50. यीशु याच़ा अपि

क्योमे क्योमे 2,000 साल ज़ी, संसारंग भत्ते ठारिरिंग महस्स बे महस्स मीच़ी मसीह यीशु पाटि रुठे उजापबी रेड्रि लेकि तोइरे। कलीसियाज़ि तरक्की लज़ि लेकि तोई। यीशुज़ि वाइदा लरि कि दु संसारो योहसिमि बे तुई पक्का अपोतो। ध्यांरिंग दु ऐन्थेग याहच़ा अन्जि मा, तांला दोई ऐनो लसी वाइदा पूरे लोतो।

ऐन्तच़ी ला हेनरे यीशुज़ु याहच़ा अपिमी थल्ज़ि रुम्ज़ा तोतोई, परमेश्वरे हेन्दंग ध्यां ठ्रो श़िंमिमी इच्छा तत्तो अऊं दु दोऊ आदर लज़ाडे शुच्चे शोतो। अपेल यीशु धरतिरिंग बांगज़ि तोई धोपेल दोई कुते, “ग्यू चेलाच़ि संसारो भत्ते ठाडिऊ मीतिंग परमेश्वरो राज्यो पाटी रुथे उजाप रमोरे, दंग धोपेल अंत अच़ा अपोतो।”

मस्स जातो मीच़ि एन्नतची यीशु पाटि रेड्रि मतोइरे। स्वर्गो हाखा यच़िमि बे तुई, यीशूज़ी मसीहीतंग दु मीतिंग रुथे उजाप शच़िरिंग थल्ज़ि कुत्तो अच़ि दिबि अप्पेल ला मथशितेर। दोई कुडि, “इलाईं इन्जे भत्ते जातो मीतिंग चेला बनातुईं!” अई “वलज़िमी थलज़ि री त्यार शुचि इन्जि तो!”

यीशुज़ी दि ला कुडि कि, ”अरिआ मीऊ नोकर एनो मालिक बेच़ि मोडे मशुबि। दि संसारो ज़रुरी मिच़ि गेरंग नफरत लहरिरे, अई ग्यू मुके दोच़ि केतिंगला तंग लोरे ए सचि क्योरे। दि संसारंग केरे दुखेकसोईं, तांला तकडा शूंईयों, छेईकुचे गे शेतानबि याहरचि केतग अच़ि दि संसारंग राज लज़िते। थलमुक्करिंग तचि केरे ग्यू विश्वासो जोगे शोईं सेत परमेश्वरे केतिंग बचापोतो!”

यीशुज़ी एनो चेलारेतिंग दि शुंङसी लज़िमि थलज़ि इच़ा कथा शदि कि अपेल संसार योहसी लेकि शोतो धोपेल मितंग साथे चि शोतो। दोई कुड़ि, “अरिआ मीज़ि एनो ऋई रिंग रुथे बेजा एईतो। अपेल दु इमरिंग तोई धोपेल दोऊ दुशमने अन्जि छ्वाऊ बेजो बिचंग श़ाङो बेजा एई केतो, दंग दु अच़ा इन्जा।”

“अपेल बेजा पुङे इन्दे धोपेल दासच़ि दु मीरंग कुढीरे, ‘हे मलिका, केई त केनो ऋईरिंग रुठे बेजा एईतेने। दंग दिरिंग बणों श़ाङ छेरिंग तो?’ दु मीज़ि जवाब रंदो, ‘झित्ते ग्यू दुशमनरे शोरे अच़ि दि एओतो। ग्यू अरिआ दुशमने ध्यां लतो।’”

“दु दासच़ि मालिकबि जवाब रंदोरे, ‘ नेच़ि चि जंगली श़ांग फोम्मबोईंयां?’ दोई कुडि, ‘मेस। केच़ि ध्यां लरिंईं सेत रेई छ्वा ला फोंश़ा अपोतो। वालज़ि तचि रुम्ज़ुईं। धोपेल श़ाङो पुलटु लेई ठ्रोक्कन लेई च़ारतुईं छेबि थले रोट्रि तरफोईं। दंग छ्वाबि ग्यू गोदामांङ लेन्ज़ा अतंई। ’”

चेलारेच़ी दि कथाज़ु मतलब मशुङदिरे, दीऊथलज़ि दिच़ि यीशुरंग दोबि समझाच़िरिंग कुईरे। यीशुज़ी कुडि, “रुठे बेजा एच़ाड मीज़ि मसीह बी कन्ड्रा। री ज़ि संसारबि कन्जा। रुठे बेजे परमेश्वरो राज्यो मीतु पाटी कन्ड्रा।”

