25. २५. शैतानं येशूयात जाँचय् याःगु
येशूं बप्तिस्मा कयादी धुंकाः पवित्र आत्मा वय्कःयात मरुभूमिइ ब्वनायंकल। अले अन पीम्हु पीचा तक उपवास च्वनादिल। अथे जुयाः शैतान वय्कःयाथाय् वल अले वय्कःयात पापलय् लाकेगु निंतिं जाँचय् यात।
शैतानं थथे धया वय्कःयात जाँचय् यात, “छि परमेश्वरया काय् खःसा थ्व ल्वहंयात मरि जुइमा धकाः धयादिसँ अले छिसं व नयेफु।
येशूं लिसः बियादिल, “ च्वयातःगु दु, मनूत मरिं जक मखु, परमेश्वरया म्हुतुं पिहां वःगु छगू छगू वचनं म्वाइ।
अनंलि शैतानं येशूयात देगलय् च्वकाय् यंका थथे धाल, “छि परमेश्वरया काय् खःसा थनं तिंन्हुयादिसँ, छाय्धाःसा थथे च्वयातःगु दु, ‘छ न्ह्याथाय् वंसां रक्षा यायेत परमेश्वरं थः दूततय्त आज्ञा बियादी अले ल्वहँतं छंगू तुतियात घाःपाः मजुइमा धकाः इमिसं थःगु ल्हाःतं छन्त ल्ह्वना तइ।”
अय्नं येशूं शैतानयात वचनतपाखें हे लिसः बियादिल। येशूं धयादिल, “परमेश्वरया वचनय् वय्कलं थः मनूतय्त थथे उजं बियादीगु दु, ‘छं परमप्रभु थः परमेश्वरयागु मन स्वये मते।’”
अनंलि शैतानं येशूयात हलिंमया फुक्क राज्यत व अनयागु फुक्क महिमात क्यना धाल, “छिं जितः भागि यानादीसा जिं छितः थ्व फुक्कं बी।”
येशूं लिसः बियादिल, “अय् शैतान, जिग न्ह्यःने च्वने मते हुँ। ‘छं परमप्रभु परमेश्वरयागु जक सेवा यायेमाः। अले वय्कःयात जक मानय् यायेमाः।’”
येशूं थःत शैतानं जाँचय् याके बियादिल, अले लिपतय् शैतानं वय्कःयात त्वःता वन। अले स्वर्गदूत वयाः वय्कःयागु सेवा यात।
थ्व बाखं बाइबलया थुपिं पदतपाखें काःगु खः, मत्ती ४:१-११; मर्कूस १:१२-१३; लूका ४:१-१३ बाट
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।