19. परमेश्वरो च़रसी भविष्य कुचाड़

परमेश्वरे हमेशा इस्राएलितु कचांग भविष्यकुट्राड़तिंग च़रपा लज़ि तोई। भविष्यवक्ताच़ि परमेश्वरो धुन्ना उजाब रेड्रि तोई दांङ दु मीतिंग कन्ड्रि तोई।

अपेल अहाब इस्राएल राज्यरिंग राजा तोई दापेल एलिय्याह भविष्यवक्ता तोई। अहाब इच़ा माजि मी तोई। दोई हापसि बाल देवताऊ पूजा लेईमि थल्ज़ि मीतिंग मजबूर लत्ते। दोऊ थल्ज़ि एलिय्याहज़ि अहाबरांग कुत्तु कि परमेश्वरे दु मीतिंग सज़ा रन्ड्रि इबि लेकि तो। दोई दोतिंग कुत्तो कि, “अपेल तचे गे ओल्ला सन्दाड़ शुबिमि थल्ज़ि मकोग धोपेल तचे इस्ऱाएलो राज्यरिंग न सन्दाड़ शोतो न बिल शोतो।” दि गप्पाज़ि अहाबबी धों रोष चारि कि दोई एल्लियाहबि सचे केचिम फैसला लरि।

दोऊ थल्ज़ि परमेश्वरे एलिय्याहबि कुड़ि कि दु अहाबरांगज़ि ब्याके जंगलांग अच़ा इला। एलिय्याह जंगलांग दु सोतेऊ कचरिंग इन्जा आंर इबिम थल्ज़ि परमेश्वरे दोबि कन्जते। रोज़ मुन्जे ए ञंयोखोल, प्यारेच़ि एलिय्याहज़ु थल्ज़ि रोटी ए शा लेन्ज़ा हापि तोई। दि बत्ते वक्तरिंग, अहाब ए दोऊ सेनाच़ि एलिय्याहबि पेप्पा लातेरे, पर दोबि पेचि मारतिरे।

सन्दाड़ मशुबे मिना वक्तो थल दु झरना कारचे इन्जा। दोऊ थल्ज़ि एलिय्याह च़ाम्बेउ इच़ा देशांग अच़ा इन्जा। दु देशांग इच़ा गरीब विधवा तोई आतु इच़ा यो तोई। दोतु कचरिंग बगत लगभग योसा इन्जि तोई छेईकुचे दोर छल्ले फसल शुचि मतोई। पर तां ल, दु मेच़मि एलिय्याहज़ु देखभाल लरि, दोऊ थल्ज़ि परमेश्वरे दु ए दोऊ योज़ु ज़रूरततिंग पूरा लरि, दि वजहज़ि दोऊ फुकानो नन्न ए दोऊ तेलो कूपि अफेल्ला खाली मशुई। दि पूरा अकालो बिचांग दोकुतु दोर ज़ेईरिंग बागत तोई। एलिय्याह मिना वर्ष तचे दोर तोई।

शुम्मु ए रेई वर्षो थल, परमेश्वरे अलिय्याहरांग कुड़ि कि दोई ओल्ला सन्दाड़ लोतो। दोई एलिय्याहरांग वापिस इस्‍राएलो राज्यरिंग इन्जे अहाबरांग गप्पा लज़िरिंग कुत्तो। दोऊ थल्ज़ि एलिय्याह अहाबो कचरिंग इन्जा। दांग अहाब ए दोबि तांञे कुत्तो, “अच्छा क शुन्ना, मुसीबत पैदा लज़ाड़!” एलिय्याहज़ि जवाब रेईं, “मुसीबत पैदा लज़ाड़ क शुन्ना! केई यहोबाबि छोड़ेके केतन। दु ए सच्चा परमेश्वर शु, पर केई बाल देवताबि मनेक्च़ि लेकि तोतोन। द कनिंग इस्राएल राज्यज़ु बत्ते मीतिंग कर्मेल गोरिंग लेन्ज़ा अपि लेपोतो।”

