20. इस्राएलबि गुलाम बनाके शिन्ज़ि ए याच़ि

इस्राएल ए यहूदाऊ राज्य जुल्लाकुई परमेश्वरो खिलाफ पाप लेईरे। दोच़ि दु वाचाबि थ्वाके केतेरे आऊं परमेश्वरे दोतांग साथे सीनैरिंग लत्ते। परमेश्वरे दोतिंग पश्चाताप लज़ि ए ओल्ला दोऊ अराधना लज़िरिंग चेतावनी रन्ड्रिरिंग भविष्यवक्तातिंङ च़रचतो, पर दोच़ि दोऊ गप्पा मनेक्च़िरिंगज़ि न ले केतोर।

दांग परमेश्वरे दोतु दुशमनतिंग दोतु नाश लेईरिंग तारछि ले जुल्ला राज्यकुतिंग सजा रेईं। अश्शूर इच़ा उई देश तोई आंऊ मास्स ए शक्तिशाली शुचे इन्जि तोई। दोरे उई देशो थल्ज़ि दया मे तोईरे। दोच़ि आन्जे इस्ऱाएल राज्यो नाश ले केईरे। अश्शूरियों रेच़ि अन्जे एस्रराएल राज्यरिंगज़ि मास्सतिंग साचे केरिरे, चि जुन्दिरे दु लुटेके केरिरे, आइ देशो मास्स हिस्सा रोचि केरिरे।

अश्शूरियोंरेच़ि बत्ते प्रधानरे, सेठरे, आई दुछो मीतिंग अच़ि कीमती चीज़रे बनाचि तरछि तोईरे दोतिंग छ्रोक्कन ले अश्शूर देशांग लेन्ज़ा शिलिरे। इस्राएलांग मिना गरीब मीरे जेत्ते केशा इन्देर।

दांग अश्शूरी मीच़ि दु देशांग बांगज़िमि थल्ज़ि विदेशीतिंग लेन्ज़ा हातिरे। दु व़िदेशीरेच़ि दु नगरबि यच़ा बनातिरे। आऊं एस्राएलिरे दोरतिग केश्तेरे दोतांग दोच़ि व्याह लरिरे। दि मीतु वशंजतिंग सामरी कुड़िरे।

यहूदाज़ु राज्यो मीच़ि तांङतेर कि छना परमश्वरे दोऊ टोख्टे विश्वास मलज़ि ए दोऊ गप्पा ममनेक्च़िम वजहज़ि इस्राएलो मीतिंग सज़ा रन्दे। पर ताला दोच़ि कनानिरेतु मूर्तितु उपासना लेईरे। परमेश्वरे दोतिंग चेतावनी रन्ड्रिमि थल्ज़ि भविष्यवक्तातिंङ च़रति, पर दोच़ि रेड्रिरिंग न ले केरिरे।

क्योमे रामि वर्षो थल अश्शूरियोंच़ि इस्राएलो राज्यऊ नाश ले केरिरे। परमेश्वरे बेबिलोनो राजा, नबूकदनेस्सरबी यहूदाऊ राज्यरिंग हमला लज़िरिंग च़रचतु। बेबीलोन इच़ा शक्तिशाली देश तोई। यहूदाऊ राजा नबूकदनेस्सरो दास बनेक्पि ए दोबि हर साल मास्स ढबा रन्ड्रिम थल्ज़ि राजि शुचे इन्जा।

पर मिना सालो थल, यहूदाज़ु राजाज़ि बेबीलोनो खिलाफ बलवा लरि। दांग बेबिलोनीच़ि यच़्च़ा अन्जे यहूदाऊ राज्यरिंग हमला ले केरिरे। दोच़ि येरुशेलम नगरांग कब्ज़ा ले केरिरे, मन्दिरबि तबाह ले केरिरे, दांग नगरे मन्दिरो खज़ाना कूज़ा लेन्ज़ा शिलिरे।

बलवा लेईमी वजहज़ि यहूदाज़ु राजाबि सज़ा रन्ड्रिमि थल्ज़ि, नबूकदनस्सरो सेनाच़ि राजाओ योबि दोऊ तांग्शि साचे केरिरे दाङ दोबि कांणें ले केरिरे। दोऊ थल दोच़ि राजाबि लेन्ज़ा शिलिरे, ताकि दु तहखानांग सिए योतो।

नबूकदनेस्सर ए दोऊ सेनाच़ि यहूदा राज्यज़ु लगभग बत्ते मीतिंग बेबीलोन लेन्ज़ा शिलिरे, बबे गरीब मीतिंग थल्का केचे केरिरे छेई कुचे दोच़ि रीरेतिंग फसल एओर। समयऊ दि काल बी बधूंआई कुईरे छेई परमेश्वरो मीतिंग वयदो देशांगज़ि हुन्ज़िरिंग विवश लत्तेर।

परमेश्वरे एनतु मीतिंग दोतु पापो थल्ज़ि दोतिंग गुलामिरिंग शिन्जे सज़ा रन्दो, तांला दु दोतिंग ए एनो वायदारेतिंग पेशा मतोई। परमेश्वरे एनतु मीतु निगरानी लजि जारी त्येतो दांञ एनो भविष्यवक्तातु धुन्ना दोतांग गप्पा लेई जारि तयेतो। दोई वायदा लरि कि शुमञिंज़ो सा सालो थल, दोरे ओल्ला वायदाज़ु देशांग याच़ोर।

लगभग शुम्मञिंज़ो सा सालो थल, फारसो राजा कुस्रूज़ि बेबीलोनबि यारचतु, दोऊ थल्ज़ि बेबीलोनो साम्राज्यज़ु अलावा फारसो साम्राज्यज़ि उई देशो टोखटे राज लरि। इस्राएलि मीतिंग द यहूदी कुचा तोईरे। दोतु बिचंग मास्स मीच़ि एनतु पूरा जीवन बेबिलोनांङ बिताके केरिरे। यांग्शि यहूदी रेतिंग जेत्ते यहूदाज़ु देश हिद तोई।

फारसी मीरे मास्स तारछि तोईरे, पर दोच़ि एनतु ड्राक्शि मीतु टोख्टे दया लत्तेर। फारसी मीतु रज़ा बनेक्पिमि थोड़े ध्याड़ो थल, कुस्रुज़ि आदेश रेईं कि अच़िए यहूदिज़ि यहूदा याच़िम तत्तु दु फारसांगज़ि हुच़ा यहूदा इबि तरफोतो। देर तचे कि दोई दोतिंग मन्दिरबी ओल्ला बनाचिम थल्ज़ि ढब़ा ल रेईं। दांग गुलामिऊ शुम्ञिंज़ो सा सालो थल, ट्रोल्नार यहूदिरे यहूदारिंग यरूशेलम नगरो आखा यच़ा इलिरे।

अपेल दोरे येरूशेलम पिचतोरे दांङ दोच़ि मन्दिरे नगरो फेरे भीतिबि ओल्ला बनातिरे। फारसी मीच़ि आत्तला दोतु टोख्टे शासन लज़तेर पर इच़ा फेरा यच़ा दोरे वायदाऊ देशरिंग बांग्ज़ि लेकि ए मन्दिरांग अराधना लज़ि लेकि तोईरे।