50. ५०. येशू हाकनं झायादी
लगभग निद्वः (२,०००) दँनिसें संसारय् यक्व हे अप्व मनूतय्सं येशू मसिहया बारे भिंगु खँ न्यना वयाच्वंगु दु। मण्डलीया तसकं बढय् जुया च्वंगु दु। येशू संसारया अन्तया ईलय् झायादी धकाः बाचा यानादीगु दु। वय्कः थौंतक झायादीगु मदु अय्नं वय्कलं थम्हं यानादीगु बाचा पूवंकादी।
झीसं येशू झायादीतिनि धकाः पियाच्वनेबलय् झीगु थःगु जीवन पवित्र आत्मा लँ क्यनादीगु थें थ्व संसारय् जीवन हनाः च्वनेमा धकाः परमेश्वरं इच्छा यानादी। वपाखें परमेश्वरयात तसकं हनाःबनाः यायेफइ। झीसं वय्कःया राज्यया बारे मेपिन्त नं न्यंकाब्यूगु वय्कलं इच्छा यानादी। येशू प्रभु थ्व संसारय् दीबलय् वय्कलं धयादिल, “जिमि चेलातय्सं परमेश्वरया राज्यया बारे फुक्क संसारय् च्वंपिं मनूतय्त भिंखँ न्यके धुंकाः जक थ्व संसारया अन्त्यया दिं वइ।”
थौंतक नं यक्व जातिया मनूतय्सं येशूया बारे न्यंगु मदुनि। येशूं थः स्वर्गय् झायादी न्ह्यः वय्कःया बारे गुबलें मन्यंनि पिन्तथाय् वनाः भिंगु खँ घोषणा या धकाः सकलें विश्वासीतय्त वय्कलं धयादिल। वयकलं थथे धयादिल, “अय्जूगुलिं छिपिं वनाः फुक्क जातियापिं मनूतय्त चेला दय्कि।” अले बुँइ बालि पाकय् जुया च्वंगु दु।
येशूं थथे नं धयादिल, “सुं च्यः थः मालिक स्वया तःधं जुइ मखु। थ्व संसारया हाकिमतय्सं जितः घृणा यात अले इमिसं जिगु कारणं छिमित दुःख बी अले स्यायेत तकं स्वइ। थ्व संसारय् दुःख सीमासां नं लय्ताया च्वं छाय्धाःसा जिं थ्व संसारय् शासन याइम्ह शैतानयात बुकागु दु। छिपिं लिपतय्तक हे विश्वासी जुया च्वन धाःसा परमेश्वरं छिमिगु उद्धार यानादी।”
येशूं वय्कःया चेलातय्त संसारया अन्त जुइबलय् छु जुइ धकाः थुइकेत छगू उखान धयादिल। वय्कलं धयादिल, “छम्ह मनू पुसा ह्वलेत थःगु बुँइ वन। व द्यनाच्वंबलय् वया शत्रुत वया छ्वबय् नामाया पुसा ह्वलाबिल अले व अनं वन।”
छ्वमा तःमा जुया वल, व मनूया च्यःतय्सं धाल, ‘मालिक, छिसं बुँइ बांलाःगु पुसा ह्वलादियागु मखुला। अय्नं अन नामात गनं वल? मालिकं लिसः बिल, “सुं शत्रु व प्यूगु जुइमा।”
उपिं च्यःतय्सं थः मालिकयाके न्यन, ‘छु जिमिसं उपिं नामात पुया छ्वय् ला?’ मालिकं धाल, ‘मखु, छिमिसं अथे याये मते, छिमिसं नामा नापं छ्वमा नं पुया छ्वइ। बालि लय्गु ईतक लं च्वं अले अनंलि नामा जक मुंका छ्वय्केत कलि चिना छथाय् ती, अय्नं छ्व धाःसा भकारी तये हजि।”
चेलातय्सं थ्व उखानया अर्थ छु खः धकाः मथुल, अथे जुयाः इमिसं येशूयात थुइका ब्यु धकाः इनाप यात। येशूं धयादिल, “भिंगु पुसा ह्वलिम्ह मनूखं मसिहया बारे धाइ। बुँ संसारयात क्यनाबी। भिंगु पुसां परमेश्वरया राज्यया मनूतय्गु बारे धाइ।”
