46. ४६. पावल विश्वासी जूगु
शाऊल छम्ह ल्याय्मम्ह मनू खः वं स्तिफनसयात स्याबलय् वसः स्वयाच्वंम्ह खः। उलबय् वं येशूयात विश्वास याःगु मदुनि। अथे जुयाः वं विश्वासीतय्त दुःख बीगु यानाच्वंगु खः। यरूशलेमय् छेँय् छेँय् वना वं मिजं व मिसातय्त ज्वनाः झ्यालखानाय् तयाबीगु खः। तःधंम्ह पुजाहारीं शाऊलयात दमस्कसया शहरय् वनाः ख्रीष्टियनतय्त ज्वनाः इमित यरूशलेमय् हजि धकाः अनुमति बिल।
शाऊल दमस्कसपाखे वनाः च्वंबलय् स्वर्गं छगू थीगु जः वयागु छचाखेरं खल अले व बँय् क्वद वन। शाएलं थथे धया हःगु सः लात, “शाऊल, शाऊल! छाय् छं जितः दुःख बिया च्वनादु? शाऊलं न्यन, “हजुर, छि सु खः?” येशूं वयात लिसः बियादिल,“जि व हे खः सुयात छं दुःख बिया च्वंगु दु।”
शाऊल दन अले वं मिखां मखन। वया पासपिन्सं वयात दमस्कसय्तक ज्वनाः यंकल। शाऊलं स्वन्हु तक छुं नं नयेगु त्वनेगु मयात।
दमस्कसय् हननिया नां याम्ह छम्ह चेला दु। परमेश्वरं वयात धयादिल, “शाऊल च्वनाच्वंगु छेँय् हुँ। छं थःगु ल्हाः वयाके तयाब्यु अले वं हाकनं खनि।” अय्नं हननियां धाल, “प्रभु, थ्व मनू विश्वासीतय्त तसकं दुःख बीम्ह खः धकाः जिं न्यनागु दु।” परमेश्वरं वयात लिसः बियादिल, “हुँ! जिं वयात जिगु नां यहूदीतय्थाय् व अन्यजातितय्गु पुचःया मनूतय्थाय् घोषणा यायेत ल्ययाम्ह खः। वं जिगु निंतिं तसकं सास्ति नयेमालितिनि।
अथे जुयाः हननिया शाऊलयाथाय् वन अले वं थःगु ल्हाः वयाके तया अले धाल, “येशू, छ लँपुइ वयाच्वंबलय् वय्कः छनापं खँ ल्हानादीगु खः छिसं हाकनं खंकेफयेमा धकाः वय्कलं जितः छिथाय् छ्वयाहःगु खः। छ पवित्र आत्मा जायेमा।” शाऊलं थथें हे खंकेफत अले हननियां वयात बप्तिस्मा बिल। अनंलि शाऊलं छुं नयेगु नसा नल अले वयात तागत वया व बल्लात।
अनंलिपा थत्थें हे शाऊलं दमस्कसय् च्वंपिं यहूदीतय्त थथे धकाः प्रचार यायेगु शुरू यात, “येशू हे परमेश्वरया काय् खः! अले यहूदीत छक्क जुल छाय्धाःसा शाऊलं विश्वासीतय्त स्यायेगु कुतः यानाच्वंगु खः आः व थःम्हं हे येशूयात विश्वास यात। शाऊलं यहूदीत नापं जवाःसवाः यानाच्वन अले शाऊलं इमित येशू हे मसिह खः धकाः क्यनाबिल।
यक्व दिं लिपा, यहूदीतय्सं शाऊलयात स्यायेगु ग्वसाः ग्वल। इमिसं वयात स्यायेगु निंतिं शहरया ध्वाखाय् मनूत पिवा तयेत छ्वल। अय्नं शाऊलं इमिसं अथे ग्वसा ग्वःगु दु धयागु खँ सिकल अले वया पासपिन्सं वयात बिस्युं वनेत ग्वाहालि यात। छन्हु चान्हय् शाऊलायात दालय् तया शहरया पखालं क्वय् क्वछ्वयाबिल। अले शाऊल दमस्कसं बिस्युं वनाः येशूया बारे प्रचार यायेगु ज्या धुवांधु याना हे च्वन।
शाऊल चेलात नापं नापलायेत यरूशलेमय् वन अय्नं व उपिं यहूदीत खना छतिं हे मग्या। अले बरनाबास नां याम्ह छम्ह बिश्वासीं शाऊलयात प्रेरितयाथाय् यंकल अले दमस्कसं शाऊलं गुकथं साहस याना प्रचार याःगु खः व धयाबिल। अनंलि चेलातय्सं शाऊलयात स्वीकार यात।
सुं विश्वासीत यरूशलेमय् जूगु दुःखपाखें बिस्युं वना तापक्क च्वंगु एन्टिओखिया शहरय् वन अले अन येशूया बारे न्यंकेगु यात। एन्टिओखियाय् अप्वः थें यहूदीत मदु। अय्नं दकलय् न्हापां न्यंकूबलय् हे अन च्वंपिं मनूत अप्वः बिश्वासी जुल। बरनाबास व शाऊलं अन च्वंपिं उपिं न्हूपिं विश्वासीतय्त अझ अप्वः स्यनेकने यायेगु यात। अले इमिसं मण्डलीयात बल्लाकेगु ज्या यात। येशूयात बिश्वासयापिं मनूतय्त दकलय् न्हापालाक “ख्रीष्टियन” धाःगु थाय् नं एन्टिओखिया हे खः।
छन्हु एन्टिओखियाय् च्वंपिं विश्वासीत उपवास च्वना प्रार्थना यानाच्वंबलय् पवित्र आत्मा इमित थथे धाल, “जिगु निंतिं बरनाबास व शाऊलयात प्रभुया ज्या यायेगु निंतिं अलग या अले व हे ज्या यायेगु निंतिं जिं इमित ल्ययागु खः।” अथे जुया एन्टिओखियाय् च्वंगु मण्डलीइ च्वंपिं विश्वासीतय्सं बरनाबास व शाऊलयात थपिनिगु ल्हाः इमिके तया प्रार्थना यात। अनंलि इमित येशूया बारे न्यकवनेत मेगु यक्व थासय् छ्वयाबिल। बरनाबास व शाऊलं थीथी जातियापिं मनूतय्त स्यनेकने यात अले यक्व हे मनूतय्सं प्रभु येशूयात विश्वास यात।
थ्व घटना बाइबलया थुपिं अध्यायत पाखें काःगु खः प्रेरित ८:३; ९:१-३१; ११:१९-२६; १३:१-३
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।