30. ३०. येशूं न्यद्वः मनूतय्त नकादीगु
मनूतय्त भिंगु खँ न्यंकः वनेत व इमित स्यनेकने यायेत येशूं थः चेलातय्त थीथी थासय् छ्वयादिल। अले इपिं येशूयाथाय् लिहां वयाः थःपिन्सं यानागु ज्या फुक्क वय्कःयात धयाबिल। अनंलिपा येशूं इमित थनापं समुद्रया उखेपाखेया सिथय् सुनसान थासय् वनाः छुं ई आराम कायेत धयादिल। अथे जुयाः इपिं छगः नाचय् च्वना समुद्रया उखेपाखे वन।
अन ग्वाः ग्वाः मनूत दुगु खः अले इमिसं येशू व वय्कःया चेलात नाचय् च्वनाः मेथाय् हे वंगु खंगु खः। थुपिं मनूत नं वय्कःपिं स्वयाः न्हापा हे समुद्रया उखेपाखे थ्यंकः वनेगु बिचाः याना इपिं समुद्रया सिथ सिथ जुयाः ब्वाँय् वन। थुकथं येशू व वय्कःया चेलात व थासय् थ्यंकः वल, ग्वाः ग्वाः मनूत न्हापा हे अन वय्कःपिन्त पिया च्वनाच्वंगु खः।
अन मिसात व मस्ता ल्याः मखासे लगभग ५,००० ति मिजं मनूत दुगु खः। येशूं इमित दया यानादिल। येशूया निंतिं इपिं मनूत जवाः मदुपिं फैत थें खः। अथे जुयाः वय्कलं इमित स्यनेकने यानादिल अले ल्वचं काःपिं मनूतय्गु ल्वय् नं लाय्कादिल।
सन्ध्याका ईलय् चेलातय्सं येशूयात धाल, “खिउँया वये धुंकल, थन छुं हे मदु। थन लिक्क छुं गांत नं मदु। थुपिं मनूतय्त थनं मेथाय् हे छ्वयादिसँ अले नयेगु निंतिं अन इमित छुं दयेमा।”
अय्नं येशूं चेलातय्त थथे धयादिल, “छिमिसं हे इमित नकेगु निंतिं मिलय् याना ब्यु।” इमिसं धाल, “जिमिसं गुकथं इमित नकेफइ? जिमिके ला न्यापा मरि व निम्ह न्या जक दु।”
येशूं इमित थथे धयादिल, “अन दुपिं फुक्क मनूतय्त नेय्म्ह नेय्म्ह (५०) यानाः इमित झ्वःलाक फ्यतुकी।”
अले येशूं उपिं न्यापा मरि व निम्ह न्या कयाः स्वर्थय् थस्वया, उपिं नसा निंतिं परमेश्वरयात सुभाय् बियादिल।
अनंलिपा येशूं मरि व न्यायात कुचा कुचा थलादिल। वय्कलं उपिं कुचात मनूतय्त इना ब्यु धकाः चेलातय्त बियादिल। चेलातय्सं उपिं मरि व न्या इनाबिल अले उपिं गुबलें सिमधल। अले फुक्क मनूतय्सं यतले लुधंक नल।
अनंलिपा चेलात ल्यंगु दुगु मरि व न्या मुंकल, उपिं इनाः ल्यंदुगु कुचाकाचा जक हे झिंनिगः दाला दु।
थ्व बाइबलया उखान थुपिं पदत पाखें काःगु खः, मत्ती १४:१३-२१; मर्कूस ६:३१-४४; लूका ९:१०-१७; यूहन्ना ६:५-१५ बाट
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।