28. मालदार जुवान अधिकारी

एक दिह,एक जुवान अधिकारी यीशु फाय आवीन ताह फुस्यो, "हे हाजा गुरु, अनन्त जीवन जुडणेन केरता माहु काय केरणे जुवी?" यीशु ताह केयो, "तू माहु 'हाजो' काहा किथी? फक्त एकुच हाजो हि एने तो बोगवान हि। पुण जर तुवाह अनन्त जीवन जुविह ते बोगवानान व्यवस्थान पालन केर।"

माहु काल्ली आज्ञान पालन केरणेन जरुरी हि? तो फुस्यो। यीशु उत्तर आप्यो, "खून मा किरही। व्यभिचार मा केरही। चोरी मा केरही। झूठ मा बोलही। आपणा आयिक आबाक ने आदर केरजी, एने आपणा पड़ोसी हेरी आपणे हारको प्रेम केरजी।"

पुण जो जुवान एदमी केयो, "मी आत्योच एतोन जी सोब आज्ञान पालन केरतीन आवथु। माहु हमेशा जीवतालु रेणेन केरता एवी भी काय करणे जुवी?" यीशु ता पोर दृष्टि केऱ्यो एने तापोर प्रेम केऱ्यो।

यीशु उत्तर आप्यो, "जर तु खेरो बोनण्यो हि ते जा आपणो आखो वेच दी एने तो धेन गरिबाह वात दी, एने तुवाह स्वर्गाम धेन जुडी। ओवतो आवीन मार पासाण लाग जा।"

जो यीशु केयो तो जुवान एदमी होमल्यो ते तो जुलुम दुखी एय गियो, काहाकाय तो जुलुम मालदार एतो एने तो आपणी आखी सम्पत्तिह आपणे नाह होदतालु। तो फिरीन यीशु फाय रीन जात रेनो।

तेवी यीशु आपणा चेलाह केयो, "बोगवानान राज्यमाय मालदार माणहान जाणेन जुलुम कठीण हि! होव, एक मालदार एदमीन बोगवानान राज्य माय जाणेन तुलना कालाह ऊटळान हुयीन डोचाम रीन निकेल जाणो सोपो हि "

जो यीशु केयो तो जेवी चेला होमल्या ते ता बोंगलाय गिया। ता केया, "जर ओहलो हि ते बोगवान कुणीह वोचाडी?"

यीशु चेलाह देख्यो एने केयो, "माणहान केरता स्वतान उद्धार केरणेन असम्भव हि। पुण बोगवानान केरता कायीच भी केरणेन असम्भव नाह सोथो।"

पतरस यीशुह केयो, "आमु चेला आखो सोडीन तार पोसाण आवाह। आमरो काय ईनाम रेय?"

यीशु उत्तर आप्यो, "आखा जाण जो मार कारण घेर, बाहाक,बोणीक,आबुक,आहाक,सोरा, सम्पत्तिह सोडील हि, तो ताहरीन 100 पट जादा जुडी अनन्त जीवन भी जुडी।पुण जुलुम पेहला हेते ता पासाणल्या एती, एने जुलुम पासाणल्या हेते ता पेहला एती।"