द बत्ते मीरे कर्मेल गो आखा इलिरे। दु गांग्मिरे ल आतिरे अच़ि कुचा तोईरे कि दोरे बाल देवतो उजाब कुट्राड़ शुरे। दिरे बाल देवताऊ भविष्यवक्तारे तोईरे। दोरे बत्ते पिरा ज़ु टोखटे ङिन्ज़ो सा तोईरे। एलिय्याहज़ि मीतांग कुत्तो, “अपेल तचे केच़ि केन्दु सेमबी भटकाके तोईं? अगर यहोबा परमेश्वर शु सेत दोऊ पूजा लाईं! अगर बाल परमेश्वर शु सेत दोऊ उपासना लाईं।”

दोपेल एलिय्याहज़ि बाल देवताऊ भविष्यवक्तातंड़ कुड़ि, “इच़ा बाँङबी बलि रैं दोऊ शाबि बलिदानो थल्ज़ि इच़ा वेदिऊ टोखटे केईं, पर मेंह थफारतुईं। दोऊ थल गे ल ध्वांह ए लोगा। इच़ा शता वेदिरिंग गे दु शाबि क्योग। दांग अगर परमेश्वरे बेदिऊ टोख्टे मे थदि सेत केच़ि ङेओईं कि दु सचे परमेश्वर शु।” धोपेल बाल देवताऊ भविष्यवक्ताच़ि इच़ा बलि तैयार लत्तोर पर मै म फरतुरे।

दांग बाल देवताऊ भविष्यवक्ताच़ि बाल देवतारांग प्रार्थना लेईरे, “हे बाल देवता, ङेतु रेजु!” पूरा दिन दोच़ि प्रार्थना लैईरे, हाउशेक्तिरे आई देरतचे कि एनतिंग चक्कूज़ि ट्रिके केरिरे। पर बाले जवाब ल म रेईं, मै ल म थदि।

बाल देवताऊ भविष्यवक्ताच़ि बाल देवताऊ प्रार्थना लेईरिंग क्योमेद-क्योमेद पूरा ध्याड़ा च़रचे केरिरे। थल्ल मुकरिंग दोचि प्रार्थना लेई ब्याड़ा ले केरिरे। दांग एलिय्याहज़ि आईसांग बांङु शाबि परमेश्वरो बेदिऊ टोखटे केचे केतु। दोऊ थल, दोई मीतिंग तीज़ु मोट्टे नान्देतिंग दु बलिदानो टोखटे धोपेल तचे लाक्च़िरिंग कुड़ि अपेल तचे कि शा, सिंङ, देरतचे कि वेदिऊ फेरे कि धरती पूरे आलेग शुचे मेलि।

दांग एलिय्याहज़ि प्रार्थना लरि, “हे यहोवा, अब्राहम, इसहाके, याकूबो परमेश्वर, ङेतिंग कन्डु कि क इस्राएलो परमेश्वर शुना आई दिला कि गै कनु दास शुगा। गिबि जवाब रोऊँ ताकि दीच़ि ङेयोर कि क ए सचे परमेश्वर शुना।”

धोत्तरे, सर्गांञ ज़ि मे ददि दांग दोई शा, सिंञ, चट्टान, शो, देर तचे कि दोई वेदिऊ कचरिंग ती बी ल रोचे केरि। अपेल मी च़ि दि तांगरिरे, दोच़ि धरति रिंग दचे कुड़िरे, “यहोवा ए परमेश्वर शु! यहोवा ए परमेश्वर शु!”

