21. परमश्वरे मसीहज़ु आपिमि वायदा लरि

अपेल परमेश्वरे संसारो रचना लत्ते, दोबि पता तोई कि अपेला दोबि मसीह बी च़रच़ि लेपोतो। दोई आदमे हब्बा रांङ वायदा लत्ते कि दोई ध्यांह लोतो। दोई कुड़ि कि हव्वाज़ु धुन्ना इच़ा वशंजे जन्म लेपोतो आच़ि ओमजो पुन्ज़ाबि काकपोतो। आऊँ ओमजे हव्वाबी धोखा रन्दे दु इच़ा शैतान तोई। परमेश्वरो अर्थ तोई कि मसीहज़ि शैतानबी पूरे ठ्रो हराके केओतो।

परमेश्वरे अब्राहमरांङ वायदा लत्ते कि दोऊ धुन्ना ससांरो बत्ते जातिच़ि आशीष खोक्पोर। परमेश्वर थले अपेला मसीहबि च़रचे दि वायदाबि पूरा लोतो। दु मसीहज़ि ससांरो इच़िच़ जातिबि दोतु पापे छुड़ापोतो।

परमेश्वरे मूसारांग वायदा लत्ते कि भविष्यरिंग दोई मूसाऊ ठ्रो ए इच़ा उई भविष्यवक्ता च़रपोतो। दि भविष्यवक्ता मसीह शोतो। ध्यांह ले, परमेश्वरे ओल्ला वायदा लरि कि दोई मसीह बी च़रपोतो।

परमेश्वरे राजा दाऊदरांङ वायदा लत्ते कि दोऊ इच़ा वशंज मसीह शोतो। दु राजा शोतो दांङ परमेश्वरो मीतु टोख्टे हमेशा राज लोतो।

परमेश्वरे यिर्मयाह भविष्यवक्तारांग साथे गप्पा लरि दांङ दोई कुड़ि कि इच़ा दिन दोई उई खारकोई वायदा लोतो। दु खारकोई वायदा इस्राएलरांग साथे सीनैऊ टोख्टे लसि युई वायदाऊ ठ्रो मशोतो। अपेल दोई मितांग साथे एनो खारकोई वायदा लोतो, दांङ दोई दोतु टोख्टे एनवि व्यक्तिगत रूपरिंग प्रकट लोतो। हर इच़ा मिज़ि दोरांग साथे दा तोओतो दांग दोऊ बनाशी व्यवस्थ़ा बी मनेक्च़िरिंग सेम तोरे। परमेश्वरे कुड़ि कि दि दोऊ व्यवस्थाबी दोतु सेमुंग च़ैऐ केचिम ठ्रो शोतो। दोरे दोऊ मीरे शोरै, दांग परमेश्वरे दोतु पापबी माफ लोतो। दु मसीह शोतो आच़ि दोतांग साथे दु खारकोई वायदा बी छ़ुपोतो।

परमेश्वरो भविष्यवक्ताच़ि दिला कुत्तेर कि मसीह इच़ा भविष्यवक्ता शोतो। इच़ा भविष्यवक्ता दु मि शु आच़ि परमेश्वरो वचनतिंग रेड्रा दांङ दोबि मीतिंग परमेश्वरो उजाबो घोषणा लज़ा। अतिंग च़रच़िम परमेश्वरे वायदा लसि तरे दु मसीह इच़ा सिद्ध भविष्यवक्ता शोतो। दु मसीह परमेश्वरो उजाबतिंग रुठेरांङ रेड्रोतो, दांङ दोई मीतिंग दु उजाबतिंग रुठेरांङ सिखापोतो।

इस्राएलि पुजारीरेच़ि मीतु थल्ज़ि परमेश्वरो तुईच़ि बलि रन्ड्रि जारि तरिरे। दि बलि मीतु पापो थल्जि दोतिंग परमेश्वरो धुन्ना सज़ा रन्ड्रिमी ठाढ़िरिंग चढ़ाशी तोई। पुजारिरेच़ि मीतु थल्ज़ि प्रार्थना ल लत्तेर। पर, दु मसीह सिद्ध मोढे पुजारी शोतो अच़ि परमेश्वरबि रन्ड्रिम थल्ज़ि एनबि चढ़ाके च़रपोतो। दिऊ मतलब, कि दोई अपेल ल पाप मलोतो, दांङ अपेल दोई एनबी बलि शुबिमी थल्ज़ि रमोतो, धोपेल संसारो छिल्ला उई बलिऊ ज़रूरत मशोतो।

