27. २७. भिंम्ह सामरीया उखान
छन्हु, व्यवस्थाया खँ तसकं सस्यूम्ह छम्ह यहूदी येशूयात जाँचय् यायेत वल, अले वं धाल, “गुरूजु, अनन्त जीवन कायेत जिं छु छु यायेमा?” येशूं लिसः बियादिल, “परमेश्वरया व्यवस्थाय् छु च्वयातःगु दु?”
अले व सस्यूम्ह मनुखं परमेश्वरया व्यवस्थाय् थथे च्वयातःगु दु धकाः लिसः बिल, “छं छिमि परमेश्वरयात थःगु फुक्क नुगलं, थःगु फुक्क प्राणं, थःगु फुक्क शक्तिं माया या अले थः जलाःखलाःतय्त थःत थें हे माया या।” येशूं धयादिल, “छिं पाय्छिगु खँ धयादिल, छिं थथे यानादिल धाःसा छितः अनन्त जीवन दइ।”
अय्नं व व्यवस्था तसकं सःम्ह मनू थःधर्मीम्ह खः धयागु क्यनेगु इच्छा याःगु खः, अथे जुया वं थथे धकाः न्यन, “अय्सा जिमि जलाःखला सु खः?”
येशूं व मनूयात छगू उखान धया लिसः बियादिल, “छम्ह यहूदी मनू येरूशलेमं यरिहोपाखे वना च्वन।”
“लँय् वनाच्वंबलय् वयात दाखुँतय्गु छगू पुचलं नापलात। अले इमिसं वयाके च्वंगु फुक्क लाका कया वायत नांगा यानाः बाम्ह सिक दायाः इमिसं वयात अन हे त्वःता वन।”
“वयां छुं ईलिपा, छम्ह यहूदी पुजाहारी नं व हे लँ जुया वनाच्वंगु खः। अले व पुजाहारीं व मनूयात घाः जुया लँय् ग्वःतुला च्वंगु खनाः नं मखंछु यानाः व थःगु लँय् वन। व पुजाहारीं व घाः जूम्ह मनूयात वास्ता हे मयात।
“थथे जूगु छुं ईलिपा हे, छम्ह लेवी नं व हे लँ जुया वल। (लेवीत यहूदीतय् छगू कुल खः अले इमिसं देगःया पुजाहारीतय्त ग्वाहालि याइगु खः)। व लेवी नं लंया मेखेपाखे हे जुया वन अले व लेवीं नं व घाः जूम्ह मनूयात वास्ता हे मयात।”
“व हे लँ जुया छम्ह सामरी मनू नं वल। (सामरीतय्त यहूदीतय्सं हेला याइगु खः।) व सामरीं व घाः जूम्ह यहूदी मनूयात खनाः तसकं माया वन अले वयाथाय् लिक्क वनाः घाः सिलाः वासः तयाः कापतं चिनाबिल।
“अनंलि व सामरीं व मनूयात थःगु गधा म्हय् तयाः अन लिक्क च्वंगु छगू धर्मशालय् यंकाः वयागु सुसाःकुसा यात।”
कन्हय् खुन्हु, व सामरी थःगु लंपुइ वने माःगु खः। अथे जुयाः वं धर्मशालाया थुवाःयात छुं ध्यबा बिया धाल, ‘वयात सुसाःकुसा याना तयादिसँ। थ्व स्वयां अप्व ध्यबा खर्च जुल धाःसा लिहां वयाः जिं छितः मगाःगु धिबा पुला बी।’”
अनंलि येशूं व व्यवस्था सः स्यूम्ह मनूयाके न्यन, “छिसं छु बिचाः यानादीया? छिं स्वयेबलय् थुपिं स्वम्ह मध्ये गुम्ह मनू दाखुँतय्सं दाया थकूम्ह मनूया जःलाखःला जुल?” अले वं लिसः बिल, “वयात माया याःम्ह मनू हे वया जःलाखःला थें जुल।” येशूं वयात धयादिल, “छिं नं वं थें तुं याः झासँ।”
थ्व बाखं बाइबलया थुपिं पदत पाखें काःगु खः, लूका १०:२५-३७
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।