48. ४८. येशू बाचा यानातःम्ह मसिह खः
परमेश्वरं संसारया सृष्टि यानादीबलय् फुक्क खँ सिद्ध जूगु खः। अन छुं नं पाप धयागु मदु। आदम व हव्वा थःथवय् माया याइपिं खः अले इमिसं परमेश्वरयात नं तसकं माया याइपिं खः। अन छुं नं ल्वय्त व मृत्यु मदु। अथे जुयाः अन परमेश्वरया इच्छा कथंया संसार दुगु खः।
क्यबलय् झंगः लायेत शैतान ताहाःपाखें नवात। अले हव्वा व आदमं परमेश्वरया विरूद्धय् पाप यात। इमिसं पाप यागुलिं मृत्यु, ल्वय् व दुःख संसारया फुक्क मनूतयगु जीवनय् वल।
आदम व हव्वां पाप यागुलिं छुं खँत ला अझ तसकं मभिंना वन। इपिं परमेश्वरया शत्रु जुल। थुकिया लिच्वः, लिपा फुक्क मनूत बुसांनिसें हे पाव स्वभावय् बुल अले इपिं परमेश्वरया शत्रु जुल। परमेश्वर व मनूतय्गु दथुइया स्वापु पापं याना छुटय् जुल। अय्नं व स्वापुयात हाकनं थापं यायेगु निंतिं परमेश्वरं छगू ग्वसाः ग्वयादिल।
हव्वाया छम्ह सन्तानं शैतानया छ्यं तछ्याइतिनि अले वं वयागु ग्वालिइ न्याइ धकाः परमेश्वरं बाचा यानादीगु खः। थुकिया अर्थ शैतानं मसिहयात स्याकेबी अय्नं परमेश्वरं वय्कःयात हाकनं म्वाकादी धयागु खः अले मसिहं शैतानया शक्तियात सदां हे नाश यानादी। यक्व दँ लिपा येशू हे मसिह खः धकाः थ्व संसारय् क्यनादिल।
परमेश्वरं फुक्क पृथ्वी जलप्रलय्पाखें नाश यानादी धुंकाः वय्कःयात विश्वास यापिनिगु निंतिं वय्कलं जहाच बियादिल। उकथं हे फुक्क मनूतय्गु पापं याना नाश जुया च्वंगु दु अय्नं परमेश्वरं वय्कःयाके विश्वास यापिं फुक्कसित उद्धार यायेगु निंतिं येशू ख्रीष्टयात बियादिल। सुनां सुनां वय्कःयात विश्वास याइ इपिं नाश जुइमखु अले इमित अनन्त जीवन दइ।
यक्व दँ न्ह्यः, पुजाहारितय्सं मनूतय्सं याःगु पापया निंतिं इमिगु दण्डया पलेसा परमेश्वरयात धुवांधु बलित छाया हे च्वन। अय्नं उपिं बलितपाखें इमिगु पापयात मदय्का छ्वय मफुत। येशू दकलय् तःधंम्ह पुजाहारी खः। मेपिं पुजाहारीतय्गु न्ह्यःने वय्कलं थःत बलि कथं लःल्हानादिल गुकिं याना संसारय् च्वंपिं फुक्क मनूतय्सं फयेमा दण्ड वय्कलं फयादिल।
परमेश्वरं अब्राहामयात धयादिल, “पृथ्वी च्वंपिं फुक्क मनूजातितय्सं छपाखें आशिष काइ।” येशू अब्राहामया छम्ह सन्तान खः। फुक्क मनूतय्सं वय्कःपाखें आशिष काइ छाय्धाःसा सुनां सुनां येशू ख्रीष्टयान विश्वास याइ इमिगु पाप क्षमा जुइ अले अब्राहामया आत्मिक सन्तान जुइ।
परमेश्वरं अब्राहामयात वया काय् इसहाकयात बलि कथं छा धकाः धयादिल, परमेश्वरं बलिया निंतिं वया काय्या पलेसा छम्ह भ्याःचा बियादिल। झीपिं झीगु पापंयाना सीमापिं खः! अय्नं परमेश्वरं येशूयात झीगु पलेसा बलिदान जुइत बियादिल। अथे जुयाः झीसं येशूयात परमेश्वरया भ्याःचा धकाः धायागु खः।
परमेश्वरं मिश्रदेशय् दकलय् लिपांगु विपत्ती छ्वयादीबलय् वय्कलं इस्राएलीतय् छेँजपिन्त छम्ह सिद्धम्ह भ्याःचा स्या अले वया हि छिमिगु छेँया लुखा दुवालय् निखे जखः व फुसय् इलाब्यु धयादिल। अनंलि परमेश्वरं व हि खनाः इमिगु छेँयात त्वःतादिल अले वय्कलं इमि न्हापां बूपिं सन्तानतय्त स्यानामदी। थ्व घटनायात हे छत्काराया नखः धकाः धाइ।
येशू झीगु निंनिं छत्काराया भ्याःचा खः। वय्कः सिद्ध व छुं नं पाप मदुम्ह खः अले छुत्काराया नखः हनेगु इलय् वय्कःयात स्याःगु खः। सुनानं येशूयात विश्वास यात धाः येशूया हिं वयागु पापया पलेसा मू पुलाबि। अले परमेश्वरया दण्डपाखें व मनू बचय् जुइ।
परमेश्वरं इस्राएलीतनापं छगू बाचा चिनादिल, इपिं वय्कलं ल्ययातःपिं मनूत खः। अय्नं परमेश्वरं छगू न्हूगु बाचा चिनादीगु दु, थ्व फुक्क मनूतय्गु निंतिं खः। थ्व न्हूगु बाचां याना सुं नं मनूतय्सं येशूयात विश्वास यात धाःसा इपिं परमेश्वरया सनतान जुइ।
मोशा छम्ह तःधंम्ह अगवक्ता खः अले वं परमेश्वरया वचन घोषणा यात। अय्नं येशू दक्वसिबय् तःधंम्ह अगमवक्ता खः। वय्कः परमेश्वर खः अथे जुयाः वय्कलं यानादीगु फुक्क ज्याखँत परमेश्वरया वचन कथं यानादीगु खः। अय्जूगुलिं येशू हे परमेश्वरया वचन खः।
परमेश्वरं दाऊदया छम्ह सन्तानं वय्कःया मनूतय्त सदां सदां हे जुजु जुयाः राज्या यानादी धकाः दाऊद जुजुनापं बाचा चिनादिल। छाय्धाःसा येशू परमेश्वरया काय् अले मसिह खः, वय्कः हे दाऊया सन्तान खः गुम्हसय्सिनं सदां सदां मनूतय्के राज्य यानादी।
दाऊद इस्राएलया जुजु खः, अय्नं येशू धाःसा फुक्क संसारया जुजु खः! वय्कः हाकनं झायादीनिनी अले सदांया न्याय व शान्तिनापं वय्कलं थ्व संसारय् राज्य यानादी।
थ्व घटनात बाइबलया थुपिं अध्यातपाखें काःगु खः उत्पत्ती १-३,६,१४,२२; प्रस्थान १२, २०; २ शमूएल ७; हिब्रु ३:१-६, ४:१४-५:१०, ७:१-८:१३, ९:११-१०:१८; प्रकाश २१
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।