“बणों श़ाङ दु माजि मीतु , बेडो मीतु ठ्रो शुबि। दु मीज़ु दुशमने शेतानबी कन्ड्रा, अच़ि बणों श़ाङबि एई केतो। वालज़ि दि संसारो योहसिबि कंड्रा, अई वलज़ाडेच़ि परमेश्वरो स्वर्गदूततिंग कंड्रितोरे।”

“अपेल संसार योसतो दोपेल स्वर्गो दूताच़ि दू भत्ते मीतिंग ठ्रोकन लोरे अरी सेतानो शोरे। दु स्वर्गदूतच़ि दोतिंग इच़ा मस्स च़च़े मेहरिंग छ़ाँङे च़ारपोरे। दोर दु मीरे भेबर कष्टांग क्रपोरे दंग एनतु छ़वा युपोरे। पर अरि धर्मी शुरे, अच़ि यीशु कांश़ी अमरिंग जोउरे, दोरे दोतु परमेश्वर बा ज़ु राज्यरिंग एखेऊ ठ्रो याहलन शोतो।”

यीशुज़ी दि ला कुडि कि संसार योसिमिबे तुई दु धरतिरिं याच़ोतो। दु ध्वां ठ्रो ए अपोतो छना इन्दे। दोऊ कचरिंग हेलेकि फुक शोतो, दंग दु सरगंग डूज़ु टोकठे तेच़ा अपोतो। अपेल यीशु याच़ोतो, धोपेल भत्ते मसीही अरि सिये इन्देर दोरे ओल्ला श़िङे योरे दंग दोरांग सर्गांङ दोओरे।

धोपेल अरि मसीही श़िंञी तोतोरे दोरे सरगांग लेन्ज़ा शोरे दंग दोरे ला उई मसीहीतंग शामिल शुचे योरे अरि सीरिंज़ि श़िञि इन्देरे। दोरे भत्ते दोर यीशुरंग साथे शोरे । दोऊ थल , यीशु एनो मीतंग साथे बङज़ोतो। अपेल दोरे इच्च़ा साथे बङज़ोरे धोपेल दोतु कचरिंग पूरे ठ्रो शान्ति शोतो।

यीशुज़ी दोऊ टोक्ठे विश्वास लज़ाड भत्ते मीतिंग इच़ा मुकुट रंड्रिमि प्रतिज्ञा लत्तो। दोच़ि हमेशो थलज़ि परमेश्वरंग साथे भत्ते चीज़तु टोक्ठे राज लोरे। दोतु कचरिंग सिध्ध शान्ति शोतो।

परमेश्वरे दोतु भत्तेतु ला रुठे लोतो अच़ि यीशु टोक्थे विश्वास मलज़ि तोईरे। दोई दोतिंग नरकरिंग केचि क्योतो। दोरतिग दोरे क्रापोरे ए एनातु छ़व्आ युपोरे, दंग दोतिंग बरदो शुआ लोतो। अपेल्ला म सिच़ा मेहज़ी दोतिंग लगातार रोप्पा लोतो, अई दोतिग ओमड्रा लेपोतो छेई दोतिंग लगातार ज़ोरे।

अपेल यीशु यच़ोतो, धोपेल दोई पूरे ठ्रो शेतान ए दोऊ राजबी योचि च़रपोतो। दोई शेतानबी नरकङ केचि केओतो। दोर शेतान हमेशो थल्ज़ि दोतंग साथे अऊं दोच़ि परमेश्वरो गप्पा मरेठ्रा शेतानो थले इबिमि कम लरिरे दोरे रोश़ा लोरे।

छेईकुचे आदम ए हव्वाज़ि परमेश्वरो ठ्रो मलोकु दंग पापबी दि संसारंग लेन्ज़ा अन्देकु, परमेश्वरे दोबि हत्या केरि दंग दोवि सच़िमि फैसला लरि। पर अपेला परमेश्वरे इच़ा खरकोई स्वर्ग ए इच़ा खरकोई धरति बणेक्पोतो अऊं दु हमेशो थल्ज़ि शोतो ।

यीशुए दोऊ मिरे दु खरकोई धरतिरिंग बंगज़ोरे, दंग दोच़ि हमेशो थलज़ि दोर राज लोरे। दोई मीतु टीरंगज़ि इच्च़ा इच्च़ा मिक्ति भ्रुचि च़रपोतो। द अत्तिंगला बरदो ए दु:ख मशोतो। दोरे क्रपोरे मा। दोरे टेपोरे ए सिओरे मा। दोर छल्ले माजि मशोतो। यीशुज़ी एनो राज्यरिंग न्यायरांग, आई शान्तिरांग साथे शासन लोतो। दु हमेशो थल्ज़ि एनो मीतांग बांगज़तो।