46. पौलुस मसीही विश्वासी बोणीह

शाऊल नावान एक माणुह एतो जो यीशु पोर विश्वास नाह किरील एतो। तो जुवान एतो, तो स्तिफनुसाह मारनाराह देखील एतो। बाद माय, तो भी विश्वासीह विताडील एतो। तो यरूशलेम माय घेर-घेर जायीन एदमी एने बायकू दुयूह भी जेलीम टाक दियील एतो। तेवी महायाजक शाऊलाह दमिश्क हेयराम जाणेन सूट आप्यो।तो ताहरी वाला मसीहीह देरीन एने ताह वापस यरूशलेम लीन आवणेन केरता शाऊलाह केयो।

ओवतो शाऊल दमिश्क जानणेन यात्रा चालू केऱ्यो।ता हेयराम पोचणेन जारिक पेल,तान चार उखेर वादलाम एक उजालो चोमकनो, एने तो बुयी पोर पोड गियो। शाऊल कुणाह तीभी केतालो होमल्यो, "हे शाऊल! हे शाऊल! तु माहु काहा विताडिह?" शाऊल फुस्यो, "हे प्रभु, तू कुण हि?" यीशु उत्तर आप्यो, "मी यीशु हि। तू तु माहु विताडीह!"

जेवी शाऊल उठणो ते ताह नाह देखातालो। तान हाथी ताह दमिश्क वोर लीन गिया। शाऊल तीन दिह वोर कायच नाह खादो नाह पिदो।

दमिश्क माय हनन्याह नावान एक चेलो एतो।बोगवान ताह केयो, "ता घेराम जा जाहरी शाऊल रोकाय रेनोह।तार आथ तापोर मेलजी का तो पोशो देखणे लागी।" पुण हनन्याह केयो, "हे प्रभु मी होमलील हि तो माणुह विश्वासीह विताडने।"बोगवान ताह उत्तर आप्यो, "जा! मी ताह यहूदि माय एने दिहरी जातीन माणहाम मारा नावान पोरचार केरणेन केरता ताह निवाड लीयील हि। तो मारा नावान केरता जुलुम दुख बोगी।"

ओवतो हनन्याह शाऊल फाय गियो, आपणा आथाह ता पोर मेल्यो, एने केयो, "यीशु, जो न्याहरी आवणेन पेल तुवाह वाटे देखानो,माहु तुवा फाय मोकलील हि का तु पोशो देखणे लागी, एने पवित्र आत्मा तार माय बोराय जाय।" ताहरुच शाऊल पोशो पोशो देखणे लागो, एने हनन्याह ताह बाप्तीस्मा आप्यो। तेवी शाऊल खादो एने पोशो टाटो एय गियो।

तुलबुखे रीन, शाऊल न दमिश्क माय रेणारा यहूदि माय पोरचार केरणेन चालू केर दिनो। तो केयो, "यीशुच बोगवानान सोरो हि!" यहूदी माणहा बोंगलाय जायील एता,काहा काय शाऊल ते विश्वासीह मार टाकतालो, एने एवी तो केतालो का यीशु पोर विश्वास केरू। शाऊल यहूदि माणहा हेरी वात केऱ्यो। तो देखाद्यो का यीशुच मसिह एतो।

जुलुम दिह्या बाद, यहूदि माणहे शाऊलाह मार टाकणेन विचार केरऱ्या। ता ताह मार टाकणेन केरता हेयरान बायणा पोर माणहाह मोकल्या। का ता पोर नजर मेलती पुण शाऊल तान विचारान बारामाय होमेल लेदो,एने तान हाथी ताह वोचीन निकलणेन तान मदत केऱ्या। एक रात ता ताह टोपली माय बोहाडीन हेयरान भीतडा पोर रीन नीचे उतार देना। दमिश्क मायरीन वोचीन निकेलणेन बाद शाऊल यीशुन बारामाय पोरचार केरणेन चालु मेल्यो।

शाऊल प्रेरिताह मिलणेन केरता यरूशलेम गियो,पुण ता ताह बिताला। तेवी बरनबास नावान एक विश्वासी शाऊलाह प्रेरिता फाय लीन गियो। तो ताह केयो का शाऊल किहिक इमुत केरीन दमिश्क माय पोरचार किरील एतो। ता बाद, प्रेरित शाऊलाह स्वीकार केर लेदो।

काहिक विश्वासी जा यरूशलेम मायरीन नाहील एता ता सेटाच अंताकिया हेयराम यीशुन बारामाय पोरचार केरताला। अंताकिया माय रेनारा जादातर यहूदी नाह एता,पुण पेहलीच वार, ता वाला जुलुम माणहा विश्वासी बोण गिया। बरनबास एने शाऊल ता नोवाला विश्वासीह यीशुन बारामाय उंजू हास केरीन हिकाडणेन ताहरी गीया एने कलीसियाह मोजबुत केऱ्या। यीशु पोर विश्वास केरणारा ता पेहली वार अंताकियाच"मसीही" केवाना।

एक दिह, अंताकियान मसीही माणहा उपास एने प्रार्थना केरतालान। पवित्र आत्मा ताह केयो, "मार केरता बरनबास एने शाऊलाह जा कामान केरता अलग केर दिवो जाह केरणेन केरता मी ताह हादील हि।" केरीन अंताकियान कलीसिया बरनबास एने शाऊल केरता प्रार्थना केऱ्या एने ता पोर आपणा आथे मेल्या। तेवी ता ताह दिहरी जागे यीशुन संदेशान पोरचार केरणेन मोकली देना। बरनबास एने शाऊल अलग-अलग जातीन माणहाह हिक आप्या, एने जुलुम माणहा यीशु पोर विश्वास केऱ्या।