16. छुड़ाच़ारे

यहोशूज़ु सिए थल इस्राएलिरेच़ि परमश्वरो आज्ञा ममनेक्तिरे। दोच़ि परमेश्वरो नियमो पालन मलरिरे, दांग दोच़ि दु वाचाओ देशांगज़ि बचेकि कनानिरेतिंग धाक्तिका महुतिर। इस्राएलिरेच़ि एनतु सच्चे परमेश्वर, यहोवाबि छोड़ेके कनानिरेतु देवतातिंग मनेक्च़ि च़ुके केरिरे। इस्राएलिरेतु कचरिंग अरला राजा मतोई, दोऊ थल्ज़ि आतिंग चि रुठे अति दोच़ि दुए लरि।

परमेश्वरो आज्ञा ममनेके इस्राएलिरेच़ि इच़ा नियम शुरु लेइरे छेबि दोच़ि मास्स फेरा दोहराकतेर। दि नियम ध्याहं छो चलेका: मिना वर्ष तचे इस्राएलीरेच़ि परमेश्वरो आज्ञा ममनेक्पोर, दांग दोई दोतिंग दोतु दुश्‍मनतु दोरच़ि यारज़ि ले सज़ा रमोतो। दि दुश्मनच़ि इस्राएलिरेतु च़ीज़रे लूटेके च़रपोर, दोतु जागारे नष्ट ले च़रपोरे, आई दोतु बिचांगज़ि मास्स मी सचे च़रपोर। दांग अपेल इस्राएलिरेतु दुश्मनच़ि दोतु टोख्टे मास्स वर्ष तचे ज़ुल्म लोर, दोऊ थल इस्राएली रेच़ि एनतु पापो पश्च़ाताप लोरे आई परमेश्वरबी दोतिंग बचाच़िम थल्ज़ि प्रार्थना लोरे।

घड़ि-घड़ि इस्राएलीच़ि पश्चाताप लोरे दांग परमेश्वरे दोतिंग बचापोतो। परमेश्वरे दोतिंग छुड़ाच़ाड़ो मुके ध्यांह लोतो- इच़ा ध्यांह ठ्रो मी अरि दोतु दुश्मनतांग लड़ेक्पोतो ए दोतिंग यारपोतो। दोपेल देशांग शान्ति शोतो दांग दु छुड़ाचाड़े दोतु टोखटे रुठे ले राज लोतो। परमेश्वरे दोतिंग छुड़ाच़िम थल्ज़ि मास्स छुड़ाच़ारे च़रचतु। परमेश्वरे कचरिंग ए इच़ा दुश्मन जात, मिधानियोंतु धुन्ना इस्राएलिरेतिंग यारचे ओल्ला ध्यांह लरि।

मिधानिरेच़ि ङिज वर्ष तचे इस्राएलिरेतु फसलतिंग लुटेकतिर। इस्राएलि मिरे मास्स बेय इन्देर, दांङ दोरे फुक्टेतुंग ब्याके इलिरे ताकि मिधानि मीच़ि दोतिंग पेट्रि मरतुरे। थल्ल मुकरिंग, दोतिंग बचाच़िम थल्ज़ि दोच़ि परमेश्वरबि हाग रेईंरे।

गिदोन मिन्दांग इच़ा इस्राएली गांग्मि तोई। इच़ा ध्याड़ा, दु इच़ा गुप्त ठाड़िरिंग छवा कुटेक्च़ि लेकि तोई ताकि मधानीरेच़ि दोबि कूज़ी मरपोरे। यहोवा ज़ु स्वर्गदूते गिदोनो कचरिंग अन्जे दोबि कुत्तो, “हे बहादुर योद्धा, परमेश्वर करांग साथे तो। इला दांग इस्राएलि रेतिंग मिद्यनितु धुन्ना बचातु।”

गिदोनो बा ज़ु कचरिंग मूर्तिबि शेलसि इच़ा वेदि तोई। बब्बे मुन्डु गप्‍पा आंऊ परमेश्वरे गिदोनबि लज़िरिंग कुत्ते दु दुसांग वेदिबि थाक्च़ि तोई। पर गिदोन मीतांग बेई तोई, दोऊ थल्ज़ि दोई रात शुबिमी थल्ज़ि रुमज़िरि। दांग दोई दु वेदि बी थक्शे खान्नि खान्नि ले केरि। दोई परमश्वरो थल्ज़ि इच़ा नया वेदि बनाति दांग दोऊ टोख्टे परमेश्वरबि बलि चढ़ाति।

