22. यूहन्नान जन्म

पेलूच, बोगवान तान भविष्यवक्ता हेरी वात केरतालो केरीन ता माणहा हेरी वात केरताला।पुण ता टायमे रीन ओवतो 400 वोर्ह्या वोर तो वात नाह केऱ्यो। तेवी बोगवान जकर्याह नावान भविष्यवक्ता फाय एक स्वर्गदूत मोकल्यो। जकर्याह एने तान लाडी एलीशिबा बोगवानान वात मानताला।ता जुलुम डाया एय जायील एता, एने तान सोरा नाय एता।

तो स्वर्गदूत जकर्याह केयो, "तारी लाडीह एक सोरो एय। तू तान नाव मेलजी।बोगवान ताह पवित्र आत्मा से बोर देय, एने यूहन्ना माणहाह मसीहाह स्वीकार केरणेन तियार केरी।" जकर्याह उत्तर आप्यो, " मी एने मार लाडी सोरो पोयदा केरणेन केरता जुलुम डाया हेते! मी किहिक होमजु का तु माहु हाचलीन किथी?"

तो स्वर्गदूत जकर्याह उत्तर आप्यो, "तार फाय जी हाजि ली खुबेर आपणेन माहु बोगवान मोकलील हि।काहाकाय तु माहु पोर विश्वास नाह केऱ्यो,केरीन तु सोरो जन्म लेता वोर मुकुच रीही।" ताहारुच, जकर्याह मुकू एय गियो। एने तो स्वर्गदूत जकर्याह फाय रीन जात रेनो। ज्या बाद, जकर्याह घेर आवो एने तान लाडी गर्भवती एनी।

जेवी एलीशिबा सोव मोयनान गर्भवती एति, ते तो स्वर्गदूत उचकाहुच एलीशिबान घेरलीह देखानो, जिन नाव मरियम एतो। मरियम कुवारी एति एने वाराडान केरता यूसुफ नावान एदमी हेरी तिन मागणी एय जायील एति। स्वर्गदूत केयो, "तू गर्भवती इही एने एक सोराह जन्म आपही। तुवाह तान नाव यीशु मेलणु हि। तो आखाम रीन मोठला बोवानान सोरो रेय एने हमेशान केरता राज्य केरी।"

मरियम उत्तर आपी, "ज्यो किहिक एय, काहा का मी ते कुवारी हि?" तीह स्वर्गदूत होमजाडयो, "पवित्र आत्मा तुवा आवी, एने बोगवानान सामर्थ तुवा पोर रेय। केरीन तो सोरो पवित्र रेय, एने तो बोगवानान सोरो रेय।" जो तो स्वर्गदूता पोर मरियम विश्वास केऱ्यो।

ज्यो एणेन चालूच, मरियम जायीन एलीशिबाह मिलानी। जीही मरियम तीह नमस्कार केरी, एलीशिबान पेटाम वालो सोरो उसलनो। त्यीन केरता बोगवानान जो केरील एतो तासे से ति दुय जाणी खुश एन्यु। एलीशिबा हेरी तीन मोयना रेणेन बाद, मरियम गेर आव पोशी आव लागी।

ज्या बाद, एलीशिबा सोराह जन्म आपी। जकर्याह एने एलीशिबा ता सोरान नाव यूहन्ना मेल्या, जीहिका तो स्वर्गदूत कियील एतो। तेवी बोगवान जकर्याह बोलणेन हुदार देनो। जकर्याह केयो, "बोगवानान स्तुति एय,काहाकाय बोगवान तान माणहान मोदेत केरणेन एर मिलील हि! हे मारा सोरा, तू आखाम रीन मोठला बोगवानान भविष्यवक्ता रेही। तू माणहाह केही का ता किहिक तान पापा ने क्षमा प्राप्त केरती! "