26. २६. येशूं थःगु सेवकाइ शुरू यानादीगु
शैतानया परीक्षाय् विजयी जुइ धुंकाः, येशू पवित्र आत्माया शक्तिं जाया गलीलया प्रान्तय् लिहांझायादिल, गन वय्कः न्हापा च्वनादीगु खः। येशूं स्यनेकने यायां वय्कः छथासं मेगू थाय् झायादिल। अले सकसिनं वय्कः तसकं भिंम्ह खः धकाः धाल।
येशू नासरतया गामय् झायादिल, वय्कः मचाबलय् अन हे ब्वलंगु खः। शबाथया दिंनय् वय्कः आराधना यायेगु थासयह झायादिल। मनूतय्सं वय्कःयात ब्वनेत यशैयाया सफू बिल। येशूं व सफू पुइकादिल अले उकिं छगू ब्वः ब्वनाः मनूतय्त न्यंकादिल।
येशूं थुकथं ब्वनादिल, “मगाःमचाःपिन्त भिंगु खँ न्यंकेत परमप्रभुं जितः ल्ययादीगुलिं परमप्रभुयागु आत्मा जिके च्वनादीगु दु। परमप्रभुं चिना तःपिन्त त्वःता बीत, कांपिन्त मिखां खंका बीत, अले न्हुत्तु न्हुया तःपिन्त थना बीत, अले परमप्रभुं दया माया यानादीगु थुबलय् हे खः धकाः नं न्यंका जुइत जितः छ्वया हयादीगु खः।”
अले येशू बँय् फय्तुनादिल। फुक्कसिनं वय्कःयात स्वयाच्वन। वय्कलं नकतिनि ब्वनादीगु ब्व मसीहया बारे खः धयागु खँ अन च्वनाच्वंपिं मनूतय्सं स्यू। येशूं धयादिल, “जिं ब्वनागु खँ छिकपिन्सं ता हे ताः। जिं गथे ब्वनागु खः अथे हे थौं पूवनेधुंकल।” वय्कःयागु खँ न्यनाः इपिं अजू चाल। अले इमिसं थथे धाल – “थ्व मनू योसेफया काय् मखु ला?”
अले येशूं धयादिल, “जिं छिमित धात्थें धाये, थःगु हे देशय् च्वंम्ह अगमवक्तायात सुनानं मानय् याइ मखु।” एलियाया ईलय्, इस्राएलय् थीथीकथंयापिं भाःत सीधुंकूपिं मिसात दु। अय्नं उबलय् अन स्वदँ व खुलातक वा मवल, परमेश्वरं एलियायात इस्राएलयाम्ह छम्ह भाःत सीधुंकूम्ह मिसायात ग्वाहालि यायेत जक छ्वयादीगु मखु बरू देशय् च्वंपिं फुक्क भाःत सीधुंकूपिं मिसातय्त ग्वाहालि यायेगु निंतिं छ्वयादीगु खः।
येशूं धयादिल, “अले एलिया अगमवक्ताया ईलय् छेंगूया ल्वय् दुपिं यक्व हे मनूत इस्राएलय् दुगु खः। अय्नं एलिशां इपिं सुयातनं लाय्का मब्यु। वं इस्राएलया नामानया छेंगूया ल्वय् जक लाय्काबिल।” येशूयागु खँ न्यनाच्वंपिं यहूदी मनूत खः। अले इमिसं वय्कलं थथे धयादीगु खँ न्यंबलय् इपिं वय्कः खनाः तसकं तंम्वल।
अथे जुयाः नासरतया मनूतय्सं येशूयात आराधना यायेगु थासं लुया डाँडाया लिक्क साला पिनेहल अले वय्कःयात अनं क्वफाना स्यायेत सन। अय्नं येशू भीडया दथुं पिहां वया नासरतथाय् त्वःतावन।
अनंलिं येशू गालीलया प्रान्तय् झायादिल, अले ग्वाःग्वा मनूत वय्कःयाथाय् वल। इमिसं यक्व ल्वचंकाःपिं मनूत वय्कःयाथाय् हल, उपिं मध्य खुत्यांपिं, मिखां मखंपिं व पाकःत खः। अले येशूं इपि फुक्क मनूतय्त लाय्कादिल।
यक्व भूत दुब्युपिं मनूत येशूयाथाय् हल। अले येशू उपिं भूत आत्मातय् उपिं मनूतय्गु म्हं पिहांवनेत उजं बियादिल अले उपिं भूतआत्मा मनूतय्गु म्हं पिहांवन। अप्वः थें भूत दुब्युपिं मनूतय्सं वय्कःयात तसलं हाला थथे धाल, “छि परमेश्वरया काय् खः।” अले मनूतय्सं थ्व अजूचायापुगु ज्यात खनाः इमिसं परमेश्वरया प्रशंसा यात।
अनंलिपा येशूं झिंनिम्ह मनूत ल्यादिल उपिं मनूतय्त हे वय्कःया चेलात धकाः धाइ। इपिं चेलात येशू नापनापं जुया वय्कःपाखें सय्का काइगु खः।
थ्व बाखं बाइबलया थुपिं पदत पाखें काःगु खः - मत्ती ४:१२-२५; मर्कूस १:१४-१५, ३५-३९; ३:१३-२१; लूका ४:१४-३०, ३८-४४
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।