9. परमेश्वरे मूसाबि हाग रेंई।

युसुफो सिए थल दोऊ बत्ते नातारे मिस्र देशांग बसेके इलिरे। दु ए दोऊ वशंजरे मास्स वर्ष तचि मिस्रांग ए बांगज़िरे दोच़ि दोर एनतु मास्स कतुरे हुन्दिरे। दोतिंग एस्राइली कुड़िरे।

रा चड़े वर्षो थल, इस्राइलिरे मिक्च़िरिंग मास्स शुचे इलिर। मिस्रो मीरे द दि गप्पो थलज़ि अभारी मतोईरे कि दोतु मदद लेईमि थल्ज़ि युसुफे मास्स लसि तरे। दोरे इस्राइलितांग बेए इन्देर छेई कुचे दोरे मक्च़िरिंग दोतु बेच़ि मास्स तोईरे। दोऊ थल्ज़ि दु मोक्का मिस्र देशांग राज लज़ाड़ फिरौने मिस्रो मीतु दास बनाके केति।

मिस्रो मीच़ि इस्राइलीतिंग मास्स मकाने आंयो शुदा नगररे बनाट्रिरिंग मजबूर लेइरे। दु मस्स मेहनत ए दोतु जीवनबी मास्स बारदो च़टे ले केरि, पर परमेश्वरे दोतिंग आशीष रेईं दोतु आई मास्स सन्तानरे शुईरे।

फिरौने खणि कि इस्राइलिरेतु मास्स काटुरे शुबि लेकि तोतोर, दांग दोई एनो मीतिंग इस्राइलो बत्ते गांगकटुतिंग नील नदिऊ अन्दरेग छ़ांङे सचे केट्रिम आदेश रेईं।

इच़ा खास इस्राइलो मेचमि इच़ा यो बी जन्म रेईं, दु ए दोऊ गाक्से आंयो तचे शुई दु कटुबी प्याके तरिरे।

आपेल दु काटुबी दोऊ या बा कुई दोबि उई मास्स प्याकच़ि मारतिकु, दांग दोकुई दोबि सीरिंगज़ि बचाच़िमि थलज़ि इच़ा लन्ज़ाड़ टोकरिंग नील नदिऊ किनारे शांङज़ु बिचांग प्याके केरिकु। दोऊ मोढ़े आछे दि खन्जिम थलज़ि निगरानि लरि कि दुरांग साथे चि शोतो।

फिरौनो म्यों ज़ि दु टोकरिउ आन्दरेग खढिं। आपेल दोई दु काटु बी खणी दोई दोबि एनो काटु ले केरि। दोई इच़ा इस्राइलो मेच़मिबि दोबि पानु रन्ड्रिमि थलज़ि कामरिंग त्य तरि। दोई दि मनेरि कि दु दोऊए या शु। अपेल दु काटु दोंण मोढ़े शुचे एलि कि दोबि एनो या ज़ु पानू ज़रुत मतोई दांग दोई दोबि फिरौनो म्योबी रैं केरि, दोई दोऊ मिन मूसा केरि।

इचा झा, आफेल मूसा मोढ़े शुचे इन्दे, दोई खणि कि इच़ा मिस्रो मीज़ी इस्राइलो मीबी तेंग्ज़ि लेकि तो। मूसाज़ी एनो इस्राईलि साथिबि बचाच़िमि कोशिश लरि।

आपेल मूसाज़ि सोचेक्सिरि कि दोबि आच़िला मखन्जतोर दोई दु मिस्रीबी साचे सिचे पतेके च़रति। पर मूसाज़ि चि लत्ते दु अच़िया तांङे केशी तरेर।

फिरौनबि पता लेके इन्दे कि मूसाज़ि चि लत्तु। दोई दोबि साच़िमि कोशिश लरि, पर मूसा मिस्रांगज़ी जंगलो आखा पोक्शे इलि। फिरौनो सैनिकच़ि दोबि दोर पेचि मारतिरे।

मूसाज़ि मिस्र देशबे मास्स ओईतारे इच़ा मिघान देशांग बांगज़ि च़ुक्ति, दांग दोई दोर इच़ा मेच़मि रांग ब्याह ले केरि दांग दोकुई जुट यो पैदा लरिकु।

मूसाज़ी एनो रू ज़ु त्रेईंतु थाचो देखभाल लज़ा तोई। इच़ा झा दोई इच़ा रोशि लेकि झाड़ी तागंरि दु ताब शुचे मे रोशि लेकि तोई। दोबि खान्जिमि थलज़ि दु झाड़िऊ कचांग इलि। अपेल दु दोऊ कचांग इलि दांग परमेश्वरे दोरांग गप्पा लरि। दोई कुड़ि, “हे मूसा, केनो बूटरे युप्शे केऊ। का इच़ा पवित्र ठाड़िरिंग खड़े तोतोन।”

परमेश्वरे कुड़ि, “गे ग्यू मीतु दुख तांङताग। गै कनिंग फिरौनो कचागं च़रपोग ताकि केई इस्राईलो मीतिंग मिस्रो गुलामिऊ दोरच़ि हुन्जे हापोन। गे दोतिंग कनान देश रमोग, दु देश आँऊ गे अब्राहम, इसहाके याकूबबी रन्ड्रिमी वायदा लत्तेग।”

मूसाज़ि रुक्ति, “अगर मीच़ी रुकपोर कि गिबि आच़ि च़रचतु दांग गे चि कुगा?” परमेश्वरे कुड़ि “दोतांग कुड़ु, “चि गे शुगा, दु गे शुगा। दोतांग कुड़ु, ‘गे शुगा ज़ि गिवि केतु कचांग च़रचतु। दोतांग दि ला कुड़ु कि, ‘गे केतु पूर्वजरे अब्राहम, इसहाके याकूबो परमेश्वर यहोवा शुगा।’ ग्यु दि मिन हमेशो थलज़ि शु।”

मूसा बैई तोई दाङ दोई फिरौनो कचांग इबिमि हिटि मतरे छेईकुचे दोई चेति कि दोई रुठेरांग कुट्रि मतरफोतो, दांग परमेश्वरे मूसाजू काका, हारूनबि दोऊ मदद लज़ि च़रति।