12. इस्राइलि मीतु मिस्र देशांगज़ि हुन्ज़ि

इस्राइलो मीरे मिस्रागंज़ि हुच़ा मास्स राजी तोईरे। दोरे दा गुलाम मतोइरे, दा दोरे प्रतिज्ञा ज़ु देशांग इबि लेकि तोईरे! चिधिर ला इस्राएलिरेच़ि पेड़िरे, मिस्रो मीच़ी दोतिंग ज़ाङ, मुल ए कीमती समानरे रणींरे। उई देशो आऊँ मिना मी च़ी ला परमेश्वरो टोखटे विश्वास लज़ितरे, आपेल इस्राइलिरे मिस्रांग ज़ि हुन्ज़तेर दांग दुरे ला दोतांग साथे शुचे इलिरे।

ङिरो दोपेल डु ज़ु इच़ा मोट्टे थम्म दोऊ तुई-तुई जोई लेकि तोई। रातरिंग दी ए थम मेऊ थम्म शुचे इलि। छेईकुचे परमेश्वर दु डू ए मेऊ थमो अन्दरेग दोतिंग आम्म कान्ड्रिमी थलज़ी तोई। दोतिंग दोऊ थले जेत्ते जोइमि काम तोई।

फो आर ध्याड़ो थल, फिरौने दोऊ मीच़ि एनतु सेम लेके केरिरे। दोच़ि इस्राइली तिंग यच़ा एनतु गुलाम बनाचिम तरिरे। दोऊ थलज़ि दोरै दोतु थल्ल-थल्ल इलिरे। परमेश्वरे दोतु सेम लेके केते छेई कुचे दोई कान्जिम तरे कि फिरौने मिस्रो बत्ते देबता बेच़ि, यहोवा, मास्स शक्तिशाली शु।

आपेल इस्राइलीरेच़ि मिस्रो सेनाबी आपि तांगरिरे दोतिंग चेसिरि कि दोरे फिरौनो सेनाए शेई समुन्द्रो बिचांग फसेके इलिरे। दोरे मास्स बेय इलिरे दागं क्रापि चुक्तिरे,” कि हेन्ज़ि मिस्र चिल छोड़ेक्तिंई? हेन्दरे सिच़ा शुई!”

मूसाज़ि इस्राइलितांग कुड़ि, “बेउईं थाईं! परमेश्वर तोग केतु थलज़ि शास्तो दांग केतिंग बचापोतो।” परमेश्वरे मूसा बी कुत्तो दि मी तिंग कुड़ु कि शेई समुन्र्दो आखा तुखा शुईं।”

दांग परमेश्वरे दु डु ज़ु थम बी इस्राइलि ए मिस्रो मीतु बिचांग केचे केतु छेई कुचे मिस्रो मीच़ि इस्राइलितिंग तांगज़ी मेस।

परमेश्वरे मूसा बी समुन्र्दो आखा गुड़ तूखा लेइरिंग कुत्तु। दांग परमेश्वरे लान्न ज़ि कुचे समुदरो ती बी देखा-नोखा ले केतु, दांग समुदरो बिचांग ज़ी इच़ा आम्म बनेके इलि।

इस्राइलो मीरे एनतु देच़ि नोच़ि तिऊ भीति रांग साथे कारचि धरतिरिंग समुंदरो बिचांगज़ि अच़ा इलिरे।

दांग परमेश्वरे दु आम्मरिंगज़ि डु बि घरेके च़रचतु छेई मिस्रो मी च़ि इस्राइलितिंग ठीक-ठाक इबि तांमोरे। मिस्रो मीच़ि दोतिंग च़म्ज़िमि थल्ज़ि दोतु थले इबिमि इरादा लेईरे।

दांग दोच़ि समुन्द्रो बिच्चे दु अम्मज़ि इस्राएलिरेतु पीछा लरिरे, पर परमेश्वरे मिस्रो मीतु रथरे फसेक्पि ले दोतिंग बेई ले केरि। दोरे हाउशेक्पि लेकितोइरे, “पोक्थुईं ए! इस्राइलितु भोन्दे परमेश्वर लड़ेक्पा।”

बत्ते इस्राइलिरे समुद्रो नुरे पिचे इलिरे। दांग परमेश्वरे मूसाबी ओल्ला तिऊआखा गुड़ तूखा लेइरिंग कुत्तो। अपेल मूसाज़ि ध्यांह लत्तो, दांग ती मिस्रो सेनाओ टोख्टे अच़ा अति दांग तुईकि ठ्रो शुचे इलि। मिस्रो बत्ते सेनारे डुबेके इलिरे।

लत्तो, दांग ती मिस्रो सेनाओ टोख्टे अच़ा अति दांग तुईकि ठ्रो शुचे इलि। मिस्रो बत्ते सेनारे डुबेके इलिरे।

आपेल इस्राइलिरेच़ि ताङतेर कि मिस्रो मीरे सिए इलिरे दांग दोतिंग परमेश्वरो टोखटे बिश्वास शुई। दोच़ि विश्वास लेइरे कि मूसा परमेश्वरो भविष्यवक्ता तोई।

इस्राइलि मीरे दोऊ थलज़ि ला मास्स राजी तोइरे छेईकुचे परमेश्वरे दोतिंग सीरिंगज़ि ए दास शुबिरिंगज़ि बचाकते। दा दोरे परमेश्वरबी ए दोऊ आज्ञा मनेक्च़िमि थलज़ि आज़ाद तोइरे। इस्राइलो मीच़ि एनतु आज़ादी ए परमेश्वरबी शबस लेइमी थलज़ि इच़ा योन्र्दा लेइरे छेईकुचे परमेश्वरे दोतिंग बचाकते।