35. दया करया बाप चो काहानी

एक दिन, यीशु खुबेय झन मानेयांग शिक्षा देते रेहेय जो हूनाचो सुनाता करता एकेय लग होऊ रहत। हूनी मानेय चुंगी पिवयाइता अर संगेय दुसरा मानेय बल रहत जो मूसा चा व्यवस्था चो पालन करता चो कोशिस इकरू रहत।

कुछ धार्मिक अगुवा देखला कि यीशु हून मानेयांग संग एक संगवारी चो इसा गोठयावते रेहेय। हूनेय करता हूनिईता एक दूसराक यो बलतो सुरु करला कि हून गलत करिदा हेय। यीशु हूनांग चा गोठयावताक सुनलो, हूनेय करता हून हूनांग यो कहानी सांगलो।

“एकलो मानेय रेहेय जेचा दूयझन कड़हा रहत। धुलो बेटा इतो आपला बाप के बल्लो, “ हे बाबा, मक एभे माचो हिस्सा चाहिए!’ अत: बाप इतो आपला दुयेय झन कड़हांग चा पुरहे आपला सम्पतिक बांटु दिलो।”

जल्दी धुलो बेटा इतो आपला सब कुछ के एकेय लग करुन दूर देये गेलो अर पापी जीवन जीवताये आपला सपा धन के बर्बाद करू दिलो।”

“याहचो बाद, जहा धुलो बेटा इतो रेहेय हून देशे एक भयंकर आकाल पड़लो, अर हूनाचा लग भोजन झोंकता करता धन इरेहेय। हूनेय करता हूनाक जो काम मिरलो हून सोरांग चरावतो रेहेय। हून ईतलो दुखी अर भुखेय रेहेय कि हून सोरांग चा भात के खाऊक चाहेय।”

“आखिरकार, हून धुलो बेटा खुद के बल्लो, ‘ मै का्य करिंदा हेंय ? माचा बाबा चा सब सेवकांग लग खाता करता खुबेय आसेय, तबले बल मै ईथा भुकेय मरिंदा हेंय। मै माचा बाबा लग वापस जाईन अर माचा बाबाक एक सेवक बनता करता हूनाक विनती करिन।”

“अत: हून धुलो बेटा इतो वापस आपला बाप इता चा घरे तेंव जाता चो सुरु करलो। जबकि हून एभे दुरे रेहेय, हूनाचो बाप इतो हूनाक देखलो अर हूनाक तरस खादलो हून पराउन आपला बेटा इता लग गेलो अर हूनाक गले लगाऊन चुमलो।”

“हून बेटा इतो बल्लो, ‘हे बाबा, मै परमेश्वर अर तुचो विरुध्द पाप करले हांय। मै तुचो बेटा बलता चो लायक बल नाही।”

“तबले बाप इतो आपला सेवक के बल्लो, ‘जल्दी जाऊन सबसे अच्छा कपड़ा धरून एहा अर माचा बेटा लयावा! हूनाचा अंगुहे अंगूठी अर हूनाचा खाटांगये जूता लयावा फेर। सबसे अच्छा बछरुक मारा ताकि हमी खांव अर खुशी मनाऊ, कायेकी माचो बेटा मरु रेहेय तबले एभे हून जीवत आसेय। हून हाजु रेहेय, तबले एभे हमी हूनाक अम्बरावलु हांव!”

“हूनेय करता मानेय खुशी मनावतो सुरु करला। कुछ समय बीतलाये, बड़े बेटा वेदाये काम करुन घरे इलो हून गीत अर नाचता चो आवाज के सुनलो अर घबरावलो कि यो का्य होयदा हेय।

“जब बड़े बेटाक मालूम होलो कि हूनि याहाय करता खुशी मनावधात कायेकी हूनाचो भाई घरे ऐऊ रेहेय, तब हून खुबेय रीस होलो अर घरे दाखिल इहोय। हूनाचो बाप इतो दुवारे ऐऊन हूनाक हूनांग चा संग खुशी मानाऊक निवेदन करलो, तबले हून मना करु दिलो।”

“हून बड़े बेटा आपला बाप के बल्लो, “ इही सपा साले मै तुचा केता मन से काम करलेय! केभेय तुचा बात के ईटालेय, तबले तुंय केभेय मक एक ठान इधली सेरी बल इदेश ताकि मै माचा संगवारीयांग संग दावत करुक सकेय। तबले तुचो चो बेटा तुचा धन के पाप काम करुक बर्बाद कंरू दिलो। अर एभे जब हून इलो हाय तो हूनाचा करता खुशी मनावता करता तुंय सबसे अच्छा बछरुक मारलिस।”

“बापइतो जवाब दिलो, ‘ हे माचा बेटा, तुंय हमेशा माचा संग आसस ऐ जो कुछ माचो आय हून सब तुचो आय। तबले हमचा करता खुशी मानावतो सही आय कायेंकी तुचो भाई मरु रेहेय तबले एभे हून जीवत आसेय। हून हाजु रेहेय, तबले एभे हमी हूनाक अम्बरावलु हांव।”