49. परमेश्वरो खारकोई वायदा

इच़ा स्वर्गदूते इच़ा बाड़े मेच़मी मरियमबि कुड़ि कि दोई परमेश्वरो यौ बि जेपि लोतो। दु अत्त व्याह मलसि तोई, पर पवित्र आत्मा दोऊ कचरिंग अन्जा दाङ दु खोग्टांङ शुई। दोबि इच़ा यो जेका अतु मिन दोई यीशु केरि। दिऊ थल्ज़ि, यीशु परमेश्‍वर ए मी जुल्ला शु।

यीशुई मास्स चमत्कार लत्तो छेई कान्ड्रते कि दु परमेश्वर शु। दु तिऊ टोखटे जोयते दांङ लन्न ए टु बि शान्त लत्ते। दोई मास्स टेचि मीतिंग ठीक लत्ते आई मास्स मीतु अनदरेगच़ि माजि आत्मारे हुन्जते। दोई सी मीतिंग शिंगबि लरि, दांङ दोई ङां रोटि ए जुट मच्छबि 5,000 मीतु ज़ेइमी थल्ज़ि खोग कात्थचे बागत रणीं।

यीशु इच़ा मोड़े गुरु ल तोई। चिधिर ल दोई कान्डि, दु दोई रुठे रांङ सिखाकतु। चि दोई मीतिंग लेईमि थल्ज़ि कुट्रा दु दोतिंग लज़ि जुंशि शु छेई कुचे दु परमेश्वरो यो शु। कान्ड्रिम थल्ज़ि, दोई सिखाकतो कि केतिंग उई मीतिंग ल ध्वांह ए ठ्रो दा लज़ि जूंशि शु छना केच़ि केन्दिंग लातईं।

दोई दि ल सिखाकतो कि केतिंग घ्यांङा ए घ्यांङो बत्ते चीज़बे चढ़े परमेश्वरबि दा लज़ि जूंशि शु।

यीशुज़ि कुड़ि कि संसारो छिल्ला चीज़बि लेपच़िमबे रुठे परमेश्वरो राज्यरिंङ शुबि तो। दोऊ राज्यरिंग इबिम थल्ज़ि जूंशि तो कि परमेश्वरे केतिंग केतु पापे बचापतो।

यीशुई कुड़ि कि रेई मीच़ि दोबि लेपोरे। परमेश्वरे दु मीतिंग बचापोतो। पर रेई मीच़ि दोबि मलेप्पोरे। दोई दिला कुड़ि कि रेई मीरे रुठे धरतिऊ ठ्रो शुरे, छेईकुचे दोच़ि यीशु पाटि रुठे उजाब लेप्चे केचतोरे, दांङ परमेश्वरे दोतिंग बचाच़ा। पर रेई मीरे सड़को टाक्टाग धरतिऊ ठ्रो तोतोर। परमेश्वरो कुशी गप्पा बैजो ठ्रो धरतिरिंग दपा, पर दोर छल्ले मपुंगमा। दि मीच़ि यीशु पाटि उजाब लेप्च़िरिंग न ले केचि। दोच़ि दोऊ राज्यरिंग इबिरिंग न ले केचि।

यीशुज़ि सिखाकतो कि परमेश्वरे पापीतांङ मास्स दा लज़ि। दोई दोतिंग माफ लज़िमि ततो दांङ दोतिंग एनो काटु बनाट्रिम ततो।

यीशुज़ि दिला कुत्तो कि परमेश्वरे पापरांङ नफरत ला। छेईकुचे आदमे हव्वाज़ि पाप लत्तेकु, दिऊथल्ज़ि दोकुतु बत्ते वंशे ल पाप लत्तोर। दि संसारांङ बांगज़ाड़ हर इच़ा मीज़ि पाप लज़ा दिऊ थल्ज़ि दोरे परमेश्वरांङ ओई तोतोर। इच़िच़ मी परमेश्वरो दुश्मन शु।

पर परमेश्वरे दि संसारांग बांगज़ाड़ हर इच़ा मी रांङ ध्याहं ठ्रो दा लरि कि: दोई एनो इच़ा यो बी रैं च़रति ताकि परमेश्वरे दोतिंग सज़ा मरमोतो आच़ि दोऊ टोख्टे विश्वास लज़ि तोई। दिऊ भोन्दे, दु दोतांङ साथे हमेशाउ थल्ज़ि बांङज़तो।

केरे सीमी जोगे तोतोईं, छेईकुचे केच़ि पाप लत्तईं। परमेश्वरो केतु टोख्टे रोशेक्सि ठीक शु, दिऊ भोन्दे, दोई यीशु टोख्टे रोष हुति। दोई यीशुबि क्रूसो टोख्टे सिए इबिमि सज़ा रणीं।

