14. इस्राएली मीतु जंगलंग भटकेक्पी

इस्राइलितिंग बत्ते नियमतिंग कन्जे थल्ल परमेश्वरे सीनै गोज़ु तूखा दोतिंग अम्म कन्जतो। परमेश्वरे दोतिंग वायदो देशांग शिन्ज़िमि तरे। छेबि कनान देश कुट्रा तोईरे। परमेश्वर डु ज़ु थम्म बनेके दोतु तुईच़ि-तुईच़ि जोरि, दांग दोरे दोऊ थल-थल जोईरे।

परमेश्वरे अब्राहम, इसहाके याकूबरांग वायदा लत्ते कि दोई दु वायदाज़ु देश दोतु वंशजतिंग रमोतो, पर एन्थेग दोरतिग मस्स जातिरे बंगज़ि लेकि तोइरे। दोतिंग कनानी कुचि तोई। दि कनानि मीरेच़ि परमेश्वरो पूजा मलज़ि तोई आई दोऊ हुकुम ला ममनेक्च़ि तोई दोच़ि हपसी देवतातिंग मनेक्च़िए उई मस्स माजि कम लज़ि तोई।

परमेश्वरे इस्राएलिरेतांग कुत्तो, “अपेल केरे दु वाचाज़ु देशांग योईं दोरतिगकि बत्ते कनानिरेतुंगज़ि छुटकारा लेपचे च़रतुईं। दोतांग साथे सुलह थलाईं दोतांग ब्याह ला थलाईं। केतिंग दोतु बत्ते मूर्तितिंग खत्म लेई लेपोतो। अगर केच़ि ग्यु भाशे मलरईं सेत, केच़ि ग्यु भोन्दे दोतु देवतातु पूजा लज़ि शुरू लोईं।”

आपेल इस्राएलीरे कनानो सीमारिंग पिचतोर, मूसाज़ि इस्राएलिरे तु इच़ा-इच़ा जातो धुना इच़ा-इच़ा ले 12 गांग्मितिंग चुनेक्तो। दोई दोतिंग इन्जे दु देश चिछो तोदा दु भेद लेप्च़िमि हुकुम रन्दो। दोतिंग दु कनानी रेतु ल भेद लेप्च़िमि तोई कि दोरे तकड़ा तोतोरे आ कमज़ोर तोतोरे।

दु 12 गांग्मिच़ि पूरा कनानो दुन्ना शुचे ञिंन्ज़ामि ध्याड़ो यात्रा लज़ा वापस अच़ा आतिरे। दोच़ि मीतिंग कान्जतोर कि, “दु देश मास्स उपजाऊ ए मास्स फसल तो!” पर सा भेदिरेच़ि कुड़िरे, “दोतु नगर मास्स ताकतवर तो आई दु मीरे लम्बे- चौड़े तोतोर। अगर हेन्ज़ि दोतु टोखटे हमला लरेईं सेत, दोच़ि पक्का हेन्दिंग यारचे क्योरे दांग हेन्दिंग सचे क्योरे।”

धोत्तरे कालेब यहोशू ए उई जुट भेदि कुई कुड़िकु, “दि हेल्ले शु कि कनानो मीरे लामे ए तगड़ा तोतोर, पर हेन्ज़ि दोतिंग यारचि तरछ़ि! परमेश्वर हेन्दु थल्ज़ि लड़ेक्पोतो।”

पर मीच़ि कालेब ए यहोशू ज़ु म रेड्रिरे। दोच़ि मूसाए हारूनो टोखटे रोष ले कुड़िरे, “केच़ि ञेतिंग दि बेद आन्जि ठाढ़ि रिंग चिल लेन्ज़ा अन्दईं? हेन्दिंग मिस्रांग ए बांगज़ि जूंशी तोई। अगर हेन्दरे दु देशांग इलिंईं सेत हेन्दरे लड़ाई रिंग सीए योईं,दांग कनानो मी च़ि हेन्दु मेच़ा काटुतिंग गुलाम बनाके केयोरे।” दु मी च़ि दोतिंग यच़ा मिस्रो आखा शिन्जमि थल्ज़ि इच़ा उई प्रधान बी चुनेक्च़िम तरेर।

अपेल दु मीच़ि ध्याँ कुड़िरे दंग परमेश्वरबी मस्स रोश अच़ा अति। परमेश्वरे मिलापो तम्बुंग अन्जे कुड़ि, “केच़ि ग्यु खिलाफ बगावत लत्तईं, दोऊ थल्ज़ि द केतिंग दि वणंग भटकेक्पि लेपोतो। हर इच़ा मी आँउ दु ञिंज़ा सालो तो या दुबेच़ि मोड़े उमरो तो दोर सी योतो दगं अपेल ला दु देशांग अपि मरपोतो अऊँ गे केतिंग रन्जतेग। कालेब ए यहोशू झेत्ते दोऊ अन्दरेग आपोकू।”

