17. दाऊद रांग साथे परमेश्वरो वायदा

शाऊल इस्राइलो मुन्डा राजा तोई। दु लम्मे ए साल्ठे तोई, छना दोच़ि जुन्जतरे च़ोप्पन ध्वाँए। इस्राइलांग एनो शासनो मुन्डा सालरिंग शाऊल इच़ा रूठे रज़ा तोई। पर थले दु इच़ा माजि मी बनेके इलि अचि परमेश्वरो गप्पाबि ममनेक्ति, दोऊ थल्ज़ि परमेश्वरे इच़ा उई मीबि बीणेंक्तो आंऊ दु इच़ा ध्याड़ा दोऊ ठाढ़िरिंग राजा बनेक्पतो।

परमेश्वरे दाऊद मिनदांग इच़ा बाड़े इस्राएलि गांग्मिबि बीणेके इच़ा ध्याड़ा शाऊलो ठाड़िरिंग राजा शुबिम थल्ज़ि तैयार लेई च़ुके केतु। दाऊद बैतलहम नगरो इच़ा पोहाल तोई। कई मोक्कारिंग, दाऊदे थर ए ओमो जुल्लाकुतिंग साचे केते छेई कुचे दाऊदो बा ज़ु त्रैईंरे रुन्ड्रतर दोतु टोख्टे दोच़ि हमला लत्तेर। दाऊद इच़ा लिहाजी ए धर्मी मी तोई। दोई परमेश्वरो टोख्टे भरोसा लरि दांग दोऊ गप्पा मनेक्ति।

अपेल दाऊद अत बाड़े गांग्मी तोई, दोई लामे-चौड़े गोलियतो खिलाफ लड़ाई लरि। गोलियत इच़ा मास्से रुठे सैनिक तोई। दु मास्स तकड़ा ए लगभग शुमु मीटर लामे तोई। पर परमेश्वरे गोलियत बी साच़िमि ए इस्राएल बी बचाच़िम थल्ज़ि दाऊदो मदद लरि। दिऊ थल दाऊद इस्राएलो दुशमन तांग मास्स फेरा ड्राक्ति। दाऊद इच़ा मोढ़े सैनिक बनेके इलि, दांग दोई मास्स युद्धरिंग इस्राइलो सेनातु अगुवाई लरि। मीच़ि दोऊ मास्स तारीफ लेईरे।

मीच़ि दाऊदरांग धोण दा लरिरे कि शाऊलबी दोरांग साथे जेगदांग शुई। शाऊले दोबि साच़िमि तरे, दोऊ थल्ज़ि दाऊद दोरांग ए दोऊ सैनिक तांग ब्याक्पिम थल्ज़ि जंगलांग पोख्शे इलि। इच़ा ध्याड़ा, अपेल शाऊले दोऊ सैनिकरे दाऊदबी पेट्रि लेकि तोईरे दांग शाऊल इच़ा फुक्टु अनदरेग इन्जा। दि दु ए फुक तोई आंरतिग दाऊद ब्याकि तोई, पर शाऊले दोबि मतांगरि। दाऊद शाऊलो थलेच़ि दोऊ मास्स च़म्बे अच़ा इन्जा दांग दोऊ खामरिंग ज़ि इच़ा खान्नि चिके केरि। थले, अपेल शाऊल दु फुक्टुंगज़ि हुन्ज़िरि दाऊदे दोऊ खाम्म ज़ु खान्नि कान्डि। दि तरीकाज़ि, शाऊले ञेंए केरि कि दाऊदे राजा बनेक्पिमि थल्ज़ि दोबि सच़िरिंगज़ि इंकार ले केतु।

मिना ध्याड़ो थल, शाऊल युद्धरिंग सिए इन्ज़ा, दांग दाऊद इस्राएलो रज़ा बनेके इन्जा। दु इच़ा रुठे रज़ा तोई, मीच़ि ला दोरांग साथे दा तरिरे। परमेश्वरे दाऊदबी आशीष रेईं आई दोबि सफल बनाति। दाऊदे मास्स लड़ाई लड़ेक्ति, दांग परमेश्वरे इस्राएलो दुशमनतिंग यारच़िम थल्ज़ि दोऊ मदद लरि। दाऊदे येरुशेलम नगरबि जीतेके दोबि एनो राजधानी बनाति, आंर दु बांगज़रि ए शासन लरि। दाऊद ञिंन्ज़ामि वर्ष तचे राजा तोई। दि मोक्को बिचांग, इस्राइल तारछि ए सेठ बनेके इन्दे।

दाऊदे इच़ा मन्दिर बनाट्रिम तरे आंर बत्ते इस्राएलीच़ि परमेश्वरो पूजा लज़ि ए दोबि बलि चढ़ाच़ि तरफोर। क्योमे पिरा साल बेचि, दोच़ि मूसाज़ु बनाशी मिलापो तम्बूरिंग परमेश्वरो अराधना लज़ि लेकि तोईरे आई दोऊ थल्ज़ि बलि चढ़ाच़ि लेकि तोईरे।

