48. यीशुए वायदा लसि मसीहा शु

अपेल परमेश्वरे संसार बनाकते धोपेल बत्तेधिर रुठे तोई। छल्ले पाप मतोई। आदम ए हब्बाज़ि एनकुतिंङ दा लज़ि तोई, आई दोच़ि परमेश्वररांङ दा लज़ि तोई। छल्ले बिमारी ए आरिया सी मतोई। परमेश्वरे ध्याहं ठ्रो ए संसार जुन्ज़ते।

शैताने ओमड्रा शुचे बगीचो अन्दरेग हब्बारांङ गप्पा लरि, छेईकुचे दोई दोबि धोखा रन्ड्रिम तरे। हब्बा ए आदमे परमेश्वरो खिलाफ पाप लेईकु। छेईकुचे दोकुई पाप लत्तेकु दिउथलज़ि धरतिरिङ बांगज़ाड इच़ा-इच़ा जीव सिए य्वातोरे।

छेईकुचे आदमे हब्बाज़ि पाप लत्तेकु, दिऊ थल्ज़ि छा उई ल माजि शुई। दोकु परमेश्वरो दुश्मन बणेके इलिकु। दि वजहज़ि दोऊ थल्ल बेच़ि इच़िच़ मीच़ि पाप लरिरे। बत्ते मीरे जेकि बेच़ि ए परमेश्वरो दुश्मन तोतोर। परमेश्वरे मीतु बिचांङ शान्ति मतोई। पर परमेश्वरे शान्ति तच़िम तरे।

परमेश्वरे प्रतिज्ञा लरि कि हब्बाज़ु इच़ा वशंजे शैतानो पुन्ज़ा काक्पोतो। दोई दिला कुड़ि कि शैताने दोऊ थुरि च़िक्पोतो। उई पाटि कुड़िईं सेत, शैताने मसीहबि साचे च़रपोतो, पर परमेश्वरे दोबि ओल्ला शिंङमि ले च़रपोतो। दिऊ थल्ल, मसीहज़ि शैतानो शक्तिबि हमेशो थल्ज़ि खत्म ले च़रपोतो। मास्स सालो थल्ल, परमेश्वरे दि प्रकट लरि कि मसीह ए यीशु शु।

परमेश्वरे दु डढांगज़ि एनो टवरबि बचाकतो अतिंग दोई हापिमि तरे। नूहबि इच़ा किश्ती बनाट्रिरिंग कुड़ि ध्याहं ठ्रो परमेश्वरे दु मीतिंङ बचाति आऊं दोच़ि दोऊ टोख्टे विश्वास लज़ि तोई। ओ ध्यांह ठ्रो, दोरे बत्ते परमेश्वरो धुन्ना साचे केचिम जोगे तोईरे छेईकुचे दोच़ि पाप लसि तरेर। पर परमेश्वरे दोतिंग बत्तेतिंङ बचाच़िम थल्ज़ि यीशुबि च़रचतो आच़ि दोऊ टोख्टे विश्वास लज़ि तोई।

तेईया रामि साल तचे, पुजारीच़ि परमेश्वरो थल्ज़ि बलि चढ़ापा लरिरे। दी कुचे पता लेपा कि मीच़ि पाप लत्तेर, आई दि कि परमेश्वरो दोरच़ि सज़ा रन्ड्रिम जोगे तोईरे। पर दु बलिरेच़ि दोतु पापतिंङ माफ लेई मारचतेर। यीशु भब्बे मोढ़े पुजारि तोई। दोई दु लरि छेबि आंऊ ल उई पुजारीरेच़ि लज़ि मरतिरे। दोई इच्च़े बलिदान शुबिम थल्ज़ि एनबि रैं केरि आंऊ दोई अत्तुला पाप माफ शुचे इबिमि तोई। दोई मनेक्ति कि परमेश्वरे दोतु बत्तेतु पापो थल्ज़ि दोबि सज़ा रमोतो। दिऊ थल्ज़ि, यीशु पिचि ठ्रो मोढ़े पुजारि तोई।

परमेश्वरे अब्राहमबि कुड़ि, “गै कनु दोरच़ि संसारो बत्ते कुलबि आशीष रमोगा।” यीशु दि ए अब्राहमो वशंज तोई। परमेश्वरे अब्राहमो धुन्ना बत्ते कुलबि आशीष रणीं, छेईकुचे आच़ि यीशु टोख्टे विश्वास लज़तोरे परमेश्वरे दोतिंङ बत्तेतिंङ पापांगज़ि बचाच़ि। अपेल दि मीच़ि यीशु टोख्टे विश्वास लज़ि, दांङ परमेश्वरे दोतिंग अब्राहमो वशंज चेच़ि।

