18. इस्राएलो जुट हिस्सारिंग फाज़ि

दाऊद रज़ाज़ि ञिंन्ज़ामि साल तचे राज लत्ते। दोऊ थल दु सिए इलि, दांग दोऊ यो सुलैमाने इस्राराएलांग राज लज़ि च़ुक्ति। परमेश्वरे सुलेमान रांग गप्पा लरि दांग दोबि रुक्ति कि दोई बबै मास्स चि जुन्ज़िम ततु कि परमेश्वरे दोऊ थल्ज़ि पूरा लोतो। सुलैमाने परमेश्वरबी पेड़ि कि दोई दोबि मास्स दिमागी बनाके च़रतु। दि गप्पाज़ि परमेश्वरबी राजि ले केरि, दोऊ थल्ज़ि परमेश्वरे सलैमानबी संसारो बत्ते बे बुदधिमान गांग्मि बनाके च़रति। सुलैमान ए मास्स गप्पा रे सीखेकसरि दांग दु इच़ा मस्स बुद्धि च़टे राजा बनेके इन्जा। परमेश्वरे दोबि मास्स ढाबो ब्राक बनाके च़रति।

येरूशलेमांग सुलैमाने दु मन्दिरबी बनाकतु छोऊ थल्ज़ि दोऊ बाज़ि सोचेक्सि तरे ए समान कट्ठा लसि तरे। द मीरे मिलापो तम्बुंग इबिम भोन्दे मन्दिरांग परमश्वरो आराधना ए बलि चढाचि तोईरे। परमेश्वर मन्दिरांग अन्जे एनो मीतु बिचांग बांगज़ि तोई।

पर सलैमाने उई देशो मेच़मीतांग प्रेम लरि। दोई मास्स, लगभग 1000 मेच़मि तांग साथे ब्याह ले परमेश्वरो अपमान लरि! दीतु बिचांगज़ि मास्स मेच़मिरे उई देशांगज़ि अन्देर दांग एनतांग साथे एनतु सादेतिंग हातिरे दांग दोतिंग मेनेक्पा लरिरे। द सुलैमान यांग्शे इलि द दोई ल दोतु सादबि मनेक्च़ि च़ुक्ति।

दि वजहज़ि परमेश्वर सलैमानरांग रोशेक्सा तोई। दोई कुड़ि कि दोई इस्राएल देशबी जुट राज्यरिंग फाज़ि ले दोबि सज़ा रमोतो। दोई सुलैमानो सिए थल ध्याँह लोतो।

सलैमानो सिए थल, दोऊ यो रहबाम राजा बनेका। इस्राएल देशो बत्ते मीरे दोबि राजाओ रूपरिंग मनेक्च़िमि थल्ज़ि इच़ा नम ठ्रोक्कन शुईरे। दोच़ि रहबामरांग शिकायत लेईरे कि सुलैमाने दोतु दोरच़ि मास्स खरे काम लज़ि लत्ते दांङ मास्स कर लेप्च़ते। दोच़ि रहबामरांग शबस लरिरे कि दोतु धुन्ना थोड़े कम करातुईं।

पर रहबामे दोतिंग मास्से मूर्खता रांग जवाब रेईं, “केच़ि कुचतईं कि ग्यु बा ज़ि केतिंग मास्स काम कराति। पर गै कैतु धुन्आ दोबे ल मास्स काम करापोग, दांग गै केतिंग दुबे ला मास्स तंग लोग्ग।”

अपेल मीच़ि दोबि ध्यांह कुचि थश्तोर दोतु बिचांगज़ि मास्स मीच़ि दोऊ विरूद्ध बिरोध लरिरे। सा जातच़ि दोबि छोड़ेके करिरे। दोरांग साथे द जुटे जात बचेक्ति। दि जुट जात च़ि एनकुतिंग यहूदा ज़ु राज्य कुड़िकु।

बचेकि सा जातच़ि यारोबाम मिनदांग इच़ा गांग्मिबी एनतु राजा बनाके चरतिरे। दि जात रे देशो उत्तर-पूर्वो हिस्सारिंग तोईरे। दोच़ि एनतिंग इस्राएलो राज्य कुईरे।

पर यरोबामे परमेश्वरो खिलाफ विरोद्ध लरि दांग मीतु धुन्ना पाप लज़ि लत्तो। दोई एनो मितु धुन्ना पूजा लेईमि थल्ज़ि जुट मूर्ति बनाकतु। दोरे द यहूदाज़ु राज्य येरूशेलमांग परमेश्वरो अराधना लेई मेलिरे।

यहूदा ए इस्राएलो राज्य दुशमन बनेके इलिरे। दांग घड़ी-घड़ि एनतु बिचांग लड़ेक्पा लेईरे।

इस्राएलो खारकोई राज्यरिंग, बत्ते रजारे दुष्ट तोईरे। दीतु बिचांगज़ि मास्स राजारे राजा बनेक्पिमि इच्छा तच़ारे उई इस्राएलितु गुड़च़ि सिए इलिरे।

इस्राएलो राज्यरिंग बत्ते राजा ए मास्स मीच़ि मुर्तिज़ु पूजा लेइरे। अपेल दोचि झां लेईरे। दांग दोरे तेईया फेरा वेशया तांग फेटे शुईरे। देर तचे कि दोचि तैईया फेरा कटु तु ल बलि रेईंरे।

यहूदा राज्यज़ु राजा, दाऊदो वंशो तोई। दि राजातु बिचांगज़ि रेई रुठे मीरे ल तोईरे अच़ि न्याय रांग साथे राज लत्तेर ए परमेश्वरो पूजा लत्तेर। पर यहूदाज़ु मास्स राजारे माजि तोईरे। दोच़ि माजि ढंग रांग शासन लेईरे, ए मूर्ति तु पूजा लरिरे। दैर तचे कि दोतु बिचांगज़ि रेई राजाच़ि हापसि देवतातु तुईच़ि एनतु कटुतिंगल बलि ले केरिरे। यहूदाऊ मास्स मीच़िला परमेश्वरो विरूदध बलवा ले उई देवतातु पूजा लरिरे।