16. सोडवणार

यहोशू मोरणे बाद इस्राएलि बोगवानान आज्ञा तोड्या। ता बोगवानाणन नियमाह पालन नाह केऱ्या, एने ता वायदान देशाम रीन वोचील कनानीह भी बाहेर काड देना। इस्राएलि आपणा खेरला बोगवानाह, यहोवाह सोडिन कनान वालान बोगवानान भोक्ती केरणेन चालू केर देना। इस्राएलि फाय कूण राजा नाह, केरीन जाह जो हाजो लागी तो तोच केरतालो।

बोगवानन आज्ञा नाह मानणे द्वारा इस्राएलि एक पद्धतिन सुरुवात केऱ्या जी मोक्ताच वार एनी।जी यह पद्धत इही केरीन एति: काहिक वोर्ह्या इस्राएली बोगवानान आज्ञा नेय मानती, तेवी तो ताहा तान दुश्मनाह द्वारा ताहा आरवाडी एने दण्ड आपी। तान दुश्मन तान वोस्तु लुट लेती,तान धेन नाश केर देती, एने ता माय रीन जुलुम जाणाह मार टाकति। एने तान दुश्मन ता पोर काहिक वोर्ह्या वोर गुलामी केरावति,तान बाद उसके बाद इस्राएली तान पापान पश्चाताप केरीन बोगवानाह ताह वोचाडणेन केरता प्रार्थना केरती।

जेवी जेवी इस्राएली पश्चाताप केरती ते बोगवान ताहा वोचाडी। तो एक सोडवणारान द्वारा इही केरी – एक ओहलो जाण जो तान दुश्मनान विरुद्ध लेडायीन ताह आरवाडी।तेवी देशाम शान्ति आवी एने तो सोडवणार ता पोर हास केरीन राज्य केरी। बोगवान ता माणहाह वोचाडणे केरता मोक्ताच सोडवणाराह मोकल्यो। बोगवान जागेच वाली एक दुश्मन जाती। मिद्यानिन द्वारा इस्राएलिह आरवाड ने द्वारा इही पोशो केऱ्यो।

मिद्यानि सात वोर्ह्या वोर इस्राएलिन कामायीह लुट्या। इस्राएली माणहा जुलुम बिय गिया,एने गुफाम लीकाय जायील एता काय मिद्यानी माणहे ताह सापडावती नाय। आखरी, ता वोणेन केरता बोगवानाह एर केऱ्या।

गिदोन नानावान एक इस्राएली एदमी एतो। एक दिह,तो एक जागे लीकायीन गोव मोलतालु का मिद्यानी माणहे ताह चोरति नाय। यहोवान स्वर्गदूत गिदोन फाय आवीन ताह केयो, "हे बाहधे र, बोगवान तुवा हेरी हि। जा एने और इस्राएलिह मिद्यानि से वोचाड "

गिदोन ने आबाक फाय मूर्तिन केरता एक वेदी एति। सोब से पेल बोगवान गिदोनाह ति वेदीह तोडने केयो।पुण गिदोन माणहाह बितालो,केरीन तो रातीन वाट जुव्यो। ओवतो तो ति वेदीह तोडीन तुकडा -तुकडा केर दिनो। तो बोगवानान करता एक नोवाली वेदीह बोणाव्यो एने ति पोर बोगवानान केरता बलि केऱ्यो।

वेगोच माहहा देख्या का कून तीभी वेदीह तोड टाकील हि, केरीन ता जुलुम रागाम आव लागा। ता गिदोनाह मार टाकणे तान घेर आवा, पुण गिदोनान आबुक ताह केयो, "तुमु काहा तुमरा बोगवानान मोदेत केरतेह, तान रक्षा ताहचे करणे देवो!" तो इही केयो केरीन तान माणहे ताह नाह माऱ्या।

तेवी इस्राएलिह लूटणेन मिद्यानी माणहे पोशा आवा। ता ओला होवता एता का मोंजाताला भी तान। गिदोन ता हेरी लेडाणेन केरता इस्राएलिह एकठो हादयो। गिदोन बोगवाना फाय दुय चिन्ह मांग्यो का ताहा विश्वास एय जाय का खेरीच बोगवान ताहा इस्राएलाह वोचाडनेन किथी।

पहला चिन्ह ने करता, गिदोन मेडरान रोस्का बुयी पोर मेल्यो एने बोगवानाह केयो वेगोच ने ओहटो फक्त मेडरान रोस्का पोर पोडणे जुवी बुयी पोर नाह।बोगवान तिहीच केऱ्यो। ओगाणली रात,तो बोगवानाह केयो आखी बुय बीज जाणे जुवी पुण मेंडरान रोस्का हुकालाच रेणे जुवी।बोगवान तिहीच केऱ्यो।ज्या दुय चिन्ह ने कारण, गिदोन विश्वास केऱ्यो का बोगवान खेरीच इस्राएलिह मिद्यानि फायरीन वोचाडने होदिह।

