44. ४४. पत्रुस व यूहन्नां फ्वँगीयात लाय्कूगु
छन्हु, पत्रुस व यूहन्ना देगलय् वनाच्वंगु खः। उबलय् इपिं देगःया ध्वाखाय् थ्यंबलय् इमिसं छम्ह खुत्यांम्ह मनूयात खन अले व मनुखं इमिके ध्या फ्वँनाच्वंगु खः।
पत्रुसं व खुत्यांम्ह मनूयात स्वया धाल, “छन्त बीत जिके ध्यबा मदु। अय्नं जिके छु दु व जिं छन्त बी। येशूया नामं दँ अले न्यासे हुँ।”
अले थत्थें हे परमेश्वरं व खुत्यांम्ह मनूयात लाय्कादिल, अले व तिंतिंन्हुया उखेंथुखें जुया परमेश्वरया प्रशंसा यात। देगःया चुकय् च्वना च्वम्ह मनू थ्व हे मखुला धकाः मनूत छक्क जुल।
छुं ईलिपा हे ग्वाः ग्वाः मनूत व ल्वय् लंम्ह मनूयात स्वयेत वल। पत्रुसं इमित धाल, “छु मनूयात लाय्कल धकाः छिकपिं छाय् छक्क जुइमाःगु? वयात जिमिसं थःगु शक्तिं लंकागु मखु बरू थ्व ला येशूं बियादीगु शक्ति व विश्वास खः गुकिं थ्व मनूयात लाय्केफत।”
“रोमी राज्यपालयात येशूयात क्रूसय् यख्खाय्मा धकाः धाःपिं छिकपिं हे खः। जीवन बियादीम्हय्सित छिकपिन्सं स्यानाबिल अय्नं परमेश्वरं वय्कःया म्वाकादिल। छिकपिन्सं छु यानाच्वनंगु दुधयागु मस्युसां नं परमेश्वरं अगमवाणीत पूवंकेत छिकपिन्त छ्यलादिल। मसिहं कष्ट नयेमालि अले वय्कःयात स्याइतिनि। अथे जुयाः पश्चाताप यानाः परमेश्वरपाखे लिहांझासँ अले छिकपिनिगु पाप क्षमा जुइ।”
पत्रुस व यूहन्नां धाःगु खंयाना देगलय् च्वंपिं नायःत तंम्वल। अथे जुयाः इमिसं पत्रुस व यूहन्नायात ज्वनाः झ्यालखानाय् कुनाबिल। अय्नं यक्व मनूतय्सं पत्रुसं नवागु न्वचुयात विश्वास यात अले येशूयात विश्वास याःपिं मनूतय्गु ल्याः लगभग न्याद्व (५,०००) ति दत।
कन्हय् खुन्हु यहूदी नायःतय्सं पत्रुस व यूहन्नायात तःधंम्ह पुजाहारी व मेपिं धार्मिक नायःतय्गु न्ह्यःने हल। इमिसं पत्रुस व यूहन्नायाके न्यन, “छिमिसं गुगु शक्तिपाखें थ्व खुत्याम्ह मनूयात लाय्काःगु खः?
पत्रुसं लिसः बिल, “छिकपिन्थाय् न्ह्यःने दनाच्वनादीम्ह येशू मसिहया शक्तिं लाय्काःगु खः। छिकपिन्सं येशूयात क्रूसय् यख्खानाः स्यानाबिल अय्नं परमेश्वरं वय्कःयात हाकनं म्वाकादिल।
पत्रुस व यूहन्नां थुकथं साहसयाना नवागु खनाः उपिं नायःत छक्क जुल छाय्धाःसा इमिसं स्यु कि उपिं साधारणपिं व आखः ब्वनामतःपिं मनूत खः। अय्नं उपिं मनूत येशूनापं हे च्वनिपिं खः धकाः इमित लुमना वल। पत्रुस व यूहन्नायात ख्याच्वः बीधुंकाः इमित त्वःताबिल।
थ्व घटना बाइबलया थुपिं अध्यायपाखें काःगु खः प्रेरित ३:१-४:२२
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।