15. वायदा ज़ु देश

थल्ल मुकरिगं, दा दु ध्याड़ा अच़ा अति अपेल इस्राइलो मीरॆ दु प्रतिज्ञा ज़ु देश, कनानॊ तोंखा योरे। दु देशांग इच़ा यरीहो मिनदांग नगर तोई। दोऊ रक्षाऊ थल्ज़ि दोर पीला तरफे पक्का भीतिरे तोईरे। यहोशू ज़ि दु नगरांग जुट भेदि कु च़रति। दु नगरांग राहाब मिन दांग इच़ा लांग्ज़ाड़ मेच़मि(वेश्या) तोई। दोई दु भेदितिंग बचाकतु, दांग थले दोई दोकुतिंग दु नगरांगज़ि बचेके हुच़ि रिंग मदद लत्तु। दोई ध्यांह लत्तु छेरिंग कुचे दोई परमेश्वरो टोखटे विशवास लज़ा तोई। आऊं घड़ी इस्राइलो मी च़ि यरीहो नगरो नाश लोरे दोपेल दोच़ि राहाब ए दोऊ टाबरो रक्षा लेईमि प्रतिज्ञा लत्तेर।

इस्राएलो मीतिंग प्रतिज्ञाओ देशांग इबिमि थल्ज़ि यरदन बेन्डि राप्शिमि तोई। परमेश्वरे यहोशू रांग कुत्तो, “याजकतिंग तुई इबि राईं।” आपेल याजकच़ि यरदन बेन्डिंग कोन्ज़ा केरिरे तिऊ धारा बहेक्पि बन्द शुचे इलि, छेई कुचे इस्राएलि मीरे बेन्डिऊ नुरे कारचि धरतिऊ टोखटे इबि तरफोरे।

दु मीतु यरदन बेन्डि पार ले थल परमेश्वरे यहोशू रागं कुत्तो कि यरीहो टोखटे हमला लेईरिंग तैयार तोईं, छेईकुचे दु इच़ा मास्स पक्का नगर तोई। परमेश्वरे दु मीतांग कुत्तो कि दोतु याजक ए दोऊ सैनिकतिंग त्रुई ध्याड़ा तचे दु नगरो फेरे किरज़ि लेपोतो। दांग याजकच़ि ए सैनारेच़ि ध्वांए लेईरे।

दांग ञिंज मेतिंग, एस्राएलिरेच़ि दु नगरो फेरे ञिंज फेरा उई किरज़िरे। दोतु नगरो फेरे ञिंज फेरा किरज़ा थल, याजकच़ि रणशिंग कुलिरे दांग सैनिकच़ि जयकारा रेईंरे।

ङिजफेरा कोरो रैंए थल्ल यरीहो ज़ु फेरे भीति दचे इलि। छना परमेश्वरे आदेश रन्दे इस्राएलिरेच़ि नगरो हर चीज़ बि तबाह ले केरिरे। दोच़ि राहाब ए दोऊ टाबर तिंग जेत्ते केचे केरिरे, दांग दोरे इस्राएलीतागं साथे शुचे इलिरे। अपेल कनानंग बांगज़ाड़ उई मी च़ि ल थज़िरे कि इस्राइलीरेच़ि यरीहोबि तबाह ले केरिरे दांग दोरे बए इलिरे कि इस्राएलीच़ि दोतु टोखटे ला हमला लोरे।

परमेश्वरे इस्राएलितिंग आज्ञा रन्दे कि कनानंग बंगज़ाड़ आँऊ ला जाति रांग साथे शान्तिउ थल्ज़ि समझौता थलाईं। पर गिबोनियों मिनदांग इच़ा कनानि जातिज़ि यहोशुरांग हापसि कुड़ि कि दु कनान बेच़ि ओई तारे इच़ा ठाड़िरिंग बंगज़ाड़ शु। दोच़ि यहोशु रांग दोतांग साथे शान्तिऊ समझौता लेइरिंग थल्ज़ि ज़ी लत्तोर। यहोशू ए उई इस्राएली प्रधानरेच़ि परमेश्वरबी मरुक्तिरे कि दोतिंग चि लज़ि जुस। दोऊ भोन्दे, दोच़ि गिबोनिरेतांग शान्तिऊ समझौता ले केरिरे।

शुमु ध्याड़ो थल, इस्राएलीतिंग पता लेति कि गिबोनी मीरे कनानंग ए बांगज़ा तोइरे। दोरे रोशेक्सा इलिरे छेईकुचे गिबोनिरेच़ि दोतिंग धोखा रन्देर। पर दोच़ि दोतांग साथे लसि शान्तिऊ समझौता बि ध्वाँए तरिरे छेई कुचे दु परमेश्वरो तुईच़ि लतेर। दांग मिना ध्याड़ो थल कनानंग बांगज़ाड़ इच़ा उई जाति, एमोरियों ज़ु रज़ारे च़ि थज़िरे कि गिबोनियों रेच़िइस्राएलितांग साथे शान्तिऊ समझौता ले केतोर, दोऊ थल्ज़ि दोच़ि एनतु सेनातिंग इच़ा ले इच़ा मास्स मोढ़े सेना बनातिरे दांग गिबोनो टोखठे हमला ले केरिरे। गिबोनिरेच़ि दोतु मदद लेइमि थल्ज़ि यहोशू कचरिंग उजाब च़रतिरे।

दागं यहोशूज़ि इस्राएलितु सेनाबी ठ्रोक्कन ले गिबोनियों तु कचांग पिपिम थल्ज़ि दोरे पूरा रात जोरिरे। मुन्जे सारके दोच़ि एमोरियोंतु सेनाओ टोखटे हमला ले दोतिंग छ़ज़ि ले केरिरे।

दोथिंग परमेश्वर इस्राएलितु थल्ज़ि लड़ेका। दोई मोरियों तिंग बेइ ले केरि दोई मास्स मोढ़े-मोढ़े शरू थचे एमोरि तिंग साचे केरि।

परमेश्वरे ऐके बी ला सर्गांग इच़ा ठाड़िरिंग चचे केरि छोऊ थल्ज़ि इस्राएलितिंग एमोरिरेतिंग पूरे तरह हराच़िम थल्ज़ि कश्शी समय खोकसतो। दोथिंग,परमश्वरे इस्रएली तु थल्ज़ि इच़ मोढ़े जीत लेप्ति।

अपेल परमेश्वरे दु सेनातिंग हराति दोऊ थल, मास्स कनानि जातो मीरे इस्राएलो टोखटे हमला लेईमि थल्ज़ि कट्ठा शुईरे। यहोशू ए इस्राएलिरेच़ि हमला ले दोतु सर्वनाश ले केरिरे।

दि युद्धो थल, परमेश्वरे इस्राएलो इच़-इच़ जात बी प्रतिज्ञा ज़ु दु देशांग दोतु हिस्सा रेईं। दांग परमेश्वरे इस्राएल बी दोतु बत्ते सीमातिंग शान्ति रणी।

अपेल यहोशु यांग्शे इलि दोई इस्राएलो बत्ते मीतिंग इच़ा साथे बुलाति। दांग यहोशुज़ि दु मीतिंग हिद कराति कि दोच़ि दु वाचा बी मनेक्च़िमी वायदा लत्तेर आऊँ परमेशवरे दोतांग साथे सीनै गोरिंग लत्ते। दु मीच़ि परमेश्वरबी विश्वास लज़िमि ए दोऊ व्यवस्थाबि मनेक्च़िम कसम लेईरे।