परमेश्वरे अब्राहमबि कुड़ि कि दोई एनो यो, दोऊ थल्ज़ि बलिदान ले च़रतु। पर दाङ परमेश्वरे इसहाको ठाढ़िरिंग बलि रन्ड्रिमि थल्ज़ि इच़ा लच़ा रैईं। हेन्दरे बत्ते हेन्दु पापो थल्ज़ि साचे केचिम जोगे तोतोईं! पर परमेश्वरे हेन्दु ठाढ़िरिंग साचे केचिम थल्ज़ि यीशुबि बलिदानो रूपरिंङ रन्दु। दि वजहज़ि हेन्ज़ि यीशुबि परमेश्‍वरो लच़ा कुट्रि।

अपेल परमेश्वरे मिस्रांङ आखिरि खरे च़रति दांङ दोई इस्राइलो इच़िच टबरबि कुड़ि कि इच़ा छागडो बलि रांईं, दु छागड़बि छल्ले दोष शुबि मेस। दोऊ थल्ल एनतु पितांङु डेरिऊ टोख्टेच़ि ए देच़ि-नोच़ि दोऊ शुईबि लगाच़िम तोई। अपेल परमेश्वरे दु शुई ताङतु सेत दु दोतु घरबारबि केट्रा तूखा अच़ा इन्जा दांङ दोतु मुन्डो यो बि मसादि। अपेल दि शुचा दांङ परमेश्वरे दिबि फसहज़ु त्यौहार कुड़ि।

यीशु फसहउ त्योहारो इच़ा लाच़ो ठ्रो शु। दोई अपेला पाप लसि मतरे, दिऊ थल्ज़ि दोऊ अन्दरेग छल्ले गलत मतोई। दु फसह ज़ु त्यौहारो मोक्का सियते। अपेल अच़िया यीशु टोख्टे विश्वास लज़ि, धोपेल यीशु शुईज़ि दोतु पापतु कीमत चुकाच़ि। दि ध्यांह ठ्रो शु छना परमेश्वर दु मीऊ दोरच़ि तूखा डेके इबि, छेई कुचे दोई दोबि सज़ा रन्ड्रिमि मतु ।

परमेश्वरे इस्राएलि मीतांग साथे इच़ा वायदा लरि, छेईकुचे दोरे ध्यांह ठ्रो मीरे तोईरे आतिंग परमेश्वरे एनो थल्ज़ि चुनेक्ति। पर परमेश्वरे द ध्यांह ठ्रो वाचा छ़ुसि ततो आंऊ बत्तेतु थल्ज़ि शु। अगर आऊं ल जातिऊ आरला मीज़ि दिसांग नया वायदाबि मनेक्ति सेत, दु परमेश्वरो मीतु बिचांङ शामिल शुचे योतो। दोई ध्यांह दिऊ थल्ज़ि लेई छेईकुचे दोई यीशु टोख्टे विश्वास लज़ि।

मूसा इच़ा ध्यांह ठ्रो भविष्यवक्ता तोई आच़ि परमेश्वरो कुशी वचनो रुठेरांङ प्रचार लत्ते। पर यीशु बत्ते भविष्यवक्तातु बिचांग मोढ़े शु। दु परमेश्वर शु, दिऊ थल्ज़ि चीए दोई लत्ते दु परमेश्वरो कम्म ए वचन तोई। दिऊ थल्ज़ि पवित्र शास्त्रे यीशुबि परमेश्वरो वचन कुट्रा।

परमेश्वरे राजा दाउदरांङ प्रतिज्ञा लत्ते कि राजाऊ रूपरिंग दोऊ इच़ा वशंजे परमेश्वरो मीतु टोख्टे हमेशो थल्ज़ि राज लोतो। यीशु परमेश्वरो यो ए मसीह शु, दिऊ थल्ज़ि दु राजा दाउदो वंशज शु आच़ि हमेशा राज लज़ा।

दाउद इस्राइलो राजा तोई, पर यीशु बत्ते संसारो राजा शु! दु यच़ा आपोतो दांङ हमेशो थल्ज़ि न्याय ए शान्तिरांङ साथे एनो राज्यरिंङ राज लोतो।