49. ४९. परमेश्वरया न्हूगु बाचा
छम्ह स्वर्गदूतं मरिमय नांयाम्ह छम्ह कन्याम्ह मिसायात धाल, छं परमेश्वरया काय्यात बुइकी। अथे जुयाः व कन्याम्ह जूसां नं वं छम्ह काय् बुइकल अले वं वयागु नां येशू तल। थुकथं येशू परमेश्वर व मनू नितां जुयादिल।
येशूं यक्व हे अजुचायापुगु ज्यात यानादिल, थुकिं वय्कः धात्थें हे परमेश्वर खः धइगु दसि बियादिल। वय्कः लखय् न्यासि झायादिल, ग्वःफय्यात दीकादिल, ल्वचंकाःपिं यक्व हे मनूतय्त लाय्कादिल, भूतआत्मायात पितिना छ्वयादिल अले न्यापा मरि व निम्ह न्यापाखें न्याद्व (५,०००) स्वया अप्वः मनूतय्त प्वाजाय्क नकादीया थःगु दसि बियादिल।
येशू तःधंम्ह स्यनामि खः अले वय्कलं अधिकार दुम्हं थें नवानादिल छाय्धाःसा वय्कः परमेश्वरया काय खः। वय्कलं थःगु प्राणयात थें मेपिन्त नं माया यायेमा धकाः स्यनेकने यानादिल।
वय्कलं झीसं परमेश्वरयात फुक्क चिजत स्वया माया यायेमा धकाः स्यनेकने यानादिल, थुकिया मतलब थःगु धन सम्पत्ति स्वया नं अप्वः वय्कः माया यायेमा धयादीगु खः।
येशूं धयादिल, परमेशवरया राज्य थ्व संसारय् च्वंगु फुक्क चिजत स्वया तसकं मूवंगु खः। गुलिसित दक्वसिबय् अप्व महत्व दुगु खँ धयागु हे परमेश्वरया राज्यय् अधिकार यायेगु खः। परमेश्वरया राज्य् दुहांवनेत छि थःगु पापपाखें उद्धार जुया जक वने फइ।
मनूतय्सं वय्कःयात विश्वास याइ अले इपिं बचय् जुइ धकाः येशूं स्यनेकने यानादिल अय्नं मेपिनिगु धाःसा उद्धार जुइमखु। वय्कलं धयादिल, मनूत भिंगु भूमि थें खः। इमिसं येशूया भिंगु न्यनि अले इपिं बचय् जुइ। प्रभु येशूयात विश्वास मयापिं मनूत धाःसा लँय् बुयावःगु पुसा थें खः, अन यक्व हाः काय्मफया व याकनं सिनावनि अले उकिं छुं फल सय्के फइ मखु। उपिं मनूतय्सं येशूया भिंगु खँ न्यनि अले इमिसं विश्वास याइ मखु। अथे जुयाः इपिं वय्कः राज्य् दुहां वनेफइ मखु।
परमेश्वरं पापीतय्सं यक्व हे माया यानादी धकाः येशूं स्यनेकने यानादिल। वय्कलं फुक्कसित क्षमा बीगु इच्छा यानादीगु खः अले इमित थः सन्तान यायेगु इच्छा यानादीगु खः।
परमेश्वरं पापयात घृणा यानादी धकाः नं येशूं धयादिल। गुबलय् आदम व हव्वां पाप यात व इमि फुक्क सन्तातय्के सरय् जुल। उकिं याना थ्व संसारय् फुक्क मनूत पापी जुल अले मनूत परमेश्वरपाखें अलग जुल। थुकथं फुक्क मनूत परमेश्वरपाखें तापक्क च्वनाच्वनेमाल।
अय्नं परमेश्वरं संसारया फुक्क मनूतय्त तसकं माया यानादिल छाय्धाःसा वय्कलं थः याकः काय्यात बियादिल छाय्धाःसा येशूयात विश्वास यापिं सुंनानं पापया सजाँय् फयेम्वालेमा अय्नं इपिं परमेश्वरनापं सदां सदां बचय् जुयाच्वनेमा।
छिगु पापया कारण छि दोषी व सीमाम्ह खः। परमेश्वर छि खनाः तंम्वयेमाःगु खः अय्नं वय्कलं थःगु तंया पलेसा येशूयात थ्व संसारय् छ्वयाहयादिल। येशू क्रूसय् सिनादिल, वय्कलं छिगु व जिगु निंतिं सजाँय् फयादिल।
