46. पौलुस मसीहज़ु विश्वासि बनेकि य्वा

शाउल मिनदांग इच़ा मी तोई आच़ि यीशु टोख्टे विश्वास मलत्ते। अपेल दु बाढ़े उम्रो तोई, धोपेल दोई स्तिफनुसबि सच़ाड़ मीतु खमज़े रुन्ड्रते। थले दोई, विश्वासीरेतिंग तंग लत्ते। दोई यरुशलेमांग चुंङ-चुंङ इन्जे गांग्मि ए मेच़मी जुल्लाकुतिंग च़ुमे जेलांग केचे केते। दाङ मोड़े पुजारी शाउलबी दमिश्क नगरांङ इबि रन्दे। दोई दोरकि मसीहरेतिंग च़ुमे ए दोतिंग यच़ा यरुशेलमांग हापिमि थल्ज़ि शाऊलबि कुड़ि।

दाङ शाउले दमिश्को हाखा इबि च़ुक्ति। दु नगरांङ पिपिम थोड़ेआर तुई, दोऊ फेरे सर्गांगज़ि इच़ा याल्लन बिजली चमकेका, दाङ दु धरतिरिंग दचे इलि। शाउले आतिंङा कुच़ि रेड्रिरि, “हे शाउल! हे शाउल! केई गिबि छेरिंग तंग लातन?” शाउले रुक्ति, “हे प्रभु, क आरि शुना?” यीशुई दोबि जवाब रणीं, “गै यीशु शुगा। केई गिवि तंग लातन!”

अपेल शाउल खड़े शुई धोपेल दोई खन्ड्रि मरछ़ते। दोऊ साथिच़ि दोबि दमिश्क लेन्ज़ा इन्देर। शाउले शुम्मु ध्याड़ा तचे छल्ले ज़सि ए तुंङसि मतरे।

दमिश्कांग हनन्याह मिन्दाङ इच़ा चेला तोई। परमेश्वरे दोरांग कुड़ि, “दु घरबारांग इला आंरतिग शाउल रुमज़ा तो। केनो गुड़ दोऊ टोख्टे केऊ छेई कुचे दोई ओल्ला खान्ड्रि तरफोतो।” पर हनन्याहज़ि कुड़ि, “हे प्रभु, गै रेड्रतेग कि दि मीज़ि विश्वासीरेतिंग छना तंग लत्ते।” परमेश्वरे दोबि जवाब रैईं, “इला! गै दोबि यहूदि ए उई जातो मीतिंग ग्यु मिन्ज़ु घोषणा लेइमि थल्ज़ि चुनेक्ताग। दोई ग्यु मिन्दु थल्ज़ि मास्स बारदो खांपोतो।”

दोऊ थल्ल हनन्याह शाउलो कचरिंग इलि, एनो गुड़ दोऊ टोख्टे केरि, दाङ कुड़ि, “यीशुज़ि, अरि देर अन्दर आम्मरिंग कनु टोख्‍टे प्रकट शुत्ते, गिबि कनु कचरिंग च़रचतो छेई कुचे केई ओल्ला खान्ड्रि तरफोन, आई शुचे आत्माज़ि कनिंङ पिङे केओतो।” युरने शाउले ओल्ला खान्ड्रि तरथि, दाङ हनन्याहज़ि दोबि दीक्षा रणीं। शाउले बागत ज़रि दाङ दोबि ओल्ला बल अति।

दोऊ थल्ल बेच़ि, शाउले द्मिश्काङ बांगज़ाड़ यहूदितु बिचाङ प्रचार लज़ि च़ुक्सिरि। दोई कुड़ि, “यीशू ए परमश्वरो यो शु!” यहूदि मीरे हैरान तोईरे, छेई कुचे शाउले विश्वासितिंग सचे कचिमि तरे, पर द दोई यीशू टोख्टे विश्वास लत्ते। शाउले यहूदिरेतांग साथे सलाह लरि। दोई कन्डि कि यीशु ए मसीह तोई।

मास्स ध्याड़ो थल्ल, यहूदिरेच़ि शाउलबि सचे केचिम तरिरे। दोच़ि दोबि साचे केचिम थल्ज़ि नगराङ अपिमि पितांङरिंङ दोबि रुन्ड्रिरिंग मीरे च़रतिरे। पर शाउले दि थचे केरि, दोऊ साथिच़ि ब्याके पोख्फिरिंग दोबि साथि लेईरे। इच़ा रात दोच़ि दोबि किरतिऊ अन्दरेग केचे नगरो भितिऊ दोरच़ि दोबि योंखा ताख्शे केरिरे। दमिश्कांगज़ि हुच़ा थल्ल शाउले यीशु पाटि प्रचार लेई जारि तरि।

शाउल प्रेरिततांग दोईमि थल्ज़ि येरुशेलम इन्जा, पर दोरे दोरांङ बेच़ा तोईरे। धोपेल बरनबास मिन्दांङ इच़ा विश्वासी शाऊलबि प्रैरिततु कचरिंग लेन्ज़ा अन्जा। दोई दोतिंग कन्जतु कि छना शाउले हिम्मत ले दमिश्कांग प्रचार लत्तु। दोऊ थल्ल, प्रेरितच़ि शाउलबि अपनाके केरिरे।

मिना विश्वासीरे अरि यरुशेलमो सतावांगज़ि पोख्शे इन्देर दोरे च़लेकि अंताकिया नगरांङ अच़ा इन्देरे दांङ यीशु पाटि प्रचार लज़ि तोई। अंताकियांङ बांग्ज़ाड़ मास्स मीरे यहुदि मतोईरे, पर मुन्डा फेरा, दोतु बिचांगज़ि मास्स मीरे विश्वासि बणेके इलिरे। बरनवास ए शाउले दि नया विश्वासितिंङ यीशु पाटि उई ल मास्स सिखाच़िम थल्ज़ि दोर इलिरे दांङ कलीसियाबि पक्का लरिरे। यीशु टोख्टे विश्वास लज़ाड़रे मुन्ड़ा फेरा अंताकियांग ए “मसीही” कहलातिरे।

इच़ा ध्याड़ा, अंताकियाज़ु मसीही मीच़ि व्रतरांङ साथे प्रार्थना ल लज़ि लेकि तोइरे। शुच्चे आत्माज़ि दोतांग कुड़ि, “ग्यु थल्ज़ि बरनबास ए शाउलबी दु कम्म लेईमि थल्ज़ि शाता ले च़रतुईं चि लेईमि थल्ज़ि गै दोतिंग बुलासि तताग। “दिऊ थल्ज़ि अंताकिया ज़ु कलीसियाज़ि बरनबास ए शाऊलो थल्ज़ि प्रार्थना लरि दांङ एनो गुड़ दोतु टोख्टे केरि। दांङ दोच़ि दोकुतिंग उई मास्स ठाढ़िरिंग यीशु रुठे उजाबो प्रचार लेईरिंग च़रचे केरिरे। बरनबासे शाउले शता-शता जातिऊ मीतिंग शिक्षा रैंईकु, आई मास्स मीच़ि यीशुरिंग विश्वास लरिरे।