30. यीशु पाच हजार माणहाह खावाडीह

यीशु तान चेलाह पोरचार केरणेन एने माणहाह हिकाडणे जुलुम अलग-अलग गावाम गावाम मोकल्यो। जेवी ता ताहरी आवा यीशु एतो ते ता ताह केयो का ता कायकाय केरीन आवाह। तेवी यीशु ताह दरियान दिहरी उगे ताहेरी जायीन एक शान्त जागे थोळोक वार आराम केरणेन हादयो। ओवता ता नावीपोर चेडीन दरियान दिहरी उगे गिया।

पुण ताहरी जुलुम ओहला माणहे एता जा यीशुह एने तान चेलाह नावीम जाताला देखील एता। ज्या माणहे ताहरीन ओगाण दरियान दिहरी उगे जाणेन दरियान मेरे-मेरे दोवडया। ओवता यीशु एने तान चेला पोच्या ते माणहान एक मोठली गर्दी तान वाट जोवतीन ताहरी पेलूचने एती।

ती गेर्दीम बायकु एने सोरा सोडीन 5,000 से ज्यादा एदमी एता। यीशुह ता माणहा पोर किव आवी। यीशुन केरता ता माणहे बिगेर गोवालान मेंडरा हारका एता। केरीन तो ताह हिकाड्यो एने ता माय जा दुखाऱ्या माणहा एता ताह हाजो केऱ्यो।

दिह्यान आखरी माय, चेलाह यीशु कियो, "अवि वार एय गीयीह एने आसपास माय कोल्लोच हेयर नाह सोथो। न्या माणहाह जाणे दि का न्या जायीन खाणेन काय भी लीन आवती।"

पुण यीशु चेलाह केयो, "तुमुच न्याह खाणेन कायभी आपो!" ता उत्तर आप्या, "आमु काय केरणे? आमु फाय फक्त पाच रोटा एने दुय आत्याच मासा हेते।"

यीशु आपणा चेलाह केयो का ता गेर्दीन माणहाह पन्नास-पन्नास केरीन खेडा पोर बोहणेन किवो।

तेवी यीशु पाच रोटा एने दुय मासा लीन स्वर्गान उखेर देख्यो, एने ता खाणान केरता बोगवानान धन्यवाद देनो।

ओवतो यीशु नरोटा एने मासान टुकडा केऱ्यो। तो माणहाह आपणेन केरता तान चेलाह टुकडा आप्यो। चेला ता माणहाह वाटती रेना, एने तो निवरनोच नाह! ता सोब माणहा पेट बोरीन आखा खादा।

ओवतो, चेला ता खाणाह टोलु केऱ्या जो उगरी जायील एतो एने बारा टोपली बोराय गीयी! तो आखो खाणो ता पाच रोटा एने दुय मासा से आवील एतो।