25. शेताने यीशुज़ु परीक्षा लेप्ति

यीशुज़ु बपतिस्मा शुचि थल धोप्पेले, पवित्र आत्माज़ी दोबी बणंग शिली। यीशु दोर निन्ज़ा ध्याडा ए निन्ज़ा रात तोई। धोपेल दोई ब्रत लरी, दांङ शेताने यीशु कचरिंग अन्जे पाप लज़ी लेईरिंग थल्ज़ि दोउ परीक्षा लेप्ति।

अपेल यीशुबि ङयोश लेति, शेताने यीशुरांग कुड़ि, “का परमेश्वरो यो शुना सेत दी राग्गटेतिंग रोटी बनाके केऊ छेबी केई ज़ेई तरफोन!”

पर यीशुज़ी शैतानरांग कुत्तो, “परमेश्वरो वचनांग दी च़ेसी तो, ‘शिन्गमिमी थलज़ि मीबी झित्ते रोटिए जून्शि मशुबी, पर दोतिन्ग दु भत्ते गप्पो ज़रुरत तो अऊँ परमेश्वरे दोतांग कुच़ी!‘“

दंग शैताने यीशुबी मंदिरो भब्बे रंगी मुक्करिंग रेन्ज़ा शिलि। दोई दोरांग कुडि, “अगर का परमेश्वरो यो शुना सेत धिन्ना योंखा छवाड़ रोऊँ, छेईकुचे च़ेसि तो, ‘परमेश्वरे कनिंग कुर्चिमि थलज़ि ऐनो स्वर्गो दूततिंग आज्ञा रमोतो कि कनु कोन्ज़ातिंग राग्टेच़ी लेपी मेस।’“

पर यीशुज़ी ध्वाँ मलोऊ छना शैताने दोरंग लेईमी थलज़ि कुत्ते। दिऊ भोन्दे, दोई कुत्तो, “परमेश्वरे इच्चा-इच्चा रांङ कुच़ि, केई प्रभु परमेश्वरो परिक्षा थलेपतु।’”

दंग शैताने दोबी संसारो भत्ते राज्‍य कंडि। दोई दोबी कंजतो कि दोरे अयों तकडा ए भत्तेधिर तोच़ि तोईरे ।” दोई यीशुराङ कुड़ि,” गे कनिंग दि बत्तेधिर रमोगा अगर केई पुशतिंग बांगज़ा ग्यु उपासना लोन।”

यीशुज़ी जवाब रन्दो, “हे शैताना, ग्यू कच्चरिंगज़ी अच्च़ा इला! परमेश्वरो वचनंङ दोई मीतिंग आदेश रन्जा, ‘झेत्ते केन्दु प्रभु परमेश्वरो आराधना लाईं। परमेश्वरो रुपरिंग झेत्ते दोऊ ऎ आदर लाईं।’“

यीशुज़ी शैतानो परिक्षाज़ी हार ममनेक्तो, दोऊ थलज़ी शैतान दोऊ कच्चरिंगज़ी अच्चा इन्जा। दंङ स्वर्गदूतरे अन्जे यीशुज़ु सेवाटहल लज़ि च़ुक्तिरे।