26. यीशुज़ि एनो सेवा चुक्ति।

यीशुज़ु परिक्षा शुचे थल, यीशु यच़ा गलीलो इलाकारिंग अन्जा। दि दु ए ठाड़ि शु आंर दु बांगज़ा तोई। पवित्र आत्माज़ि दोबि मास्स शक्ति रन्ड्रि लेकि तोई, दांग यीशु इच़ा ठाड़िरिंगज़ि आइच़ा ठाड़िरिंग इलि, दांङ मीतिंग शिक्षा रेईं। बत्तेच़ि दोऊ पाटि रूठे गप्पा कुड़िरे।

यीशु नासरत नगरांग इन्जा। दि दु नगर शु आंरतिग दु एनो क्वाचतर बांगज़ा तोई। सब्तो ध्याड़ा, दु अराधना लेईमि ठाड़िरिंग इन्जा। यहूदि प्रधानरेच़ि दोबि यशायाह भविष्यवक्ताज़ु उजाबो किताब रेईंरे। दोच़ि जुन्ज़तेर कि दोई दोऊ धुन्ना पढ़ेक्पोतो। दांङ यीशुज़ि दु किताबबि आल्जे दोऊ इच़ा हिस्साबि मीतु थल्ज़ि पढ़ेक्ति।

यीशुज़ि पढेक्ति, “परमेश्वरे गिवि एनो आत्मा रांशि ततो ताकि गे कंगालतिंग रुठे समाचारो प्रचार लज़ि तरफोग। दोई गिबि दियू थल्ज़ि च़रचतु कि गे कैदिरेतिंग आज़ाद लोगा, कांणे दोतिंग ओल्ला टीरा रम्मोग, आई दोतिंग छुटकारा रम्बोग आतिंग उई मीरेच़ि दबाच़तोर। दि दु वक्त शु अपेल परमेश्वर हेन्दु टोखटे कृपा लोतो ए हेन्दु मदद लोतो।”

दांङ यीशु नच़ा इलि। बत्ते मीच़ि दोबि रूठेरांग खन्ड्रि लेकि तोइरे। दोच़ि ङेओरे कि शुच्चाशास्रो आऊं हिस्सा दोई एन्थेग पढेक्ते दु मसीहो पाटि तोई। यीशुज़ि कुड़ि, “आऊं गप्पारे गे एंथेग केतु थल्ज़ि पढ़ेक्ताग, दु दि मोक्का शुबि लेकि तो।” बत्ते मीरे हैरान तोईरे। दोच़ि कुईरे, “दि चि युसुफो यो मशता?”

दांङ यीशुज़ि कुड़ि, “दि हेल्ले शु कि मीच़ि धुठ्रो भविष्य कन्जाड़बि अपेल ल ममनेक्च़ि आऊं दु दोतु नगरांग मोढ़े शुचि शु। एलिय्याह भविष्य कन्ड्राड़ो मोक्का इज़राएलांग मास्स विधवारे तोईरे। पर अपेल सढ़े शुम्मु साल तचे सन्दाड़ मशुई सेत परमेश्वरे एलिय्याहबि इस्राएलांग आरला विधवा ज़ु मदद लेई मच़रतु। दिऊ बोन्दे, दोई एलिय्याहबी इच़ा उई देशो विधवाउ कचरिंग च़रचतु।”

यीशुज़ि कुट्रि जारि तरि, “आई एलीशा भविष्यवक्ताऊ वक्तरिंग, एस्राएलांग मास्स मीरे चमड़िऊ रोगे टेचि तोईरे। पर एलीशाज़ि दोतु बिचांगज़ि आतिंग ल ठीक मलोऊ। दोई इस्राएलो शत्रु रेतु सेनापति नामानबि जेत्ते ठीक लत्तु।” पर आऊं मिच़ि यीशुबि रेड्रि लेकि तोईरे दोरे बत्ते यहूदि तोईरे। दोऊ थल्ज़ि अपेल दोच़ि दोबि दि कुचतर रेड्रिरे दांङ दोतिंग दोऊ टोख्टे रोष आति।

नासरतो मीच़ि यीशुबि च़ुमरिरे दांङ आराधनाऊ ठाड़िरिंगज़ि शोके धाक्तिखा लेन्ज़ा शिलिरे। दोच़ि दोबि साच़िम थल्ज़ि इच़ा गो पुन्ज़ारिंग शिलिरे। पर यीशु भीड़ांगज़ि हुच़ा नासरत नगर केचा अच़ा इलि।

दांङ यीशु गलीलो बत्ते ठाड़िरिंग इलि, दांङ मास्स भीड़ दोऊ कचरिंग अति। दोच़ि मास्स दुट्रो मीरे हातिरे आँऊ टेचि ए अपंग तोईरे। दोतु बिचांगज़ि रेई खान्ड्रि, जोई, रेड्रि ए कुचि मरछ़ि तोई, यीशुज़ि दोतिंग ठीक ले केरि।

दिऊ अलावा, मास्स दुछो मीरे ल यीशु कचांग इलिरे अतु अन्दरेग माजि आत्मारे तोईरे। यीशुज़ि माजि आत्मातिंग दोतु अन्दरेगच़ि हुन्ज़ा इबिम आदेश रेंईं। दु दुष्ट आत्मारे हाउशेक्तिरे, “क परमेश्वरो यो शुना!” भीड़ो मीरे हैरान तोईरे, दांङ दोचि परमेश्वरबी हिद लेईरे।

दांङ यीशुई सनि गांङमितिंग चुनेक्ति आतिंग दोई एनो प्रेरितरे कुड़ि। दु प्रेरित मीच़ि दोरांग साथे यात्रा लरिरे दांङ दोऊ दोरच़ि शिक्षा लेप्तिरे।