मीतु समूहज़ु टोख्टे राजा ए प्रधानच़ी राज लज़ि, दांग अपेला-अपेला दोच़ि गलति लज़ि। राजा दाऊदे जेत्ते इस्राएलितु टोख्टे राज लत्ते, पर राजा दाऊदो वंशज मसीहज़ि पूरा संसारांग राज लोतो, दाङ दोई हमेशो थल्ज़ि राज लोतो। दोऊ अलावा, दोई हमेशा न्याय ले शासन लोतो, दांङ सही फैसलारे लेपोतो।

परमेश्वरो भविष्यवक्ताच़ि मसीह ज़ु पाटि मास्स गप्पारे कुड़िरे। उदाहरणो थल्ज़ि मलाकिज़ि कुड़ि कि मसीहज़ु आपिम तुई इच़ा उई भविष्यवक्ता अपोतो। दु भविष्यवक्ता मास्स खास शोतो। दिऊ अलावा, यशायाह भविष्यवक्ताज़ि च़ेरि कि मसीह इच़ा व्याह मलसिऊ धुन्ना जेपोतो। मीका भविष्यवक्ताज़ि कुत्तो कि मसीहाज़ि बैतलहम नगऱांङ जन्म लेपोतो।

यशायाह भविष्यवक्ताज़ि कुत्तो कि मसीहज़ि गलीलो इलाकारिंग वास लोतो। अऊँ मीरे मास्स दुखी तोतोरे मसीहज़ि दोतिंग शान्ति रमोतो। दोई कैदितिंग ल आज़ाद लोतो। मसीहज़ि टेचि दोतिंग ए आंऊँ मीच़ि रेड्रि मारच़ि, खान्ड्रि मारच़ि, प्रेई मारच़ि, ए जोई मारचाड़रेतिंग बत्तेतिंग ठीक लोतो।

यशायाह भविष्यवक्ताज़ि दिला कुत्ते कि मीच़ि मसीहरांङ साथे नफरत लोरे दांग दोबि अपनाच़िरिंग न ले च़रपोर। उई भविष्यवक्ताच़ि कुत्तेर कि दोऊ इच़ा साथी दोऊ खिलाफ आच़तो। जकर्याह भविष्यवक्ताज़ि कुत्ते कि दोऊ दि साथी ध्याँह लेईरिंग मूलु ङिज़ो सा टंग्गा लेपोतो। दिऊ अलावा, मिना भविष्यवक्ताच़ि कुड़िरे कि मीच़ि मसीहबी सचे केओर, आई दांग दोऊ खामज़े तु थल्ज़ि जुआ योज़ोर।

भविष्यवक्ताच़ि दिला कुत्तेर कि मसीह छना सिओतो। यशायाहज़ि भविष्यवाणी लरि कि मीच़ि मसीह ज़ु टोख्टे थू लोरे, दोऊ मज़ाक उड़ापोरे, दांग दोबि तेंङमोरे। दोच़ि दोऊ गुड़ ए कोन्ज़ा प्रैग ए टाके केओरे दांङ दु मास्स टेशी ए बारदोरिंग सीए योतो, हलांकि दोई छिल्ला गलत लसि मशोतो।

भविष्यवक्ताच़ि दिला कुत्तेर कि मसीहज़ि पाप मलोतो। दु सिद्ध शोतो। पर दु दिऊथल्ज़ि सिओतो परमेश्‍वरे दोबि उई मीतु पापो थल्ज़ि सज़ा रमोतो। दोऊ सिए थल्ल मीरे परमेश्वररांग साथे जुड़ेक्पि तरफोरे। दोऊ थल्ज़ि परमेश्वरे जुन्दि कि मसीह सिओतो।

भविष्यवक्ताच़ि दिल्ला कन्जेतेर कि परमेश्वरे मसीहबी सीऊ धुन्ना शिंगबि लोतो। दिरांग दि पता लेपा कि दि बत्ते खारकोई वाचाबि बाधंक्चिमी परमेश्वरो योजना तोई, छेईकुचे दोई दु मीतिंग बचाच़ि तरफोतो आऊ मीच़ि दोऊ खिलाफ पाप लत्तेर।

परमेश्वरे भविष्यवक्तातिंग मसीहो पाटिरिंग मास्स गप्पारे प्रकट लरि। पर मसीह दु भविष्यवक्तातु अत्तुला शिंङि शुत्तर मादि। दि भविष्यवाणी रेतु रैंए केट्रिमि पिरा बेच़ि ल मास्स वर्षो थल्ल, सही वक्तरिंग परमेश्वरे मसीहबि दि संसाराङ च़रपोतो।