पर दोर नातान मिन दांग इच़ा भविष्य कुचाड़ तोई। परमेश्वरे दोबि दाऊदबी दि कुचि च़रच़तु “कि केई मास्स लड़ाई लड़ेक्तन, दोऊ थल्जि केई ग्यु थल्ज़ि दि मन्दिर म बनापोन। कां यो ज़ि दि बनापोतो। तां ल, गै कनिंग आर्शीवाद रमोगा। कनु इच़ा वशंज हमेशो थल्ज़ि ग्यु मीतु टोख्टे रज्ज़ा बनेके राज लोतो।” हमेशौ थल्ज़ि राज लज़ाड़ दु दाउदो इच़े वशंज मसीह तोई। मसीह परमेश्वरो चुनेक्सी मी तोई आच़ि स़ंसारो मितिंग दोतु पापरिंगज़ि बचापोतो।

अपेल दाऊदे नातानो उजाब रेड्रिरि दोई परमेश्वरो धन्यवाद ले दोऊ प्रार्थना लरि। परमेश्वरे दोऊ मान बढ़ाचिए दोबि मास्स आशीष रन्ड्रि लेकि तोई। दाऊदबि पता मतोई कि पमेश्वरे दि अपेल लोतो। दि वक्तरिंग हेन्ज़ि ञेंईं कि इस्राएलीतिंग इच़ा लामे वक्त तचे, क्योमे- क्योमे 1000 वर्ष तचे मसीह ज़ु आपिमि थल्ज़ि रुमज़ि लेपोतो।

दाऊदे तेईया वर्ष तचे रूठे रांग शासन लत्ते। दोई मास्से इमानदारी रांग परमेश्वरो गप्पा बी मनेक्ते दांग परमेश्वरे दोबि आशीष रन्दे। हालांकि एनो उम्रो अंतरिंग दोई परमेश्वरो खिलाफ बेद आन्जि पाप लरि।

इच़ा झा दाऊदे एनो महलांगज़ि धाक्तिका खणीं दांग दोर इच़ा साल्ठे मेच़मी बी सुज़तर खणीं, दोई दोबि मसेच़ि तोई। पर दोई पता ले केरि कि दोऊ मिन बतशेबा तोई।

एनो नज़र फेरेक्च़िमी भोन्दे, दाऊदे दोबि एनो कचरिंग हापिमि थल्ज़ि आतिंङा च़रचतु। दु दोरांग साथे फेटे शुई दांग दोबि वापस च़रचे केरि। मिना ध्याड़ो थल बतशेबा ज़ि दि कुचे उजाब च़रचतु कि दु खोग्टांग तो।

बतशेबा ज़ु गाक्सा उरियाह मिनदांग इच़ा मी तोई। दु दाऊदो बत्ते बे रूठे सैनिकतु बिचांग इच़ा सैनिक तोई। दु मोक्का दु युद्ध लज़ि धाक्तिका इन्जि तोई। दाऊदे ऊरिय्याह बि युद्धांग ज़ि वापस बुलाकै एनो मेच़ा रांग बागंज़िम थल्ज़ि कुत्तो। पर उई सैनिकरे युद्धांग तोईरे दोऊ थल्ज़ि उरिय्याह ज़ि चुंखा इबिरिंग मना ले केरि। दांग दाऊदे उरिय्याह बि वापिस युदधरिंग च़रचतु, दांग दोई सेनापति रांग दोबि दु ठाड़िरिंग केट्रिरिंग कुत्तो आंर दुशमन बत्ते बे तकड़ा शोतो ताकि दु दोर सिए योतो। दांग ध्याहंए शुई कि ऊरिय्याह युद्धरिगं सिए इलि।

ऊरिय्याह ज़ु यद्धांग सिए थल दाऊदे बतशेबा रांग ब्याह ले केरि। थले दोई दाऊदो यो बी जेपि लरि। दाऊदे चि लत्ते दोरांग साथे परमेश्वर मास्स रोशेक्सा तोई, दिऊ थल्ज़ि दोई नातान इच़ा भविष्य कन्जाड़ बी दाऊद बी दि कान्ड्रिम थल्ज़ि च़रचतो कि दोऊ पाप अयों झाक तोई। दाऊदे एनो पापो पश्चाताप लत्तो दांग परमेश्वरे दोबि माफ ले केतु। एनो बचेकि जीवनांग, एनो खरे मोक्कारिंग ला दाऊद परमेश्वरो थले-थले जोया ए दोऊ गप्पा बी मनेक्तो।

पर दाऊदो कटु सिए इन्जा। ध्यांह ले परमेश्वरे दाऊदबी सज़ा रन्दो। दिऊ अलावा, दाऊदो सीमि तचे, दोऊ एनौ टावरो रेई मीच़ि दोऊ खिलाफ लड़ाई लेईरे, दांग दाऊदो एनो बल थोड़े शुचे इन्दे। पर परमेश्वर विश्वासो जोगे तोई दांङ दोई आत्तला दु ए लत्ते आंऊ दोई दाऊद रांग लज़िमि वादा लत्ते कि दोई लोतो, हांलाकि दाऊदे दोऊ आज्ञाबि ममनेकते। थले दाऊदे बतशेबा ज़ु आईच़ा ऊई कटु शुई, दांग दोकुई दोऊ मिन सुलेमान केरिकु।