6. परमेश्वरे इसहाको थलज़ि प्रबन्ध लत्ते

आपेल अब्राहम मास्स यांग्शे इन्दे दोफेल दोउ यो, इसहाक ब्याहउ उम्रो शुचे इन्जि तोई। दोउ थलज़ि अब्राहमे एनो इच़ा सेवकबि यो इसहाको थलज़ि दु देशांगज़ि मेच़ा हापिरिंग च़रचतु आँर दोउ एनो रिश्तेदाररे बांग्ज़ा तोईरे।

आँर अब्राहमो नातारे बांगज़ा तोइरे दु देशांग इच़ा लामे यात्राओ थल्ल परमेश्वरे दु सेवकबि रिबकारांग साथे मिलाकतु। दु अब्राहमो काको पौत्री तोई।

रिबका एनो टाबरबि केचा दु सेवकरांग साथे इबिरिंग मनेक्सा इलि। छन्ने दोरे चुंग पिचतोर इसहाके रिबकारांग ब्याह ले केतु।

मास्स सालो थल, अब्राहम सिए इलि। दांग परमेश्वरे अब्राहमो यो इसहाक बी आशीष रन्दु, छेईकुचे परमेश्वरे अब्राहमरांग साथे वायदा लसि तरे। दु वाचारिंग परमेश्वरो इच़ा कसम तोई कि अब्राहमो मिक्च़मी मे (अनगिनत) वंशरे शोरे। पर इसहाको मेच़मी रिबकाबी इच़ा ला कटु मजेती।

इसहाके रिबकाज़ु थलज़ि प्रार्थना लरि, दांग परमेश्वरे दोबि जुड़वा कटु खोग्टांग शबिमि आशीष रन्दु। आँऊ घड़ी दु काटकु रिबकाज़ु खोग्टुंग तोइकु दोकु एनकतु बिचांग शड़ेक्सी लेकि तोइकु, दांग चि-चि शुबि लेकि तोई रिबकाज़ि परमेश्वरंग साथे रुकतु कि दि चि शुबि लेकि तो।

परमेश्वरे रिबकारांग कुड़ि, “केई जुट योकु जेपि लोन। दोकुतु वंशो जुट शाता-शाता जाति बनेक्पोतो। दोरे एनतु बिचांग शड़ेक्सोर। पर मोड़े योज़ु धुन्ना शुचि- जातिऊ दोतिंग कोचि योज़ु जातिऊ आज्ञा मनेक्च़ि लेपोतो।”

आपेल रिबका ज़ु काटुरे जेक्तिरे, दोउ मोढे यो शेई ए क्रा च़टे तोई, दोच़ि दोउ मिन एसाव केतोर। दांग कोचि यो एसाबो कोऩ्ज़ो थुरि च़ुमज़ा जेपे, दोच़ि दोऊ मिन याकूब केतोर।