यीशुज़ि अपेला पाप मलऊ, पर दोई परमेश्वरबि एनबि सज़ा रन्ड्रि रन्दे। दोई सिए इबि ठीक चेति। ध्याहं ले, केतु पापतिंङ ए दि संसारांङ बांगज़ाड़ इच़िच़ मीऊ पापबि शिन्ज़िमि थल्ज़ि दि इच़ा मोढ़े बलिदान तोई। यीशुई एनबि परमेश्वरो थल्ज़ि बलिदान ले केरि, दिऊ थल्ज़ि परमेश्वरे छिल्ला पापबि, देर तचे कि बेद आन्जि पापबि ल माफ ले केरि।

केच़ि आंयो ए रुठे काम्म लांईं तां ल परमेश्वरे केतिंग मबचापोतो। दोऊ साथी बनेक्पिम थल्ज़ि ध्यांह ठ्रो छल्ले कम्म म चि केच़ि लेई तरफोईं। दिऊ भोन्दे, केतिंग दि विश्वास लज़ि लेपोतो कि यीशु परमेश्वरो यो शु, आई दु केतु भोन्दे क्रूसो टोख्टे सीए इलि, दांङ दिला कि परमेश्वरे दोबि ओल्ला शिंगबि लेकेरि। केच़ि दिऊ टोखटे विश्वास लरिईं सेत, परमेश्वरे केतु पाप माफ ले केयोतो।

परमेश्वरे दोतिंग बत्तेतिंग बचापोतो आच़ि यीशु टोख्टे विश्वास लज़ा आई दोबि एनो प्रभु मनेक्च़तोर। पर दोई दोतिंग मबचापोतो आच़ि दोऊ टोखटे विश्वास मलज़तोरे। दि छल्ले फर्क मपढेक्पोतो कि केरे ढब्बो घराक शुईंआ गरीब शुईं, गांङमी शुईं आ मेच़मी शुईं, यांङशि शुईंआ छ़ोक्करा, या केरे आंरतिग बांङज़तईं। परमेश्वरे केतांग दा लज़ा दांङ ध्यांह जुन्ज़ा कि केच़ि यीशु टोख्टे विश्वास लाईं कि दु केतु साथी बनेक्पि तरफोतो।

यीशुज़ि केतिंग हाग्ग ला कि दोऊ टोख्टे विश्वास लाईं ए बपतिस्मा लेप्तुईं। चि केच़ि विश्वास लज़तईंआ कि परमेश्वरो इकलौता यो यीशु ए मसीह शु? चि केच़ि विश्वास लातईंयां कि केरे पापि शुईं आई दिला कि केरे परमेश्वरो धुन्ना सज़ा रन्ड्रिम जोगे तोतोईं? केच़ि चि विश्वास लज़तईंया कि केतु पापबि योच़िम थल्ज़ि यीशु क्रूसो टोख्टे सियते?

अगर केच़ि यीशु टोख्टे ए आई दोई केतु थल्ज़ि चिलत्ते दोऊ टोख्टे विश्वास लज़तईंआ, दांङ केरे इच़ा मसीह शुईं! शैताने एनो हंयारो राज्यरिंङ द केतु टोख्टे राज मला। द परमेश्वरे एनो छांङिऊ राज्यरिंग केतु टोख्टे राज ला। दोई केतिंग पाप लज़ि मरन्ज़ा छना केच़ि तुई लोअतईं। दोई केतिंग इच़ा रुठे जीवन रांशि ततु।

क अगर इच़ा मसीहि शुना सेत यीशुज़ि चि लसि ततु दोउ भोन्दे परमेश्वरे केतु पापबि माफ ले केतु। दा, परमेश्वरे इच़ा दुश्मनो भोन्दे केतिंङ इच़ा सचे साथी मनेक्च़ा।

अगर केरे परमेश्वरो साथि शुईंसेत ए प्रभु यीशु सेवक शुईंसेत केच़ि दु गप्पा मनेक्पोईं आऊं यीशुज़ि केतिंङ सिखाच़ा। क मसीही शुना ल सेत, शैताने आत्त ल कनु पाप लेईमि थल्ज़ि कनु परिक्षा लेपोतो। पर परमश्वरे हमेशा दु लज़ि आंउ दु दोई लेईमि थल्ज़ि कुट्रा। दोई कुट्रा कि केच़ि केन्दु पापबि मनेक्तिईं सेत, दांङ दोई केतिंग माफ लेकेओतो। दोई केतिंग पापरांङ लड़ेक्पिमि थल्ज़ि बल रमोतो।

परमेश्वरे केतिंग प्रार्थना लज़ि ए दोऊ वचनबी पढ़ेक्पिरिं कुचा। दोई केतिंग उई विश्वासि रेतांग छोक्कन शुचे दोऊ अराधना ल लेईरिंग कुचा। केतिंग उई मीतिंग ल कान्ड्रि लेपोतो कि परमेश्वरे केतु थल्ज़ि चि लसि ततो। अगर केच़ि दि बत्ते कम्मरे लरिईं सेत, दांङ केरे दोऊ इच़ा पक्का साथि बनेके योंईं।