27. दयालु सामरीऊ कथा

इच़ा ध्याड़ा, यहूदीरेतु नियम कानूनो इच़ा जानकार यीशु कचांग आति। दोई बत्तेतिंग दि कान्ड्रिम तरे कि यीशुई गलत ढंगे शिक्षा रन्ड्रि लेकि तो। दिऊ थल्ज़ि दोई कुड़ि, “हे गुरु, अन्नत जीवन जुन्ज़िम थल्ज़ि गे चि लगा?” यीशुज़ि जवाब रेईं, “परमेश्वरो नियम कानूनरिंग च़ि च़ेसि तो?”

दु मीज़ि कुत्तो, “दोई कुच़ा कि केनो परमेश्वरराङ केनो बत्ते सेम, प्राण, तरछि ए बुद्धिज़ि प्रेम तोऊ, आइ केनो पड़ोसीरांङ केनो बराबर प्रेम तोऊ। यीशुज़ि जवाब रेईं, “क बिल्कुल सही शुना। अगर केई ध्याँ लेईना सेत कनिंग अन्नत जीवन खोक्सतो।”

पर दु व्यवस्थाज़ु नीयम कानूनो जानकारे मीतिंग कान्जिम तरे कि दोऊ शिंगबिमि तरीका ठीक तोई। दोऊ थल्ज़ि दोई यीशु रांङ रुकतो, “ठीक शु, दांङ ग्यु पड़ोसी अरि शु?”

यीशुज़ि दु व्यवस्थज़ु विशेषज्ञबि इच़ा कथा कन्जे जवाव रणिं। “इच़ा यहूदि मी तोई अरि इच़ा सड़कारिंगज़ि शुचे यरूशेलमांगज़ि यरीहोज़ु यात्रा लज़ि लेकि तोई।”

“पर मिना डाकूरेच़ि दोबि तांङरिरे दांग दोऊ टोखटे हमला लेईरे। दोच़ि दोऊ बत्तेधिर लेन्ज़ा शिलिरे दांग दोबि लगभग सितचे कुटेक्तिरे। दांङ दोरे अच़ा इलिरे।”

“दोऊ थल्ल धोप्पले, इच़ा यहूदी प्रधान दु ए सड़कांगज़ि इन्जा। दु प्रधाने दु मीबी सड़कारिंग पड़ेकि तांङरि। अपेल दोई दोबि तांङरि दु सड़को एखा शुचे तूखा अच़ा इलि। दोई दु मीबी पूरे छो मतांशि ले केरि।”

“दिऊ थल्ल फोआर झाड़ो थल, इच़ा लेवी दु सड़कारिंग अन्जा। (लेवी यहूदि रेतु इच़ा गोत्र तोई आच़ि मन्दिरांग याजकतु मदद लत्तेर) दु लेवी ल सड़को एच़ि हुच़ा इलि। दोई ल दु मीबी मतांङशि ले केरि।”

आईच़ा मी अरि दु सड़कारिंग अन्जा दु सामरिया ज़ु इच़ा गांङमि तोई। (सामरिया ए यहूदि च़ि एनतु बिचांग नफरत लज़ि तोई) दु सामरीज़ि सड़कारिंग दु मीबी तांङरी। दोई तांङतु कि दु यहूदी तोई पर तांला दोबि दोऊ टोखटे मास्स तरस आति। दु दोऊ कचरिंग इन्जा दांग दोऊ लेकिरिंङ पट्टी छ़ुदि।”

“ दांङ दु सामरीज़ि दु मीबि एनो कारो टोख्टे केरि दांङ दोबि सड़कारिंगज़ि इच़ा सरायरिंङ लेंज़ा शिलि। आँरतिग दोई दोऊ देखभाल लज़ि जारि तयेतु।”

ओईराग, दु सामरी बी एनो यात्रा जारी तच़िम ज़रूरत तोई। दोई दु सराय चलाच़ा मीबी मिना ढबा रणीं। दोई दोरांङ कुड़ि, “दि मिऊ देखभाल लोऊ। अगर दि ढबाऊ अलाबा कनु उई ढबा खर्च शुई सेत वापिस आन्जे कनु खर्चो ढबा रैं च़रपोग।”

दांङ यीशुज़ि दु व्यवस्था ज़ु जानकारबि रुकतो, “केई चि सोचेक्सतन? दु शुमु मीतु बिचांङ आरि दोऊ पड़ोसी शु अतिंग लुटेकतेरे ए कुटेक्तेरेआ?” दोई जवाब रणीं, “दु ए आंऊ दोई दोऊ टोख्टे कृपा लत्ते।” यीशूज़ि दोरांग कुड़ि,” क इला दांङ ध्यांए लउ।”