक्ति काये फइ?”
येशूं उपिं चेलातय्त स्वया धयादिल, “मनूतय्गुपाखें ला थथे यायेगु सम्भव मदु अय्नं परमेश्वरया निंतिं धाःसा फुक्कं खँ सम्भव दु।
पत्रुसं येशूयात धाल, “जिमिसं फुक्क चिजत त्वःता छिगु ल्यू ल्यू वयच्वनागु दु। जिमित छु सिरपा दइ?”
येशूं लिसः बियादिल, “सुनां परमेश्वरया राज्यया निंतिं थःगु छेँ, कलाः, दाजुकिजा, तताकेहेँपिं, मांबौ, काय् म्ह्याय्, वा फुक्क सम्पत्ति त्वःता वइ इमित जिं उपिं फुक्क खँया सच्छिदुगं अप्वः तनाबी अले इमित अनन्त जीवन नं दइ। अय्नं न्हापा लाःपिं लिपा लाइ, अले लिपा लाःपिं न्हापा लाइ।”
थ्व बाइबलया बाखं थुपिं पदत पाखें काःगु खः, मत्ती १९:१६-३०; मर्कूस १०:१७-३१; लूका १८:१८-३०
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।