अपेल मीच़ि परमेश्वरबी ध्याँ कुट्रि रेड्रिरे, दंग दोरे दुखी शुईरे छेई कुचे दोच़ि पाप लत्तेर। दोऊ थल्ज़ि दोच़ि कनानो मीतु टोख्टे हमला लेईमि फैसला लरिरे। मूसाज़ि दोतिंग मेबिमि चेतावनी रणी छेई कुचे परमेश्वर दोतांग साथे मतोई, पर दोच़ि दोऊ मरेड्रिरे।

परमेश्वर दि लड़ाईरिंग दोतांग साथे मेजते, दु वजहज़ि कनानिरेच़ि दोतिंग यारचि केरिरे दंग दोतु बिचांगज़ि मास्स मीतिंग साचे केरिरे। दंग इस्राएलो मीरे कनानंगज़ि वापिस यच़ा इलिरे। तूखा निन्ज़ामि वर्ष तचि, दोरे वणंग देखा-नोखा भटकेक्पोरे।

इस्राएली मीतू निन्ज़ामि साल तचे वणगं भटकेक्पिमि धोपेल, परमेश्वरे दोतु ज़रूरतबी पूरा लत्तु। दोई दोतिंग स्वर्गांगज़ि “मन्ना” कुचे रोटी रणी। दोई बटेर मिनदांग प्यारेतु झुण्ड ला दोतु कचांग च़रति ताकि दोतिंग ज़ेईमि थल्ज़ि शा शोतो। दु पूरा समय परमेश्वरे दोतु खम-मेश दुआक्पीरिंगज़ि बचाकी त्यते।

देर तच्चे कि परमेश्वरे दोतु तुंग्विमि थल्‍ज़ि चमत्कारो ठ्रो गोच़ो धुन्ना ती हुन्जतु। पर दि बत्ते धिर ले थल ला इस्राएलिरेच़ि परमेश्वर ऐ मूसा ज़ु खिलाफ शिकायत ए कुड़कुड़ाच़ि च़ुक्तिरे। तां ल परमेश्वर विशवासो जोगे तोई। दोई अब्राहम, इसहाके, याकूब रांग साथे दोतु वशंतु थल्ज़ि चि लेइमि कसम लत्ते दोई दु ले केरि।

इच़ा उई वक्त अपेल दोतु दोर तुंगबिमि थल्ज़ि ती मतोई, परमेश्वरे मूसा बि कुड़ि, “बेरांग गप्पा लोऊ, “दांग दोरतिगच़ि ती हुच़ोतो”। पर मूसाज़ि बे रांग गप्पा मलतो। ध्वां मले दोई बे बी डंडा ज़ी जुट फेरा गा केत्तु। जाँ ले दोई परमेश्वरो अनादर ले च़रचतु। बत्तेतु थल्ज़ि बेरिंगज़ि तुंगबिरिंग ती त हुन्ज़ा आति, पर परमेश्वर मूसारांग रोशेक्सा इलि। दोई कुत्तो, “छेईकुचे केई जाँ लत्तन, दोऊ थल्ज़ि क वायदाज़ु देशागं इबि मारपोन।”

अपेल इस्राएलो मीरे ञिन्ज़ा साल बणंग यन्जे इन्जि तोइरे, दांग अच़ि परमेश्वरो खिलाफ बगावत लत्तेर दोरे बत्ते सिए इन्दोर। दांग परमेश्वरे दोतिंग यच़ा दु प्रतिज्ञा ज़ु देशो किनारे तचे शिन्दो। द मूसा मस्स यांग्शे इन्जि तोई, दोऊ थल्ज़ि परमेश्वरे मीतु अगुवाई लेईमी थल्ज़ि यहोशुबि दोऊ मदद लेईमि थल्जि चुनेकतु। परमेश्वरे मूसा रांग दि प्रतिज्ञा ल लत्तु कि इच़ा ध्याड़ा दोई दोतु कचरिंग मूसाऊ छो ए इच़ा भविश्य कन्जाड़ च़रचतो।

दागं परमेश्वरे मूसा बी इच़ा गो ज़ु पुन्ज़ारिंग इबिरिंग कुत्तो छेई कुचे दोबि प्रतिज्ञा ज़ु देश तांगफि जुस। मूसाज़ि दु प्रतिज्ञा ज़ु देश तांग्तु पर परमेश्वरे दोबि दोर इबि मरेईं। दागं मूसा सिए इलि, इस्राएलिच़ि ञिज़ो सा ध्याड़ा तचे दुख मनाक्तोर। यहोशू दोतु खारकोई आमकन्जाड बनेके इन्जा। यहोशु इच़ा रुठे प्रधान तोई। छेई कुचे दोई परमेश्वरो टोखटे विशवास ए दोऊ गप्पा मनेक्ति।