23. यीशु को जन्म

युसुफ नाव को एक धर्मी माणूस को संग मरियम की सगाई भय गयती. जब ओन आयकीस की मरियम गर्भवती हा, त ओला माहित होतो की वो ओको पोऱ्या नई हा. तरीपण ओ मरियम ला बदनाम करनू नई चाहत होतो, योकोसाठी ओन ओको बऱ्या कृपा करबकी अन् ओला चुपचाप तलाक देबसाठी विचार करीस. पण योको पहिले की ओ असे करन, एक स्वर्गदूत न ओकी स्वप्न मा आयकेन ओको संग गोष्ट करीस.

ओ स्वर्गदूत न बलीस, “हे युसुफ मरियम ला आपली बायको को रूप मा लेयकेन आनबसाठी डरु नको. ओको अंदर जो पोऱ्या हा वो पवित्र आत्मा कुद्याल हा. वा एक पोऱ्याला जन्म देन. ओको नाव येशु ठेवस (जेको अर्थ हा, “यहोवा बचावते”), कारण वो लोकमानला उनको पाप लक बचावन.”

आखिर युसुफ न मरियम संग लगन करीस अन् ओला आपली बायको को रूप मा घर लेयकेन आयो. पण ओको पोऱ्या को जन्म देत पर्यंत ओ ओको संग नई सुते.

जव मरियम को जन्म देबोको वेळ जवळ आयो होतो, त ओन अन् युसुफ न बैतलहम जाबसाठी एक लंबी यात्रा करीस. ओला वामा जाबोकोच होतो, कारण रोमी अधिकारी इस्राएल मा रहने वाला सर्वा लोकमान की गिनती करनू चाहत होता. वय चाहत होता कि सर्वा लोकमान वामा जाये जामा उनका पूर्वज रहत होता. राजा दाऊद को जन्म बैतलहम मा भयो होतो अन् ओ मरियम अन् युसुफ दुयका पूर्वज होता.

मरियम अन् यूसुफ बैतलहम गया, पण वामा जनावर ला ठेवने वालो जागा को अलावा उनको थांबसाठी कोणतीच जागा नई होती. वाच जागा होती जामा मरियम न आपलो पोऱ्या ला जन्म देईस. ओन ओला चरणी मा सोवाईस कारण वामा ओकोसाठी कोनतोच बिस्तर नई होतो. उन्होन ओको नाव येशु ठेईस.

ओच रात्र वामा जवळकोच खेत मा काही चरवाहा आपलो भेड को झुंड की रखवाली करत होता. अचानकच एक चमकदार स्वर्गदूत उनको बऱ्या प्रकट भयो अन् वय डर गया. वो स्वर्गदूत न बलीस, “डरो नको, कारण मोरो पास तुम्हरो साठी शुभ संदेश हा, बैतलहम मा मसीह, स्वामी को जन्म भयो हा!"

जायकेन वो पोऱ्या ला ढूंडो अन् तुमी ओला कपडा मा लिपटे हुये अन् चरणी मा सुते हुये दिसन.” अचानकच आकाश स्वर्गदूत लक भर गयो. वय परमेश्वर की स्तुती करत होता. उन्होन बलीस, “सर्वी महिमा स्वर्ग मा विराजमान परमेश्वर ला भेटन. पृथ्वी बरत्या वय लोकमानला शांती हो, ज्योकी वो चिंता करत हा.”

तब स्वर्गदूत चली गया. वय चरवाहा पण आपली भेड ला सोडकेन पोऱ्या ला देखबला गया. लवकरच वय वा जागा बऱ्या पहुच्या जामा येशु होतो अन् उन्होन ओला चरणी मा सुते हुवो देखीस, जसे की स्वर्गदूत न बलीस होतीस. वय लगीत उत्साहित होता. तब वय चरवाहा वापिस चली गया जामा उनकी भेड होती. उन्होन जो काही आयकीस अन् देखीस ओ सर्वो साठी परमेश्वर की स्तुती करत होता.

पूर्व मा दूर एक देश मा काही माणूस होता. उन्होन सितारो को अध्ययन करीस होतीस अन् वय लगीत बुद्धिमान होता. उन्होन एक असामान्य सितारो ला आकाश मा देखीस. उन्होन बलीस की योको अर्थ हा की याहुदियो को एक नवीन राजा को जन्म भयो. योकोसाठी उन्होन ओ पोऱ्या ला देखबसाठी आपलो देशलक यात्रा करबको निर्णय लेईस. एक लंबी यात्रा को बादमा वय बैतलहम आया अन् वो घर ला देखीस, जामा येशु अन् ओका मा-बाप रुक्या होता.

जब वय माणुसामान येशु ला आपली माय को संग देखीस त उन्होन घुटना टेककेन ओकी आराधना करीस. उन्होन येशु ला किमती उपहार देईस. मंग वय घर वापस चली गया.