येशूं गुबलें पाप यानामदी अय्नं वय्कलं सजाँय फयादिल अले छिगु व संसारया फुक्क मनूतय्गु पाप ल्ह्वना यंकादीत वय्कः सिद्धम्ह बलि कथं सीगु इच्छा यानादिल। येशूं थःत अर्पण यानादीगुलिं परमेश्वरं सकसिगु पाप क्षमा यानादी फु।
भिंगु व बांलाःगु ज्यां छित बचय् यायेफइ मखु। परमेश्वर नापं स्वापु तयेगु निंतिं छिके छुं नं चिजत मदु। येशूं जक छिगु पाप क्षमा यानादी। छिसं येशू परमेश्वरया काय् खः धकाः विश्वास यायेमा छाय्धाःसा छिगु निंतिं येशू क्रूसय् सिनादिल अले वय्कः हाकनं म्वाना झायादिल।
येशूयात विश्वास याइपिं व वय्कः थःत मुक्तिबियादीम्ह खः धकाः नालाकाइपिं सकसित परमेश्वरं बचय् यानादी। अय्नं वय्कःयात विश्वास मयाइपिं सुयातं नं वय्कलं बचय् यानादी मखु। छि धनि वा गरिब, मिजं वा मिसा, बुह्रा वा ल्याय्मम्हपिं, अथवा छि गन च्वनादी उकिं छुं पाइ मखु। परमेश्वरं छित माया यानादी अले छिसं येशूयात विश्वास याःगु इच्छा यानाच्वनागु दु छाय्धाःसा छिसं वय्कः नापं क्वातुगु स्वापु तय्फयेमा।
येशूं छितः वय्कःयात विश्वास यायेत व बप्तिस्मा कायेत निम्ता बियादीगु दु। छु छिसं येशू हे मसिह परमेश्वरया याक काय् खः धकाः विश्वास यानागु दु ला? छु छिसं थः पापीम्ह खः अले परमेश्वरया दण्ड फयेमाःम्ह खः धकाः विश्वास यानागु दु ला? छु छिं थःगु पाप क्षमा यानादीत येशू क्रूसय् सिनादीगु खः धकाः विश्वास यानागु दु ला?
येशूं छिगु निंतिं छु छु यानादिल धकाः विश्वास यात धाःसा छि छम्ह ख्रीष्टियन जुल। आः छिगु जीवनय् शैतानया खिउँगु राज्यं सासन यायेफइ मखु। परमेश्वरया जलं छिगु जीवनय् राज्य यानादी। परमेश्वरं छितः गुबलें हे पाप मयाइ यानादी। वय्कलं छितः न्हूगु पाय्छिगु लँपु बियादी अले छि पयाछिगु जिवन हनादी।
छि ख्रिष्टियन खः धयागु जूसा येशूं यानादीगु ज्यातपाखें परेश्वरं छिगु पाप क्षमाया यानादीगु दु। आः परमेश्वरं छितः शत्रु कथं मखु बरू वय्कःनापं लिक्क स्वापु दुम्ह यानादी।
छि छम्ह परमेश्वरया पास खः धयागु जूसा अले येशूया दास खःसा छिं येशूं स्यनेकने यानादीगु खँयात मानय् याये यय्काच्वंगु दु। छि छम्ह ख्रीष्टियन जूसांनं छित पाप याकेगु परिक्षा वयेफु। अय्नं परमेश्वर विश्वास यायेबहःम्ह खः अले वचनय् च्वयातःगु दु, छिसं थःगु पाप प्रयाश्चित यात धाःसा वय्कलं छिगु पाप क्षमा यानादी। अले पापया विरूद्ध सामना यायेगु निंतिं वय्कलं छितः शक्ति बियादी।
परमेश्वरं छितः प्रार्थना यायेत, वय्कःया वचन ब्वनेत, अले मेपिं ख्रीष्टियनत नापं मिलय् जुया वय्कःया आराधना यायेत, वय्कलं छिगु जीवनय् छु छु यानादिल उपिं फुक्क मेपिन्त कनाब्यु धकाः धयादीगु दु।
थ्व घटनात बाइबलया थुपिं अध्यात पाखें काःगु खः - रोमी ३:२१-२६, ५:१-११; यूहन्ना ३:१६; मर्कूस १६:१६; कलस्सी १:१३-१४; २ कोरन्थी ५:१७-२१; १ यूहन्ना १:५-१० बाट
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।