ओईरांग मुन्जे मिच़ि खणींरे कि अच़िया वेदि बि थाक्शे खान्नि खन्नि ले केशि तो, दिऊ थल्ज़ि दोतिंग मास्स रोष अति। दोरे गिदोनबि सचे केट्रिम थल्ज़ि दोऊ चुंञ इलिरे, पर गिदोनो बा ज़ि कुड़ि, “केच़ि चिल केतु देवतातु मदद लेईमि कोशिश लज़ि लेकि तोतोईं? अगर दु देवता शु सेत दोबि एनो रक्षा एनबि लज़ि राईं!” छेई कुचे दोई ध्यांह कुड़ि दोऊ थल्ज़ि मीच़ि गिदोन बी मसदिरे।

दोऊ थल्ल इस्राएलिरेतिंग लुटेक्चिम थल्ज़ि मिधानि मीरे ओल्ला अतिरे। दोरे धों मस्स तोईरे कि दोतिंग मिक्च़ि ल तरछ़िम मतोई। गिदोने दोतांग लड़ेक्पिम थल्ज़ि इस्राएलीतिंञ इच़ा साथे बुलाकतु। गिदोने परमेश्वरो धुन्ना जुट सुन्नाह पेढ़ि ताकि दोबि विश्वास शुचे योतो कि परमेश्वरे हेल्ले दोबि इस्राएलितिंग बचाच़िम थल्ज़ि कुट्रि लेकि तो।

मुन्डो सुन्नाऊ थल्ज़ि, गिदोने त्रैईंऊ च़ाम्मबि धरतिऊ टोख्टे केचे परमेश्वरबी कुड़ि कि मुन्जेऊ बिल धरतिऊ टोख्टे मपड़ेकि दु त्रैईंऊ बोट्रो टोख्टे जेत्ते पड़ेक्पि जुस। परमेश्वरे ध्यांह ए लरि। ओईराग ञंयोखोल, दोई परमेश्वरांग कुड़ि कि धरति आलेग शुचे इबि जुस पर त्रेईंऊ बोट्रा कारचि केचि जुस। परमेश्वरे ध्यांह ल लरि। दि जुट सुन्नाह ज़ु कारण गिदौने विश्वास लरि कि परमेश्वरे हेल्ले जुन्ज़ा कि दोई इस्राएलिरेतिंग मिधानिरेतांग बचापोतो।

दोऊ थल गिदोने सैनिकतिंग एनो कचरिंग बुलाकतु दांग 32,000 गांग्मी रे अतिरे। पर परमेश्वरे दोरांग कुड़ि कि दिरे मास्स तोतोरे। दांग गिदोने दोरे बत्ते 22,000 तिंग वापस यचे केतु आऊं दोरे लड़ेक्पिरिंग बेई तोईरे। परमेश्वरे गिदोनरांग कुड़ि कि दि गांग्मिरे आत ल मास्स तोईरे। दिऊ थल्ज़ि गिदोने 300 सैनिकतिंग केचे दु बत्तेतिंग चुंखा च़रचे केरि।

दु रात परमेश्वरे गिदोनरांग कुड़ि कि, “मिधानिरेतु तम्बुरिंग इला दांग दोतिंग गप्पा लत्तर रेड्रु। अपेल केई रेड्रोन कि दोच़ि चि गप्पा लज़तोर दांग क दोतु टोखटे हमला लेईरिंग म बेओन।” दिऊ थल्ज़ि दु रात, गिदोन योंखा दोतु तम्बुरिंग इन्जा दांग दोई इच़ा मिधानि सैनिकबि एनो मित्र बी दु गप्पा कान्ड्रतर रेड्रिरि आंउ दोई माङरिंग तांगते। दु मिऊ मित्रे कुडि, “दि माञं ज़ु अर्थ शु कि गिदोनो सेनाज़ि हेन्नरे यारच़े चरपोरे!” अपेल गिदोने दि थज़ि दांग दोई परमेश्वरो प्रार्थना लरि।

