45. ४५. फिलिप व इथियोपिय् च्वंम्ह तःधंम्ह हाकिम
शुरूया मण्डलीया नायःत मध्य स्तिफनस नांयाम्ह छम्ह मनू दु। व तसकं भिंम्ह अले पवित्र आत्मा व बुद्धिं जाःम्ह मनू खः। स्तिफनसं यक्वः हे अजूचायापुगु ज्यात यात अले मनूतय्सं येशूयात विश्वास यायेमा धकाः तसकं हे बांलाःगु तरिकां धाइगु यानाच्वन।
छन्हु, स्तिफनस येशूया बारे स्यनेकने यानाच्वंबलय् येशूयात विश्वास मयाइपिं यहूदीतय्सं व नापं जवाःसवाः यात। इपिं तसकं तंम्वल अले स्तिफनसया बारे धार्मिक नायःतय्सं मखुगु साक्षी बल। इमिसं धाल, “थ्व मनुखं मोशा व परमेश्वरया बारे मभिंगु खँ धयाच्वंगु जिमिसं ताःगु खः। अथे जुयाः उपिं धार्मिक नायःतय्सं स्तिफनसयात ज्वनाः तःधंम्ह पुजाहारी व यहूदीतय् मेपिं नाय्तय्थाय् हल। इमिसं स्तिफनसया बारे यक्व हे मखुगु साक्षी बिल।
तःधंम्ह पुजाहारी स्तिफनसयात न्यन, “छु थ्व खँ धात्थें खः ला? स्तिफनसं इमित परमेश्वरं अब्राहामनिसें कयाः येशूया इलय्तक तक्वःमछि यानादीगु अजूचायापुगु ज्यात व गुकथं परमेश्वरया आज्ञा मनूतय्सं मानय् मयात धयागु खँ फुक्कं धया लिसः बिल। अले स्तिफनसं धाल, “छकपिं जिद्धि व विद्रोह याइपिं मनूतय्सं न्ह्यबलें पवित्र आत्मायात इन्कार याःगु दु, गथे छिकपिनि पुर्खातय्सं न्ह्याबलें परमेश्वरयात इन्कार यात अले वय्कःया अगमवक्तातय्तसं स्यानाबिल। अय्नं छिकपिन्सं ला इमिसं स्वया नं अझ अप्व यानाच्वनंगु दु।
उपिं धार्मिक नायःतय्सं थ्व खँ न्यंबलय् तसकं तंम्वल इमिसं थःपिनिगु न्ह्याय्पं तित अले तसकं हाल। इमिसं स्तिफनसयात लुत्तुलुया शहरं पिने यंकल अले वयात स्यायेत ल्वहंतं कय्कल।
स्तिफनस सीथें च्वंबलय् वं तसलं थथे धाल, “येशू जिगु आत्मायात कयादिसँ।” अले वं पुलिं चुया हाकनं तसलं थथे धाल, “प्रभु थ्व पापया दोष इमित मलाय्मा।” अनंलि व सित।
शाऊल नांयाम्ह छम्ह ल्याय्मम्ह मनू नं स्तिफनसयात स्याःपिं मनूतनापं मिलय्जूम्ह खः अले इमिसं पत्रुसाय ल्वहंतं कय्का च्वंबलय् शाऊलं वयागु लं स्वयेत पिवाः च्वनाच्वम्ह खः। उखुन्हु, यरूशलेमया यक्व मनूतय्सं येशूया चेलातय्त दुःख बीगु यात अथे जुयाः विश्वासीत मेगू हे थासय् बिस्युं वन। अय्नं उलि जुइ धुंकाः नं इमिसं थःपिं वनागु थासय् येशूया बारे न्यंकेगु मत्वःतु।
फिलिप नां याम्ह छम्ह येशूया चेला दु अले मनूतय्सं दुःख ब्यूबलय् यरूशलेमं विस्युंवम्ह मध्य व नं छम्ह खः। व सामरियाय् वन अले वं अन येशूया बारे न्यंकेगु यात। अन वं यक्व मनूतय्त बचय् यात। छन्हु, परमेश्वरया दूतं फिलिपयात मरूभूमिइया लँय् हुँ धकाः धाल। अथे हे व लँपु जुया वनाच्वंबलय् फिलिपं इथियोपियाया छम्ह सरकारी कर्मचारीयात रथय् च्वना वनाच्वंगु खन। अले पवित्र आत्मां फिलिपयात धाल, वनाः व मनूनापं नापलाना खँ ल्हाः हुँ।
फिलिप व रथया लिक्क थ्यनेवं वं इथियोपियाली मनूखं यशैया अगमवक्तां च्वःगु सफू ब्वब्वं वनाच्वंगु खः। व मनुखं ब्वनाच्वंगु खँ थथे दु, “स्यायेत यंकूम्ह फै थें वय्कलं छुं नवाना मदी। सँ चाकीबलय् भ्याःचा सुम्क च्वं थें वय्कलं नं थःगु म्हुतुप्वाः तिनाच्वन। वय्कःयात क्वह्यंकाः बांलाक न्याय तकं मयात। वय्कःया सन्तानयागु खँ सुनां कनी? छाय्धाःसा वय्कःयात पृथ्वीइ स्याना बिल।”
फिलिपं व इथियोपियायाम्ह मनूयाके न्यन, “छु छिसं ब्वनाच्वनागु खँ थू ला? व इथियोपियालीं लिसः बिल, “अहँ मथु। सुनानं मधाय्कं गुकथं थुइके फइ? दयायाना जिथाय् लिक्क झासँ अले थुकिया बारे थुइकादिसँ। छु थ्व यशैयां थःगु बारे वा मेपिनिगु बारे सुयागु बारे धाःगु खः?
फिलिपं इथियोपियाली मनूतयात यशैयां येशूया बारे च्वःगु खः धकाः व्याख्या यानाबिल। फिलिपं वयात येशूया बारे भिंगु खँ न्यंकेत वं मेगू सफूपाखें नं न्यंकल।
अले फिलिप व व इथियोपियाली लँय् वनाच्वंबलय् इपिं छुं लः दुगु थासय् थ्यंकः वल। अनंलि व इथियोपियालीं धाल, “स्वयादिसँ अन लः दु! जितः बप्तिस्मा कायेत छुकिं पनि? अले वं रथ चलय्याइम्हय्सित रथ दिके धकाः धाल।
अथे जुयाः इपिं व लः दुथाय् क्वहां वन अले फिलिपं इथियोपियालीयात बप्तिस्मा बिल। इपिं लखं थहां वये धुंकाः पवित्र आत्मां फिलिपयात मेथाय् हे यंकादिल अन वं मनूतय्त येशूया बारे न्यंका च्वन।
इथियोपियाली मनूधाःसा थःगु हे छेँय् वनेगु लँपुइ वना हे च्वन अले वं येशूयात म्हसिगुलिं व तसकं लय्ताल।
थ्व घटना बाइबलया थुपिं अध्यायपाखें काःगु खः प्रेरित ८:५; ८:२६-४०
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।