1. परमेश्वरो संसार बनाट्रि
ओ ध्याँए ठ्रो मुन्ड़ँरिग बेच़ि परमेश्वरे बत्तै चीज़तु रचना लत्ते। दोई त्रुई ध्याड़ारिंङ संसार ए उई दोऊ अन्दरेग ची-ची तोई बत्तेतु रचना लत्ते। अपेल परमेश्वरे पृथ्वी बनाकते धोपेल पृथ्वी हयांर ए सलजी तोई, छेई कुचे एन्तचे परमेश्वरे दोऊ अन्दरेग छल्ले चीज़ बनाशी मतरे। पर परमेश्वरो रुह तिऊ टोख्ठे किरज़ा तोई।
दियू थल परमेश्वरै कुड़ी, “छ़ाङि शु!” दंङ छ़ांङि शुचै इलि। परमेश्वरै खणी छ़ाङि रुठे तो दांङ दोबि ‘ङींरा’ कुड़ि। दांङ परमेश्वरे ङिराबि हयांर रंग शता लरि, दोबि दोई ‘ञोंखोल’ कुड़ि। परमश्वरे बत्तेधिर बनाट्रिम मुन्डा झा ए छांङि बनाके केते।
संसारो रचनो ङिंराकी थल परमेश्वरे कुड़ि, “तिऊ टोख्ठे इच़ा अन्तर शू।” दांङ इचा अंतर शुचे इलि। परमेश्वरै दु अन्तरबी ‘सर्ग’ कुड़ि।
संसारो रचना लेईमी शुमूमेतिंग परमेश्वरे कुड़ि, “ती बत्ते इच़ा ठाड़िरिंग ठ्रोकन शुबि जुस दांङ कारची ज़मीन तांङफि जुस।” दोइ कारची ज़मीनबी ‘पृथ्वी’ कुड़ि दांङ तीबि ‘समंदर’ कुड़ि। परमेश्वरै खणीं कि चि दोई बणाकते दु रूठे तोई।
दांङ परमेश्वरे कुड़ि, “पृथ्वीरिंग बत्ते पाटि ठ्रो बुट ए शांङ लेपि जुस।” दांङ ध्याएँ शुई। परमेश्वरे खणीं चि दोई बणाकते दु रुठे तोई।
संसारो रचना लेईमी पीमेतिंग परमेश्वरे कुड़ि, “सरगरिंग ज्योतिरे शुबि जुस।” दांङ एके,लच़ङ ए कारज़े प्रकट शुईरे। परमेश्वरै दोतिंङ पृथ्वीरिंग छंङि रन्ड्रिम थल्ज़ी दांङ ङिरा ए ञंयोखोल, मौसम ए वर्षतु बिचांङ भेद लेईमी थल्ज़ि बनाकते। परमेश्वरे खणीं कि दोई चि बनाकते दु रूठे तो।
संसारो रचना लेइमी ङांमेतिंग परमेश्वरे कुड़ी, “शिङि जन्तुरे तीरिंग बिंङे इलईं दांङ सरगरिंङ प्यारे फान्ज़ुईं।” ओ ध्याहँ ठ्रो दोई तिरिंग तैरेक्चच़ाड़ बत्ते जन्तुरे ए प्यारे बनाति। परमेश्वरै खणी कि दी रूठे तो दाङ दोतिंङ आशीष रणी।
संसारो रचना लेइमी त्रुईमेतिंग परमेश्वरे कुड़ी, “धरतिरिंङ बांगज़ाड़ बत्ते पाटिऊ जानवररे शुबि जुस।” परमेश्वरै कुशी ठ्रो ए शूई। मिना जानवररै पालतू तौइरे, मिना वणों ऊई दांङ मिना धरतिरिंग रेंगेकच़ाड़ तोईरे। परमेश्वरे खणी कि दी बत्ते रूठे तोई।
दांङ परमेश्वरै कुड़ी, “आतईं हेन्ज़ि मीबि हेन्दु रुपरिंग ए हेन्दू बराबर बणापोईं। दोई पृथ्वी ए बत्ते जानवरतू ठोख्टे राज लोतो।”
परमेश्वरे शौ लेप्चे दोऊ मी बणाकि केरि दांङ दोउ अन्दरेग जीवनो साग्ग पींङे केरि। दी मीज़ू मिन आदम तोई। परमेश्वरे आदममबि बांगज़िरिंग इचा मोट्टे बगीचा बणाकते दांङ दोऊ टेहल लेइमी थल्ज़ी आदममबि दोर केची केरि।
दु बगीचौ बिचांग परमेश्वरै जुट खास बुट पुंङे केरि- जीवनो बुट ए रुठे ए माज़ीउ ज्ञानो बुट। परमेश्वरै आदममबी कुड़ी कि केई दु बगीचांङ तोचि रुठे ए माज़ी ज्ञानो बुटो अलावा ऊई बत्ते बुटतु फल ज़ेइतरफोन। अगर केई दु रुठे ए माजिऊ ज्ञानो बुटो फल ज़रिना सेत क सीए योन।
दांङ परमेश्वरे कुड़ी, “गंङमिबी इचा बंङज़ि ठीक मा।” पर अरला जानवर आदमो साथी शुबि मरतिरे।
दिऊथल्ज़ि परमेश्वरे आदममबि सरसुत इमरिंग च़रचे केरि। दांङ परमेश्वरे आदमो धुन्ना इच़ा रिश्पा लेप्चे मेच़मीउ रचना लरि, दांङ दोबि आदमो कचंग लेन्ज़ा हाति।
अपेल आदमे दोबि तांङरि दांङ दोई कुड़ी, “दि त ग्यू ठ्रो तो! दांङ परमेश्वरे कुड़ि दि ‘मेच़मी’ कहलापोतो, छेईकुचे दि गांङमिऊ दोरच़ि बणाशी शु।” दि वजहज़ि गांङमि एनो या बाकुतिंग केचे केयोतो दांङ एनो मेच़रंङ इच्च़ा शुचे योतो।
परमेश्वरे गंगमी ए मेच़मीबि एनो रुपरिंग बनाकतु। परमेश्वरे दोकुतिंग आशीष रेएँ कुड़ी, “मास्स काटुरे ए पौत्ररै-परपौत्ररे जेपी ले पृथ्वी पिंङे चरतुशी!” दांङ संसारो रचना लेइमी त्रुईमेतिंग परमेश्वरै खणीं चिधिर दोई बनाकते दोरे बत्ते रुठे तोइरे, दोरे बत्ते खएँ परमेश्वर राजि शुई।
अपेल ङिस्मी ध्याड़ा अन्जा धोपेल चिधिर परमेश्वरे लज़ि लेकि तोई दोई दु बत्ते कम्मरे योचे केरि। परमेश्वरे ङिजमेतिंगकि ध्याड़ाबि आशीष रेईं दांङ दु ध्याड़ाबि पवित्र कुड़ी, छेई कुचे दोथिंग दोई संसारंङ तोचि बत्ते चीज़तु रचना लेई योचे केते। ओ ध्यांह ठ्रो परमेश्वरे संसार ए आई चिधिर दोरिंङ तो दु बत्ते बनाकते।
बाइबलो किताबंज़ी लेप्सी कहानी उत्ति अध्याय 1-2
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।