24. यूहन्ना यीशु ला बपतिस्मा देत हा

एलीशिबा अन् जकर्याह को पुत्र यूहन्ना, मोठा होयकेन्या एक भविष्यद्वक्ता बन गयो। वो जंगल मा रहत होतो अन् जंगली शहद अन् टिड्डियाँ खात होतो, अन् उंट का रोम लक बन्या कपडा घालत होतो.

लगीत सा लोक यूहन्ना की गोष्ट आयकबला जंगल मा निकर आया. योन यो बोलकर उनला प्रचार करीस, “पश्चाताप करो, कारण स्वर्ग को राज्य निकट हा!”

जब लोकमान न यूहन्ना को संदेश ला आयकीस, त वानकुतलक लगीतो न आपलो पापो को पश्चाताप करीस अन् यूहन्ना न उनला बपतिस्मा देईस. यूहन्ना ला देखबला लगीत सा धार्मिक अगुवा पण आया, पण उन्होन आपलो पापो को पश्चाताप या अंगीकार नई करीस.

यूहन्ना न धार्मिक अगुवोला बलीस, “हे जहरीला सपो, पश्चाताप करो अन् आपलो व्यवहार ला बदलो. परमेश्वर हर एक ओन झाड ला काट टाकन, जो चांगलो फल नई आनत अन् ओ उनला आग मा झोक टाकन!” जो भविष्यवक्ता न बलीस होती, यूहन्ना न ओला पुरो करीस. “देख, शीघ्र ही मी तोरो सामन्या आपलो संदेशवाहक ला पठाऊन, जो तोरो साठी मार्ग ला तयार करन.”

काई धार्मिक अगुवो न यूहन्ना ला विचारिस की काय वो मसीह हा? यूहन्ना न उत्तर देईस, “मी मसीह नई हून, पण वो मोरो बाद आवनार हा, ओ एवढो महान हाकी, मी ओको जुता को फिते खोलबको पण योग्य नई हाऊन.”

अगलो दिस, यीशु बपतिस्मा लेबसाठी यूहन्ना को जवळ आयो. जब यूहन्ना न ओला देखीस, त ओन बलीस, “देखो! परमेश्वर को मेमना जो संसार को पापो ला उचालकेन्या लेय जान.”

यूहन्ना न यीशु ला बलीस, “मी तोला बपतिस्मा देबोको योग्य नई हाऊन. बजाय यको आवश्यक हा की तू मला बपतिस्मा दे।" पण यीशु न बलीस, “तोला मला बापतिस्मा देबलो पायजे, कारण करबसाठी सही काम योच हा. आखिर यूहन्ना न ओला बपतिस्मा देईस, जब कि यीशु न कबच पाप नई करीस होती.

बपतिस्मा देबोको बाद जब यीशु पानी लक निकरकेन्या भायर आयो, त परमेश्वर को आत्मा कबुतर को रूप मा प्रकट भयो अन् खाल्या उतरकेन्या ओको बऱ्या थांब गयो. वोच वेळेस, परमेश्वर न स्वर्ग संग गोष्ट करीस. ओन बलीस, “तू मोरो पुत्र होस, मी तोला प्रेम करतून अन् मी तोरो पासलक लगीत प्रसन्न हाऊन."

परमेश्वर न यूहन्ना ला बलीस, “पवित्र आत्मा खाल्या उतरकेन्या कोणीबऱ्या थांबन, जेला तू बपतिस्मा देस.” वोच परमेश्वर को पुत्र हा, परमेश्वर एक ही हा. पण जब यूहन्ना न यीशु ला बपतिस्मा देईस, त ओन परमेश्वर पिता ला गोष्ट करतो आयकीस, पुत्र परमेश्वर को देखीस, जो की यीशु हा अन् ओन पवित्र आत्मा ला देखीस.