13. इस्रराइल रांग साथे परमेश्वरो वायदा

इस्राएलिरेतिंग शेई समुद्रो नुरे शिन्जे थल, परमेश्वरे दोतिंग जंगलो बिचे सीनै कुचे गो आखा लेन्ज़ा इलि। दि दू ए गो तोई आँर मूसाज़ी रोशि लेकि झाड़ी तांङते। दोच़ि दु गो पोयांग एनतु तम्बु लगातिरे।

परमेश्वरे मूसा ए इस्राइलो बत्ते मीतांग कुड़ि, “केतिंग हमेशा ग्यु गप्पा मनेक्च़ि लेपोतो। अगर केच़ि ग्यु आज्ञा मनेक्पोई, आई ग्यु वाचाउ पालन लोईं त बत्तेतु बिचांगज़ि केरे ग्यु इनामो रूपरिंग कीमती धन शोईं।” आई केरे ग्यु नज़रांग पुजारीतु राज्य ए इच़ा पवित्र जात शोईं।”

परमेश्वरबी एनतु कचरिंग हापिमि थलज़ि मीच़ि शुमु झा तचि एनतिंग तैयार लत्तेर। दांग परमेश्वर सीनै गो पुन्जारिंग योंखा तांक्सिरि। आपेल दु अन्जा भूकम्प शुई, बिजली चमकेति, टु शुई, रणशिंग ज़ु ज़ोर- ज़ोरे चाला शुई। दांग मूसा एना गो पुन्ज़ारिंग लोक्सिरि।

"दांग परमेश्वरे मीतांग साथे इच़ा वाचा छ़ुदि। दोई, “कुत्तु गै केतु परमेश्वर, यहोवा शुगा। गै ए शुगा आच़ि केतिंग मिस्रो दास पणे छुड़ाक्ते। उई अरिया देवता थ मनेक्तुईयों।"

“न मूर्ति बनातुईं, न दोतिंग मनेक्तुईं, छेईकुचे गे, यहोवा, केतु इच़े परमेश्वर शुगा। गलत तरीकाज़ि ग्यू मिनज़ी काम थलाईं। शनिवार सब्तो ध्याड़ाबि पवित्र मनेकच़िम थल्ज़ि हिद ताईं कित त्रुई ध्याड़ारिंग केन्दु बत्ते काम्म लाईं, दांग ङिसमी ध्याड़ा केतु थल्ज़ि आराम लेईमिए गिबि हिद लेईमी ध्याड़ा शोतो।”

“केन्दु या बा तु आदर लाईं। हत्या थलाईं। मेच़ा या गाक्सो अलावा उई अतांग ल सम्बन्ध थ बनातुईं। चोरी थलाईं। केन्दु पड़ोसीतु मेच़ाबि, दोऊ घरबा, या दोऊ छिल्ळा समान बी लेप्च़िमि इच्छा थलाईं।”

परमेश्वरे दोतिंग चि नियम रन्दे दोरे दोऊ पालन लज़िरिंग तैयार शुईरे। दोरै परमेश्वरो मी शुबिमी ए दोऊ पूजा लेईमी थल्ज़ि ल तैयार शुईरे।

परमेश्वरे इस्राइली तिंग इच़ा मास्स मोढ़े मिलाप लज़िमि तम्बु बनाचिरिंग कुढि। दोई दोतिंग रुठे रांग कान्जतु कि दु तम्बु बि छना बनाचि, दोऊ अन्दरेग चि -चि चीज़रे केचिम शु। दोई दोतिंग दु तम्बू बी जुट कमरा रिंग फाच़िमि थल्ज़ि इच़ा मास्स मोढ़े पर्दा बनाचि रिंग कुढ़ि। परमेश्वर दु पर्दो थलेच़ि कमरांग आपतो दांग दोर बांग्ज़तो। आँर परमेश्वर तोई दु कमरांग इबिमि अनुमति इच़ा मोढ़े प्रधानबि तोई।