दांग एलिय्याह ज़ि कुड़ि, “बालो इच़ा ल भविष्य कुचाड़ बचेके इबि मेस!” दोऊ थल्ज़ि मी च़ि बालो भविष्यवक्तातिंग च़ुमे केरिरे दांग दोतिंग शता शिन्‍जे साचे केरिरे।

दांग एलिय्याहज़ि अहाब राजारांग कुड़ि, “युरकुचे केनो चुंञ पोख्शे इला, छेईकुचे सन्दाड़ शुबिमि तो।” युरने डु रोकि शुचे आति, दांग मास्स सन्दाड़ च़ुक्सा इलि। यहोबाज़ि दु कारचिऊ अकालबी योच़ि लेकि तोई। दिरांग साथे दि पता लेका कि यहोवा ए सच्चे परमेश्वर शु।

अपेल एलिय्याहज़ि एनो कम्म योचे केरि, दांग परमेश्वरै एलीशा मिनदांग इच़ा गांग्मिबि एनो भविष्य कुट्राड़ चुनेक्ति। परमेश्वरे एलीशाउ धुन्ना मास्स चमत्कार लरि। इच़ा चमत्कार नामानरांग शुई। दु इच़ा दुशमनो सेनाऊ सरदार तोई, पर दोबि चमड़िऊ इच़ा जाक्ख बिमारी शुचे इन्जि तोई। नामाने एलीशाऊ बारेरिंग थसि तरे, दोऊ थल्ज़ि दु एलीशाऊ कचरिंग आति दांग दोरांग दोबि ठीक लज़िरिंग कुत्तो। एलीशाज़ी नामानबी कुड़ि कि यरदन बेन्डिऊ तीरिंग ङिज फेरा डुबकी लगातु।

नामान रोशेक्सा इलि। दोई ध्यांह लज़िरिंग न ले केरि, छेई कुचे दोबि दि कम्म मूर्खता च़टे काम च़ेसि तोई। पर थले दोई एनो सेम लेके केरि दांग इन्जे यरदन बेन्डिंग ङिज फेरा डुबकी रन्दो। अपेल थल्लमुक्को फेरा दु तीरिंगज़ि धाक्तिका हुच़िरि सेत परमेश्वरे दोबि ठीक ले केरि।

परमेश्वरे इस्राएलो मीतु कचांग उई ल मास्स भविष्यवक्तारे च़रति। दोचि बत्तेच़ि मूर्तितु उपासना लेई बन्द लज़िरिंग कुड़िरे। दिऊ भोन्दे, दोतिंग एनतु बिचांग न्यायरांग साथे व्यवहारे दया लज़ि जुस। दु भविष्यवक्ताच़ि मीतिंग चेतावनी रेईंरे कि दोतिंग माजि काम लज़ि बन्द लज़ि जुस दिऊ भोन्दे परमेश्वरो गप्पा ज़ु पालन लाईं। अगर दोच़ि ध्यांह म लेईरे सेत परमेश्वरे दोतिंग दोषी मनेके दोतु न्याय लोतो, दांग दोतिंग सज़ा रमोतो।

मास्स फेरा, दु मी च़ि परमेश्वरो आज्ञा ममनिक्तिरे। मास्स फेरा दोच़ि भविष्यवक्तांङ साथे माजि व्यवहार लरिरे देर तचे कि अपेला-अपेला दोतिंग सचे केत्तेर। इच़ा फेरा यिर्मयाह भविष्‍य कुचाड़बि कारचि कुँओ अन्दरेग केचे केरिरे दांग दोबि सीरिंग थल्ज़ि केचे केरिरे। दु कूँआज़ू तड़ारिंग गाररिंग धसेके इन्जा। दांग दोपेल राजाबि दोऊ टोख्टे दया अति दांग दोई एनो सैनिकतिंग आदेश रेईं कि यिर्मयाहज़ु सिबिम बे तुई दोबि धाक्तिका हुन्ज़े च़रतुईं।

भविष्यवक्ताच़ि परमेश्वरो तरफे कुचि जारि तरिरे मी च़ि दोतांग नफरत लेईरे। दोच़ि मीतिंग चेतावनी रेईंरे कि अगर दोच़ि पश्चाताप मलेईरे सेत परमेश्वरे दोतु नाश लोतो। दोच़ि मीतिंग दि ल हिद करातिरे कि परमेश्वरे दोतु कच़ांग मसीह बी च़रच़िम वायदा लसि ततु।