7. परमेश्वरे याकूबबि आर्शिवाद रेईं

अपेल दु काटुरे मोढे शुईरे याकूबबी चुंग बांगज़ी रुठे आपि लेकि तोई, पर एसाबबी जानवरतु शिकार लज़ि रुठे आपि लेकि तोई। रिबकाज़ि याकूबरांग दा लरि, पर इसहाके एसावरांग दा तरि।

इच़ा दिन, एसाव शिकार लज़ा वापिस आति दु मास्स योंगि तोई। एसावे याकूबरंग कुड़ि, चि केई पकासि ततन दोरच़ि फो आर गिवि रोंउ। याकूबे जवाब रईं, हेगा केई गेरांग साथे दि प्रतिज्ञा लोउ कि मुन्डो यो शुचे थल आँउ चीज़ कनिंग खोक्सिरी, दु बत्ते केई गिवि रमोन। एसावे ला दु बत्ते चीज़रे याकूबबी रन्ड्रिमि प्रतिज्ञा ले केरी। दांग याकूबे दोबि बागत रेईं।

इसहाके एसाव बी आशीष रन्जिमि तरे। पर दिबे तुई दोइ जां लोतो, रिबकाए याकूबे एसाब रांग साथे धोखा लरिकु। दोकुई याकूबो तुईच़ि एसाब शुबिमि दिखावा लरिकु। इसहाक यांग्शी तोई आई खन्जि ल मारच़ि तोई। दोउ थलज़ि याकूबे एसाको खामज़े लेके बकरिउ खाल बि एनो मुथुए गूड़िंग लपेटेके केरि।

याकूबे इसहाको कचांग अन्जे कुड़ि, “गे एसाव शुगा। गिबि आशीष रऊँ।” अपेल इसहाके त्रेईंउ क्रा बि पच रेंई, दोऊ खामज़ेतु बास नुमरि, दोई चेति कि दु एसाव शु दांग दोई दोबि आशीष रेंईं।

एसाबबि याकूबरांग जलन शुई छेरिंगकुचे याकूबे दोऊ मुन्डा यो शुबिमि हक ए आई साथे दोऊ आशीषबी ल लेन्ज़ा शिलि। एसाबे एनो बा ज़ु सिए थल याकूबबी सच़िमि योजना बनाति।

पर रिबकाज़ि एसावो योजना थशे केरि। दांग दोई ए इसहाके याकूबबी दोऊ नातातांग बाग्ज़िमि थलज़ि ओइरिंग च़रच़रचतु।

याकूब मास्स साल तचि रिबकाज़ु नातातांग साथे बांग्ज़िरि। दु मौक्का दोई ब्याह ले सनिह यो इच़ा म्यों जेति। परमेश्वरे दोबि मस्स सोउखार बनाके केरि।

ङिंज़ा साल तचे कनानंग एनो घर-बार बे ओई बाग़ंज़ा, याकूब एनो टाबर, सेवकरे, एनो जानवरतु झुंड कुरच़ा वापिस याच़िरि।

याकूब मास्स बेई तोई छेईकुचे दोई चेसि तरे कि एसाबे आईतला दोबि सच़िमि हिटि ततु। दिऊ थल्ज़ि याकूबे उपहारो रुपरिंग जानवरतु झुण्ड एसावो कचरिंग च़रति। अऊँ सेवकरे दु झुण्ड तिंग लेन्ज़ा इन्देरे दोच़ि कुड़िरे, “कनु दास याकुबे, दि जानवररे कनिंग रन्दु। दु युरने आपतो।”

पर एसाबे द याकूबबी नुकसान रन्ड्रिममि मतरे। दु याकूबबि ओल्ला खाँए मास्स खुश शुई। दोऊ थल जुल्ला काका नुआंकु कनान देशांड़ शान्तिरांग बांग्ज़िकु। दांग इसहाक सिए इलि, याकूबे एसाबे दोबि मिलेके तेप्तिकु। वाचाज़ु प्रतिज्ञा अँउ परमेश्वरे अब्राहमरांग लत्त्ते दु द इसहाको दोरच़ि याकूबो टोक्ठे अच़ा आन्दे।