दोऊ थल्ल गिदोन एनो सैनिकतु कचरिंग याच़री आई इच़ा-इच़ा बि रणशिंग, इच़ा शो ज़ु नन, इच़ा मशाल रणीं। दोच़ि दोतु तम्बूरेतिंग घेरेके च़रच़तोरे आंरतिक मेधानी सैनिकरे फेटे शुचि तोईरे। गिदोनो 300 सैनिकच़ि एनतु मशालरे नान्देच़ि काप्शि तरिरे दिऊ थल्ज़ि मिधानि मीच़ि दु मशालो छांञिबि खान्ड्रि मारतिरे।

दोऊ थल्ल गिदौनो बत्ते सैनिकच़ि एनतु नन्दे इच़े घड़िरिंग थाक्शे अचानके मशालो मे बि कान्डिरे। दोच़ि एनतु रणशिंगरे कुल्डिरे दांग जयकारा रड़िंरे, “यहोवाऊ हाखा गिदोनो तलवार!”

परमेश्वरे मिधानिरेतिंग पज़ल ले केरि, दिऊ थल्ज़ि दोरे एनतु बिचांग तेंगज़िए ट्रिक्सि लेकि तोईरे। दोथरे, गिदोने एनो उजाब रन्जाड़ रेतिंग इस्राइलितु कचरिंग मिधानितु पीछा लज़िम थल्ज़ि दोतु मदद लेईमि थल्ज़ि बुलाति दोच़ि दोतु बिचांग ज़ि मास्स तिंग साचे केरिरे आई बाकितु पीछा ले दोतिंग इस्राएलो देशांग ज़ि हुन्जे च़रतिरे। दु ध्याड़ा 1,20,000 मिधानिरे सिए इलिरे। ओ ध्यांह छो परमेश्वरे इस्राएलबि बचाति।

दु मीच़ि गिदोन बि एनतु राजा बनाचिम तरिरे, पर गिदोने दोतिंग ध्यांह लज़ि मरेईं, पर दोई दोतु दोरच़ि दु ज़ागंज़ु गहनारे पेड़ि आऊं दोतु बिचांग ज़ि इच़ि-इच़िच़े मिधानियोतु दोरचि लुटेकतेर। दोच़ि गिदोनबि मास्स ज़ांग रणिंरे।

दांग गिदोने दु ज़ांगज़ि इच़ा खास खाम्म बनाकतु छना कि मोड़े पुजारी लेच़ा तोईरे। पर मीच़ि दोबि मनेक्च़ि च़ुके केरिरे जां मनांग कि दु इचा मूर्ति शु। दांग परमेश्वरे यच़ा इस्राएलबि सज़ा रणीं छेई कुचे दोच़ि मूर्तिबि मनेक्तेर। परमेश्‍वरे दोतु दुशमनतिंग दोतिंग यारच़िम थल्ज़ि तरछि लरि। थल्लमुकरिंग दोच़ि यच़ा परमश्वरो दोरच़ि मदद लेईरिंग पार्थना लेईरे, दांग परमेश्वरे दोतु कचरिंग इच़ा उई छुड़ाच़ाड़बि च़रति।

दि ए गप्पा मास्स फेरा घटेक्ति: इस्राएलो मी च़ि पाप लोरे, परमेश्वरे दोतिंग सज़ा रमोतो, दोच़ि पश्चाताप लोरे,दांग परमेश्वरे दोतिंग छुडाच़िम थल्ज़ि आतिंञा च़रपोतो। मास्स साल तचे, परमेश्वरे तेईया छुड़ाच़ाड़रेतिंग च़रचतु। आच़ि इस्राएलिरेतिंग दोतु दुश्मनतु धुन्ना बचाति।

थल्ल मुकरिंग, दु मीच़ि उई देशो ठ्रो परमश्वरो धुन्ना एनतु थल्ज़ि इच़ा राजाऊ मांग लेईरे। दोच़ि इच़ा ध्यांह छो राजा पचेतेर आरि लामे ए शक्तिशाली शोतो, आच़ि युदधरिंग दोतिंग आम्म कान्ड्रि तरफोतो। परमेश्वरबि दि गप्पा पसन्द मादि, पर परमेश्वरे दोतिंग धुवां छो राजा रन्दु छना दोच़ि पेश़ी तरेरे।