47. ४७. पावल व सिलास फिलिप्पी शहरय्
शाऊल रोमी साम्राज्याय् फुक्कथासय् यात्रा यानाच्वंबलय् वं थःगु नांयात हिला रोमी नांकथं “पावल” धकाः छ्यलेगु यात। छन्हु पावल व वया पासा सिलास फिलिप्पी शहरय् येशूया भिंगु खँ न्यंकेत वन। उपिं नदीपाखें जुया शहरया पिने मनूत प्रार्थना यायेत मुनेगु थासय् वन। अन इमिसं लिडिया नांयाम्ह छम्ह मिसायात नापलात, व मिसा व्यापार याइम्ह खः। वं परमेश्वरयात तसकं माया याइम्ह व वय्कःयात आराधना याइम्ह खः।
येशूया बारे न्यना विश्वास यायेत परमेश्वरं लिडियाया नुगः चाय्कादिल अले वं व वया छेँजःपिन्सं बप्तिस्मा काल। वं पावल व सिलासयात थःगु छेँय् बाय् च्वनेत इनाप यात। अथे जुया पावल व सिलास व मिसाया छेँजःत नापं हे च्वनेगु यात।
पावल व सिलास प्रार्थना याइगु थासय् मनूतय्त नापलायेगु याना हे च्वन। न्हिया न्हिथं थें हे इपिं अन नापलायेगु याना च्वन, भूत दुब्युम्ह छम्ह भ्वातिं मचा नं इपिं ल्यू ल्यू वनेगु यात। व हे भूतआत्मापाखें हे वं मनूतय्गु ल्हाः स्वयेगु याइगु खः, थुकथं ल्हाः स्वया थः मालिकया निंतिं यक्व ध्यबा कमय् यायेगु यानाच्वन।
थुकथं व भ्वातिं मचां थथे धकाः चिल्लाय् दना हाल, “थुपिं मनूत दक्वसिबय् तःधंम्ह परमेश्वरया सेवकत खः। इमिसं छिमिगु निंतिं मुक्तिया लँपुया घोषणा यानाच्वंगु दु।” व मिसां थुलितक धाल कि गुकिं याना पावल तसकं तंम्वल।
लिपतय् व मिसता चल्लाय्दना हाबलय् पावलं वपाखे स्वया वयाके दुगु मभिंगु आत्मायात धाल, “येशूया नामं धाये व मिसा मचायापाखें पिहां हुँ।” अले उघ्रिमय् हे व मभिंगु आत्मां व मिसायात त्वःता वन।
अले व मिसा मचाया मालिक तसकं तंम्वल! अले व मिसा मचां मभिंगु आत्मा मदय्कं मनूतय्गु भविष्य धाये फइमखु धकाः वया मालिकं सिकल। थुकिया अर्थ थ्व हे खः कि आः मिसा मचां मनूतय्गु ल्हाः स्वया थः मालिकया निंतिं ध्यबा कमय् याना हयेफइ मखुत।
अथे जुयाः व भ्वातिं मिसा मचाया मालिकं पावल व सिलायात रोमी हाकिमतय्थाय् ब्वना यंकल, अले इमिसं वयात दाया झ्यालखानायह कुनाबिल।
इमिसं पावल व सिलासयात दक्वसिबय् सुरक्षा दुगु झ्यालखानय् कुना बिल अले इमिगु तुतिइ सिँयागु न्यवः न्ह्याकल। अय्नं शुद्ध चान्हय्या ईलय् इमिसं परमेश्वरया प्रशंसाया म्ये हाला च्वन।
छक्वलं अन तसकं भुखाय् ब्वल। झ्यालखानय्यागु जग लिगिलिगि सन। फुक्क खापा चाला वन, अले कैदीतय्त न्ह्याकातःगु न्यवः ब्यना वन।
झ्यालखानाया हाकिमतय् न्ह्यलं चाल। अले फुक्क कैदीत बिस्युं वन जुइ धकाः बिचा यात, अले रोमी हाकिमतय्सं थःपिन्त स्याइ धकाः मतिइ तयाः तरवार लिकयाः गः किया सीत स्वल। थ्व खनाः पावलं तसकं चिल्लाय् दनाः हाल, “अथे यानादी मते, जिपिं फुक्कं थन हे दु।”
अले व तसकं ग्याका पावल व सिलासया लिक्क वल अले थथे धकाः इमिके न्यन, “उद्धार कायेत छु छु यायेमा? पावलं लिसः बिल, “येशू प्रभुयाके बिश्वास यानादिसँ अले छि व छिकपिनि छेँजपिं फुक्कं बचय् जुइ।” अले व हाकिमतय्सं पावल व सिलासयात थःगु छेँय् ब्वनाः यंकल अले इमिगु घाःयात सिलाबिल। पावलं वया छेँय् च्वंपिं फुक्कसित येशूया बारे भिंगु खँ न्यकल।
अले व हाकिम व वया फुक्क छेँजःपिन्सं विश्वास याना बप्तिस्मा काल। अले व हाकिमं पावल व सिलासयात नयेगु त्वनेगु याकल। इपिं सकलें छथाय् मुना तसकं लय्ताल।
कन्हय् खुन्हु शहरया हाकिमतय्सं पावल व सिलासयात झ्यालखानां त्वःताछ्वल अले इमित फिलिप्पी शहरं वनेत इनाप यात। पावल व सिलासं लिडिया व मेपिं पासापिन्त नापलात अनंलि इमिसं व शहर त्वःता वन। येशूया बारे भिंगु यक्व थासय् न्यनावन अले मण्डलीत नं अप्व दयावन।
पावल व मेपिं ख्रीष्टियन नायःत यक्व शहरय् येशूया भिंगु खँ न्यंकुकूं स्यनेकने यायां यात्रा याना च्वन। इमिसं मण्डली च्वंपिं विश्वासीतय्त उत्साह बीगु व स्यनेकने यायेगु निंतिं यक्व हे पौत च्वल। थुपिं मध्य छुं पौत थौं बाइबलया सफुलिइ दु।
थ्व घटना बाइबलया थुपिं अध्यायपाखें काःगु खः प्रेरित १६:११-४०
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।