नामात उपिं मभिंपिं मनूतय्गु बारे धाइ। नामा ह्वलिपिं शत्रुत मभिंगु ज्या याइपिनिगु बारे धाइ। बालि लयेगु ईलं अन्तया दिंया बारे धाइ। अले बालि लइपिं परमेश्वरया स्वर्गदूततय्गु बारे धाइ।”
“गुबलय् संसारया अन्त जुइ स्वर्गदूततय्सं मभिंपिं मनूत जक छथाय् मुंकी अले इमित ह्वाना ह्वाना च्यानाच्वंगु मिइ वांछ्वया बी। अन इपिं तसकं ख्वयेगु याइ अले तसकं कष्ट जुया वा न्ह्यइ। अले धर्मिपिं धाःसा इमि बाः परमेश्वरया राज्यय् सुर्य थें थीना च्वनि।”
येशूं थ्व नं धयादिल, संसारया अन्त जुइ न्ह्यः वय्कः थ्व पृथ्वी लिहां झायादी। वय्कलं गुकथं त्वःता झायादीगु खः अथे हे हाकनं लिहां झायादी, उबलय् वय्कः भौतिक शरिरय् आकासय् सुपाचय् च्वना झायादी। येशू हाकनं झायादीबलय् न्हापलाक विश्वासी जुया सिना वंपिं ख्रीष्टियनतय्त म्वाकादी अले इपिं वय्कःयात नापलायेत आकाशय् वनि।
अनंलिपा म्वानाच्वंपिं विश्वासी ख्रीष्टियन नं च्वय् आकाशय् ल्ह्वना थतयंकी अले सीधुंकूपिं हाकनं म्वाकादीपिं ख्रीष्टियनतनापं मिलय्जुइ। उपिं फुक्कं येशूनापं हे च्वनि। अनंलि येशू वय्कः थः मनूत नापं सदांया निंतिं शान्ति व छप्पं जुया च्वनादी।
येशूं वय्कःयात विश्वास याःपिं सकसितं जीवनया मुकुट बियादीगु बाचा यानादीगु दु। इपिं परमेश्वरनापं हे शान्तिइ च्वनि अले राज्य नं याइ।
अय्नं येशूयात विश्वास मयापिं फुक्कसिगु न्याय जुइतिनि। वय्कलं इमित नरकय् वांछ्वयादी, अन सदां वान्ह्यया ख्वयाच्वनेमालि। गुबलें मसिगु मिइ इपिं न्ह्याबलें च्यानाच्वनेमालि, अले कीतय्सं नं इमित नयेग त्वःति मखु।
गुबलय् येशू हाकनं लिहांझायादी वय्कलं शैतान व वया राज्ययात बुकादी। वय्कलं शैतानयात नरकय् वांछ्वयादी अन सदां मि च्यानाच्वनिगु खः अले परमेश्वरया आज्ञा मानय् यायेगु पलेस मभिंपिनिगु ल्यू ल्यू जूपिं नं इपिंनापं हे च्वनेमालि।
आदम व हव्वां परमेश्वरया आज्ञा मानय् मयागुलिं थ्व संसारय् पाप दुहां वल अथे जुयाः परमेश्वरं संसारयात सरा बियादिल अले थुकियात नाश यायेगु क्वछिनादिल। अय्नं छन्हु परमेश्वर न्हूगु स्वर्ग व न्हूगु पृथ्वी सृष्टि यानादी गुगु तसकं हे सिद्धगु जुइ।
येशू व वय्कःया मनूत न्हूगु पृथ्वी च्वनि अले वय्कलं सदांया निंतिं अस्तित्वय् दुगु फुक्क चिजय् राज्य यानादी। वय्कलं फुक्कसिगु मिखां ख्वबि हुयादी अले हाकनं गुबलें दुःख, कष्ट, ख्वयेगु, मभिंगु, तसकं थाकूगु दुःख, वा सीगु दइगु मखु। येशूं शान्ति व न्यायनापं थःगु राज्यय् शासन यानादी अले वय्कलं सदांयान निंतिं थः मनूतय्त थःनापं हे च्वने बियादी।
थ्व घटनात बाइबल थुपिं सफू व अध्यायपाखें काःगु खः - मत्ती २४:१४, २८:१८, यूहन्ना १५:२०, १६:३३, प्रकाश २:१०, मत्ती १३:२४-३०, ३६-४२, १ थेसलोनिकी ४:१३-५:११, याकूब १:१२, मत्ती २२:१३, प्रकाश २०:१०, २१:१-२२:२१
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।