दु मीतिंग मिलापो तम्बू तुईच़ि इच़ा वेदी बनाचि लेपोतो। आच़ि ए परमेश्वरो बनाशी तरीका ममनेक्ति, दोई दु वेदिरिंग इच़ा जानवरबी हापतो। दांग याजके दोबि परमेश्वरो थल्ज़ि बलिऊ रूपरिगं रोपोतो। परमेश्वरे कुड़ि कि दु जानवरो शुई दु मी ज़ु पाप बि प्याके केयोतो। ध्यांह ले थल्ल परमेश्वरे दा दु पाप बी मा खम्बोतो। दु मी परमेश्वरो नज़ररिंग “शुद्ध” शोतो। परमेश्वरे मूसा ज़ु भाई हारूने, हारूनो वंशजतिंग एनो प्रधान शुबिमी थल्ज़ि चुनेकतु।

दांग परमेश्वरे दि आज्ञातिंग राग्गटु जुट पन्ज़ो टोख्टे च़ेए मूसाबि रेंए केतु। परमेश्वरे पालन लेईमि थल्ज़ि मीतिंग ऊई ला मास्स तरीका रन्दू। अगर मीच़ि दु तरीकारे तु पालन लेईरे सेत परमेश्वरे दु मीतिंग आशीष ए दोतु सुरक्षा लेईमी कसम लरी। परमेश्वरे कुड़ि कि अगर दोच़ि दीतु पालन मलेईरे सेत दोई दोतिंग सज़ा रमोतो।

मास्स ध्याड़ा तचे, मूसा सीनै गो पुन्ज़ारिंग ए बांग्ज़िरी। दोई परमेश्वर रांग गप्पा लेई लेकी तोई। पर मीरे दोऊ याच़िमी थल्ज़ि रुमज़ा रुमज़ा छचे इलिरे। दोऊ थल्ज़ि हारूनो कचांग ज़ागं कुरच़ा अतिरे दांग दोबि इच़ा मुर्ति बनाचिरिंग कुड़िरे ताकि दोच़ि परमेश्वरो बोन्दे दोऊ उपासना लेई तरफोरे। ध्याहं ले दोच़ि परमेश्वरो पाटि बेद आन्जि रूपरिंग पाप लेईरे

हारूने रेन्ज़ो आकारो ज़ागंज़ु इच़ा मूर्ति बनाति। दोच़ि दु मूर्ति मनेक्च़ि च़ुक्तिरे आई दांग दोबि बलि ल रेईंरे! दोतु पापो वजहज़ी परमेश्वर दोतांग मास्स रोशेक्सा इन्दे। दोई दोतिंग खत्म ले केचिम तरे। पर मूसाज़ि दोतिंग म साच़िमि थल्ज़ि प्रार्थना लरी। परमेश्वरे दोऊ प्रार्थना रेड्रिरि दांग दोतिंग म सादि।

थलमुकरिंग मूसा सीनै गोरिगंज़ि ताकसा अन्जा। मूसा राग्गटु दु जुट पट्टकुतिंग कुरच़ा तोई आंरतिग परमेश्वरे दु सा आज्ञारे च़ेयति। दांग दोई दु मूर्ति तांगरि। दोबि धोंड़ रोष आति कि दोई दु राग्गतु पट्टकुतिंग चुरुग मुरुग ले केरि।

दांग मूसाज़ि दु मूर्ति पीसेके दोऊ धस्स बनाके केरि, दांग दु धस्सबि तिरांग च्वाचे दु मीतिंग पिलाति। परमेश्वरे दु मीतु टोखटे इच़ा मुसीबत च़रति दागं दोतु बिचांगज़ि मास्स मीरे सिए इलिरे।

आऊँ पट्टतिंग मूसाज़ि थाके केति दोऊ ठाढ़ि लेप्च़िमि थल्ज़ि मूसाज़ि दु सा आज्ञाज़ु राग्गटु खरकोई पट्ट बनाति। दांग दु ओल्ला गो टोखटे लोक्सरि दांग प्रार्थना लरि कि परमेश्वरे दोतिंग माफ लोतो। परमेश्वरे मूसाज़ु रेड्रिरि दांग दोतिंग माफ लरि। खारकोई पट्टतिंग सा आज्ञारे कुरच़ा मूसा योंखा ताग्सा आति। दांग परमेश्वरे सीनै गोरिंगज़ि च़ुके वायदाज़ु देश तचे इस्राइलितिंग आम्म कान्डी।