11. फसह ज़ु त्यौहार

परमेश्वरे मूसाए हारूनबी फिरौनो कचांग दि कुचिमि थलज़ि च़रचते कि इस्राइलितिंग इबि रोऊं। दोई दोबि चेतावनी रणी कि दोई अगर दोतिंग इबि मरणी सेत परमेश्वरे मिस्रो मितिंग ए जानवरतु मुन्डो योतिंग साचे केओतो। फिरौने दि रैड्रा ला परमेश्वरो टोखटे विश्वास लज़िए दोऊ गप्पा मनेक्चिरिंग इन्कार ले केते।

परमेश्वरे दोऊ टोखटे बिश्वास लज़ारेतु मुन्डो यो बी बचाच़िमी थलज़ि इचा उपाय लरि। हर परिवार बी इच़ा निर्दोष लच़ो बलि रन्जि लेपि तोई।

परमेश्वरे इस्राइलितिंग दु लाचो शुई शिन्जे आम्मो पितांगरिंग लगाचिम थलज़ि कुड़ि। दोतिंग दोऊ शा बि भुनेक्चिमि तोई दांग दोतिंग सुम मकेशी रोटीरांग फुर्ती रांग ज़ेइमि तोई। दोई दु बागत ज़ैथल दोतिंग युर कुचे मिस्र छोडेक्च़िमि थलज़ि तैयार बांगज़िरिंग कुत्तु।

परमेश्वरे दोतिंग छना लेइरिंग आदेश रन्दे दोच़ि ध्वांए बत्तेदिर लत्तेर। आधा रातरिंग, परमेश्वरे इच़ा-इच़ा मुन्डो यो बि सपा सपा मिस्रो बिचांगज़ि इलि ।

इस्राइलिरेतु बत्ते घरबारो पितांगरिंग शुई लेकी तोई, दोऊ थलज़ि परमेश्वरे दु घरबाररेतिंग छोड़ेके केतु। दु घरबारो अन्दरेकि बत्ते मीरे ठीक-ठाक तोईरे। दोरे लाच़ो शुईज़ु वजह ज़ी बचेके इन्देर।

पर मिस्रो मीच़ी परमेशवरो टोखठे विश्वास मलेत्तेर दांग दोऊ आदेश ला ममनेक्तिरे। दोऊ थलज़ि परमेश्वरे दोतु घरबारतिंग मछोडेक्ति। परमेश्वरे मिस्रो दोतु बत्ते मुन्डो योतिंग साचे केरि।

जेलांग तोचि कैदितु मुन्डो यो तु दोरच़ि च़ुके, फिरौनो मन्डो यो तचे, इच़िच़ो मुन्डो यो सिए इलिरे। एनतु मास्स दुखो कारण मिस्रो मास्स मीरे क्रापि लेकि तोईरे।

दुए रात, फिरौने मूसाए हारूनबि बुलाकेतु दांग कुतो, “इस्राइलितिंग लेन्ज़ा मिस्रागंज़ि युरन हुन्ज़ा इलईं!” मिस्रो मी च़ि ला इस्राइलितिंग युरन हुन्ज़ा इबिमि थलज़ी शबस लरिरे।