तेवी गिदोन ने सैनिकाह ता फाय हादयो एने 32,000 एदमी आवा।पुण बोगवान ताहा केयो का ज्या जुलुम। तेवी गिदोन 22,000 जाणाह घेर मोकेल दिनो जा लेडाने से बिताला।बोगवान पोशो गिदोनाह केयो अवि भी एदमी जुलुम हेते।केरीन गिदोन 300 सैनिकाह छोडीन आखाह घेर मोकली देनो।

ति राती बोगवान गिदोनाह केयो, "मिद्यानिन ठीकाणे जा एने तान वातु होमेल। जेवी तु होमेलही का ता काय वातु केरतेह ते तु तापोर लेडायी करणे से नाय बी हि।" केरीन ति रात, गिदोन नीचे तान ठीकाणे गियो एने तो एक मिद्यानी सैनिकाह तान दोस्ताह ति वात केतालू होमल्यो जी तो होपाना माय देखील एतो।तो एदमी तान दोस्ताहा केयो, "ज्या होपानान अर्थ हि का गिदोन ने सेना आपु मिद्यानी सेनाह आरवी देय!" जेवी गिदोन ज्यो केतालो होमल्यो तेवी बोगवानान स्तुति केऱ्यो।

तेवी गिदोन आपणा सैनिका फाय आवो एने आखाह एक- एक बुन्गो, एक माटळान थामलो, एक मोठलो भूलो आप्यो।ता तान ठीकाणाह कोनड लेदा। गिदोन ने 300 सैनिक आपणो भूलोह थामला केरीन डाप रीयील एता केरीन मिद्यानी माणहाह तान उजूड नाह देखानो।

तेवी गिदोन ने सैनिक आपणा थामलाह एकठाच उचकाहुच तोडया एने भूलान आगठान उजालो केऱ्या। ता तान बुन्गो फुक्या एने आयडया, "यहोवा एने गिदोन ने तलवार!"

बोगवान मिद्यानिह घाबराव देनो,केरीन ता एक दिहराह मारणे -काटणे लागा। ताहरूच, गिदोन खोबऱ्याह दिहरी इस्राएलिह मिद्यानिन पासाण पोडणेन तान मोदेत केरणेन हादणे मोकल्यो।ता जुलुम जाणाह मार टाक्या एने दिहराह पासान पोडीन इस्राएल देश माय रीन बाहर निकाल देना।ति दिह 1,20,000 मिद्यानी मोर गिया।इह केरीन इस्राएलाह वोचडयो।

ता गिदोनाह राजा बोणावणे होदताला, पुण गिदोन ताह नाह केय देनो,पुण तो ताफाय रीन ता होनान गेयणा मानग्यो जाता मिद्यानि फाय रीन लूटील एता। ता माणहे जुलुम होनो गिदोन आप्या।

तब गिदोन ता होनान एक खास फाडका बोणाव्यो जोहला माहायाजक पेरताला। पुण माणहे तान भोक्ती करणे चालू केर देना जीही का तो एक मूर्ति एय। तेवी बोगवान पोशो इस्राएलाह दण्ड आप्यो काहाकाय ता मूर्ति भोक्ती केरील एता। बोगवान तान दुश्मनाह पोशो ता पोर जीकड देनो।आखिरी पोशा ता बोगवानाह मोदेत केरता प्रार्थना केऱ्या, एने बोगवान ता फाय ताहा वोचाडने केरता एक दिहरा सोडवणाराह मोकल्यो।

जीवात मोक्ताच वार एनी: इस्राएली माणहे पाप केरती, बोगवान ताहा दण्ड आपी,एने बोगवान ताहा सोडवणे एखादाह मोकलीह।काहिक वोर्ह्या वोर,बोगवान मोक्ताच सोडवणाराह मोकल्यो जा इस्राएलिह तान दुश्मना से वोचाडया।

आखरी,ता माणहे दिहरा देशान गेत बोगवाना फाय तान केरता एक राजा मांग्या। ता एक ओहलो राजो होदताला जो लांबो एने ताकेतवोर रेय,जो लेडायीम ताह लीन चाली।बोगवानाह तान जी वाट नाह पोटणी,पुण तो ताहा तोहलोच राजा आप्यो जोहलो ता होदताला।