23. यीशुन जन्म

यूसुफ नावान एक धर्मी एदम्या हेरी मरियम की मांगणी एय जायील एति।जेवी तो होमल्यो का मरियम गर्भवती हि ते तो जाणतालो का तो तान सोरो नाह सोथो। पुण, तो मरियमीह बदनाम नाह करणे होद्तालो,केरीन तो ति पोर दया केरीन तीह ठावकोच तलाक आपणेन विचार केऱ्यो।पुण ज्या के पेल का तो ज्यो केरतो, एक स्वर्गदूत तान होपानाम आवीन ताहरी वात केऱ्यो।

तो स्वर्गदूत केयो, "हे यूसुफ, मरियमीह तार लाडी बोनावने से बीय मा। तीन पेटाम जो सोरो हि तो पवित्र आत्मा उखेर रीन हि।ती एक सोराह जन्म आपी। तान नाव यीशु मेलजी (जान अर्थ हि, 'यहोवा वोचाडीह'), काहा काय तो माणहाह तान पापाम रीन वोचाडी।"

ओवतो यूसुफ मरियमी हेरी वाराड केर लेदो एने तान लाडी बोणाविन तान घेर लावो, पुण जाह वोर ति ता सोराह जन्म नाह देनी ताहा वोर तो ति हेरी नाह हुवनो।

जेवी मरियमीन जन्म आपणेन टायम आहने एतो, ते ति एने यूसुफ बैतलहम जाणेन लांबी यात्रा केऱ्या। ताह ताहरी जाणो एतो काहाका रोमी अधिकारी इस्राएल माय रेणारा आखा माणहान गेणति केरण्या एता। ता होदताला का ता आखा माणहे जाहरी तान डाय-डायला रेताला ताहरी जाती। राजा दाऊदान जन्म बैतलहम माय एयील एतो, एने तो मरियम एने यूसुफ दुयून डायलो एतो।

मरियम एने यूसुफ बैतलहम गिया, पुण ताहरी जेनवारान रेणेन जागो सोडीन ताह रोकाणेन काल्लोच जागो नाह जुडणो। तिच जागे मरियम तीन सोराह जन्म देनी। ती ताह डोरान कोठाम लोटाड देनी काहाकाय ताहरी लोटाडणे जागो नाह एतो। ता तान नाव यीशु मेल्या।

तीच रात, ताहरी जागेच खेताम गोवाल्या मेंडरान राखवाली केरणे बाज रीयील एता। उचकाहुच, एक चमकदार स्वर्गदूत ताह देखानो, एने ता बिय गिया। तो स्वर्गदूत केयो, "बिऊ मा, काहाकाय माहु फाय तुमरे केरता एक हाजाली खुबेर हि। बैतलहम माय मसीह, राजान जन्म एनोह!"

जायीन ता सोराह होदु, एने तुमु ताह फाडका माय गुनढाडील एने डोरान कोठाम लोटिल जुडी।" ऊचकाहुच, वादलाम स्वर्गदूता भोराय गियो। ता बोगवान स्तुति केरताल। ता केताला, "आखी महिमा स्वर्ग माय वाला बोगवानाह जुडी। केली पोर ता माणहाम शान्ति एय जान तो चिन्ता केरणे!"

ओवता स्वर्गदूत जात रेना। एने गोवल्या भी तान मेंडराह सोडीन ता सोराह देखणे गिया। जेल्दीच ता ति जागे पोचना जाहरी यीशु एतो एने ता ताह डोरान कोठाम लोटील देख्या, जीही तो स्वर्गदूत ताह कियील एतो। ता जुलुम खुश एना। एने ता गोवल्या पोशा वापस ताहरी जात रेना जाहरी मेंडरा एता। ता जो देख्या एने होमल्या ता सोबान केरता बोगवानान स्तुति केऱ्या।

पूर्व माय एक देशाम काहिक एदमी एता।ता तारान अभ्यास केरील एता एने जुलुम बुद्धिमान एता। ता एक अलग ताराह वादलाम देख्या। ता केया ज्यान अर्थ हि का यहूदियान एक नोवाला राजान जन्म एनोह। केरीन ता ता सोराह देखणे केरता ता देशांम जाणेन निर्णय केऱ्या। एक लांबाला प्रवास ने बाद, ता बैतलहम आव एने तो घेर सापडाव्या जाहरी यीशु एने तान आहाक-आबुक रोकायील एता।

जेवी ता एदमी यीशुह तान आयिक हेरी देख्या ते ता घुटना टेकिन तान आराधना केऱ्या। एने यीशुह मोंगाला भेट। ओवता ता घेर वापस आव गिया।