8. परमेश्वरे युसुफे दोऊ टावरतिंग बचाति

मास्स सालो थल, आपेल याकूब यागंशे इन्जि तोई, दोपेल दोई एनो मास्स शारसि यो युसुफबी दोऊ एनो काका, नुआतिंग खान्जि च़रच़तो। दोऊ काका नुआरेच़ि जानवरो झुण्डतु देखभाल लज़ि लेकि तोइरे।

युसुफो काका नुआरेच़ि दोरांग साथे जेगदंङ लज़ा तोइरे छेई कुचे युसुफबी दोउ बा ज़ी मास्स दा लज़ा तोई दांग युसुफे ला मांग्जुंग खयेंते कि दु दोतु राजा बनेक्पोतो। आँऊ घड़ी युसुफ एनो काका नुआरेतु कचांग अन्जा दोच़ि दोबि बन्धक ले दासतु व्यापार लज़ाड़रेतिंग लाङे च़रच़तोर।

चुंखा इबिमबेच़ि तुई युसुफो काका नुआरेच़ि दोऊ खामज़े फ्राक्शे छागड़ो शुईऊ अन्दरेग ठुमङे केतोर। दांग दोच़ि दु खामज़े एनतु बा बी कान्डिरे ताकि दोई चेपोतो कि युसुफ बी जंगलो जानवरेच़ि ज़े केतोर। याकूब मास्स उदास तोई।

दासतु व्यापार लज़ाड़च़ि यसुफबी मिस्र देशो आखा लेन्ज़ा शिलिरे। नील नदिऊ किनारे बसेकि मिस्र इच़ा मास्स मोढ़े ए शक्तिशाली देश तोई। दासतु ब्यापार लज़ाड़च़ि युसुफ बी इच़ा मोढ़े साहुकारबी दास बनाके लांङे केतोर। युसुफे एनो मालिको रुठेरांग सेवा लरि, दांग परमेश्वरे युसुफबी आशीष रेईं।

दोऊ मालिको मेच़े युसुफरांग साथे नजायज़ रिश्ता बनाट्रिम कोशिश लरि, पर युसुफे परमेश्वरो बनाशी रिवाज़ो खिलाफ काम लेईरिंग मना ले केरि। दु मेच़मिबि रोष आति, दोई युसुफो टोखटे हाफसि इलज़ाम लगाके केरि, दांग दोबि जेलांग च़रचे केरिरे। जेलांग इन्जे थल ला,युसुफे परमेश्वरो टोखटे बिश्वास तरि, दांग परमेश्वरे ला दोबि आशीष रेईं।

युसुफ सचे तोई, ताँ ला दु जुट सालो थल ला जेलांगे तोई,इच़ा रात्त फिरौन, छना कि मिस्रो मिच़ि एनतु राजातिंग कुचा तोईरे मिस्रो राजा तोई,फिरौने जुट मांञ खड़िं, आऊँ दि दोबि मास्स बैचेन ले केरि। दोऊ सलाहकारच़ि आच़िला दु मांङ ज़ु अर्थ शच़ि मारतिरे।

परमेश्वरे युसुफबी माङज़ु अर्थ कन्ड्रिमि समझ रांशि तरे, दोऊ थल्ज़ि फिरौने युसुफबी एनो कचांग बुलाति। युसुफे दोबि दोऊ मांङज़ु अर्थ शचतु दांग कुड़ि, “मिस्र देशांग परमेश्वरे मास्स फसलो ङिज सालो थल ङिज सालो थल्ज़ि अकाल च़रच़िम ततु।”

फिरौन युसुफरांग दुठ्रो खुश शुचे इलि कि दोई दोबि मिस्र देशो आइच़ा शक्तिशाली मी बनाके केतु।

युसुफे मीतिंग ङिज सालो रुठे फसलो बिचांग मस्स अन्न जमा लेइरिंग कुड़ि। आपेल ङिज सालो अकाल अन्जा, दोफेल युसुफे मीतिंग ज़ेईमि थल्जि दु अन्न लांञरि ताकि दोतु कचरिंग ज़ेईमि थल्ज़ि योशि शुबि जुस।

दु मास्स माजि अकाल मिस्रांग जेत्ते मतोई, कनान देशागं ला पड़ेकि तोई आँर याकूबे दोऊ टाबर बांग्ज़ा तोइरे।

याकूबे एनो मोढ़े योतिंग अन्न च़ुमज़िमि थल्ज़ि मिस्रांग च़रति। आपेल दु अन्न च़ुमज़िमि थल्जि युसुफो तुइच़ि खड़े शुईरे दोच़ि युसुफबी सेच़ि मारतिरे। पर युसुफे दोतिंग सेचे केरि।

दि पता लेइमि थल्ज़ि कि दुरे लेक्सा इन्दोरेया दु बत्तेधिर जाँच ले थल, युसुफे दोतांग कुड़ि, “गे केतु नुआ युसुफ शुगा! बेउंई थांईं। अपेल केच़ि गिवि दास बनाके लांङतेई दोपेल केच़ि माजि लेईमि ठानेकतेई, पर परमेश्वरे दु माजिऊ रुठे लेईमि थलज़ि उपयोग लरि! अतईं अन्जे मिस्रांग बांग्ज़ुईं दांग गे केतु ए केतु परिवारो थल्ज़ि बागतो इन्तज़ाम लोग्ग।”

आपेल युसुफो काका नुआँरे चुंखा याच़िरे दोच़ि एनतु बा याकूबबी शदिरे कि युसुफ आत ला शिंङि तो, दु दि रेड्रा मास्स खुश शुत्ते।

हालांकि याकूब इच़ा यांग्शी मी तोई ताँ ला दु एनो बत्ते टाबरतांग साथे मिस्र देशो आखा आच़ा इलि, दांग दोरे दोर बसेके इलिरे। याकूबे एना सी बे तुई बत्ते योरेतिंग आर्शिवाद रेईं।

वाचाज़ु दु वायदारे आऊँ परमेश्वरे अब्राहमरागं लसि तोई दु हेगा इसहाकबी, दोऊ थल याकूबबी, दागं दोऊ थल दोऊ सनि योरेतिंग ए दोतु टावरतिंग अच़ा आन्दे। दु सनि योरेतु वंशरे थले एस्राइलो सनि जात शुचे इलिरे।