47. फिलिप्पीङ पौलुसे सीलास

अपेल शाउले बत्ते रोमि राज्यरिंङ जोयते धोपेल दोई एनो रोमी मिन “पौलुस” मिन्नज़ि काम लेई च़ुके केरि। इच़ा ध्याड़ा, पौलुस ए दोऊ साथी सीलास फिलिप्पी नगरांङ यीशु पाटि रुठे उजाब सुनाच़ि इलिकु। दोकु नगरो धाक्तेच़ि इच़ा बेन्डिऊ आढ़ारिंङ इलिकु आंरतिग मीरे प्रार्थना लेईमी थल्ज़ि ठ्रोक्कन शुचि तोईरे। दोरतिग दोकु लुदिया मिनदांङ इच़ा मेच़मीरांङ दोरिकु आरि व्यापारि तोई। दोई परमेश्वराङ प्रेम लज़ि तोई आई दोबि मनेक्च़ि तोई।

परमेश्वरे लुदियाबि यीशु पाटि उजाबरिंग विश्वास लज़िमि थल्ज़ि जोगे लरि। पौलुसे सीलासे दोबिए दोऊ टाबरबी बपतिस्मा रैईंकु। दोई पौलुसे सिलासबि एनो चुंङ नच़िम थल्ज़ि कुड़ि, दोऊ थल्ज़ि दोरे दोर नाच़िरे।

पौलुस ए सीलास मीतांङ च़ाम्बे दु ठाढ़िरिंग दोआ लातेर आंरतिग यहूदि मीच़ि प्रार्थना लातेर। रोज़ अपेल दोरे दोरतिग इबि तोई दांङ इच़ा गुलाम मेच़मिकटु आंऊ दोऊ टोख्टे माजि आत्मा तोई दोई दोकुतु पीछा लज़ि तोई। दि माजि आत्माज़ु बलरिंङ दोई मीतु भविष्य कान्ड्रि तोई, दिऊ थल्ज़ि दु भविष्य कन्ड्राड़ो ठ्रो एनो मालिकतु थल्ज़ि ढ़बा कमाच़ि तोई।

दोतु इन्दर दु गुलाम मेच़मिकटुई हाउशेक्पि तोई, “दि गांङमिकु बत्ते बे मोढ़े परमेश्वरो सेवक शुकु। दिकुई केतिंग उद्धारो आम्म कान्ड्रि लेकि तोतोकु!” दोई रोज़ ध्यांह लज़ि तोई दोऊ थल्ज़ि पौलुस नराज़ शुचे इलि।

थल्ल मुकरिंङ, इच़ा ध्याड़ा अपेल दु मेच़मीकटुई हाऊशेक्पि च़ुक्ति, दांङ पौलुसे दोऊहाखा किरज़ा दोऊ अन्दरेगकि माजि आत्माबि कुड़ि, “यीशु मिन्नज़ि दिऊ अन्दरेगच़ि हुच़ा इला।” धोत्तरे दु माजि आत्मा दोऊ अन्दरेगच़ि हुच़ा इलि।

दु गुलाम मेच़मिकटुऊ मालिकतिंङ मास्स रोष आति। दोच़ि ङेंए केरिरे कि माजि आत्मा मे दु मेच़मीकटुई मीतिंङ भविष्य कान्ड्रि मारपोतो। दिऊ मतलब तोई कि मीच़ि दोऊ मालिकतिंङ ढबा मरमोरे छेई कुचे द दोई दोतु भविष्य कान्ड्रि मारपोतो कि दोतांङ साथे चिशोतो।

दिऊ थल्ज़ि दु गुलाम मेच़मीकटुऊ मालिकच़ि पौलुसे सीलासबि रोमो अफसरतु कचरिंग लेन्ज़ा शिलिरे। दोच़ि पौलुसे सीलासबि कुटेक्तिरे, दांङ दोतिंग जेलांग केचे केरिरे।

दोच़ि पौलुसे सीलासबि जेलो दु ठाढ़िरिंङ केरिरे आंरतिग मास्स सिपाहीरे तोईरे। देर तचे कि दोच़ि दोकुतु कोन्ज़ातिंग सिंङज़ु मोढ़े-मोढ़े पन्नदांङ तुंङे केतेर। पर पौलुस ए सीलासे हयांररिंग, परमेश्वरो गीत कुट्रि लेकि तोईकु।

खन्दा-मखन्दा, इच़ा भुलिणिं शुई! ठाणों बत्ते पितांङरे अलसा इलिरे, बत्ते कैदितु शांङणीरे अल्सा दचे इलिरे।

दांङ ठाणंदार चेके इलि। दोई खणीं कि ठाणों पितांङरे आल्सि तोई। दोई चेति कि बत्ते कैदिरे पोख्शे अच़ा इलिरे। दु बैऐ इलि कि दोतु पोख्शे इबे रोमो मोढ़े अफसरच़ि दोबि सचे केओर, दिऊ थल्ज़ि दु एनबि साचे केचिम थल्ज़ि तैयार शुई! पर पौलोस दोबि खंए हाउशेक्ति, “रुमज़ु! केनबि नुकसान थरोऊं। ङेंरे बत्ते देर ए तोतोईं।”

दु ठाणेंदारे डगेके पौलुस ए सिलासो कचरिंग अन्जे रुक्ति, “उद्धार लेप्च़िम थल्ज़ि चि लगा?” पौलोसे जवाब रणीं, “प्रभु यीशु टोख्टे विश्सास लोऊ, दांङ कां ए कनु टाबरो उद्धार शोतो।” दांङ दोई पौलुस ए सिलासबि एनो चुंङ शिन्जे दोकु लेकि दोरे शुलि। पौलुसे दोऊ चुंङकि बत्ते मीतिंङ यीशु पाटि रुठे उजाब सुनाकतो।

ठांढेदारे दोऊ बत्ते टाबरच़ि यीशु टोख्टे विश्वास लरिरे, दोऊ थल्ज़ि पौलुस ए सीलासे दोतिंग दिक्षा रणिंकु। दांङ ठांणेदारे पौलुस ए सिलासबि बगत रणीं, दांङ बत्ते राजि शुईरे।

ओईराग नगरो धार्मिक प्रधानच़ि पौलुसे सीलासबि जेलांगज़ि हुन्जे केरिरे दांङ फिलिप्पिंगज़ि आच़ा इबिरिंङ कुड़िरे। पौलुस ए सीलास लुदिया ए मिना उई साथी तांङ दोए नगरांङज़ि अच़ा इलिरे। यीशु पाटि रुठे उजाब लेज़ा लरि, दांङ कलीसिया बेसा लरि।

पौलुसे उई मसीही प्रधानरे उई ल मास्स नगरांङ इलिरे। दोच़ि मीतिंङ यीशु पाटि रुठे उजाब शदिरे। दोच़ि कलीसियातु विश्वासिरेतिंग राजि लज़िरिंग ए शिक्षा रन्ड्रिम थल्ज़ि तेईया डाक च़ेरिरे। दीतु बिचांगज़ि मिना ड़ाक बाइबलो किताब बनेके इलिरे।