22. यूहन्ना का जन्म

अतीत मा, परमेश्वर न आपलो भविष्यद्वक्ताओं संग गोष्ट करीस होती. यकोसाठी वय लोकमानसंग गोष्ट कर सकत होता, पण ओन वेळ लक लेयकेन्या अजून 400 साल को बितनो पर्यंत ओन उनको संग गोष्ट नई करीस. तब परमेश्वर न जकर्याह नाव को भविष्यद्वक्ता को जवळ एक स्वर्गदुतला पठाईस. जकर्याह अन् ओकीबायको एलीशिबा परमेश्वर को आदर करतजब होता. वय लगीत बुढा भया होता अन् उनला कोणतीच संतान उत्पन्न नई होती.

वो स्वर्गदूत न जकर्याह ला बलीस, “तोरी बायको ला एक पुत्र उत्पन्न होन, तू ओको नाव युहन्ना ठेवस. परमेश्वर ओला पवित्र आत्मा न परिपूर्ण करन अन् युहन्ना लोकमानला मसीह ला ग्रहण करबसाठी तयार करन.” जकर्याह न उत्तर देईस, “मी अन् मोरी बायको संतान उत्पन्न करबसाठी लगीत बुढा हान! मी कसो समझू की तुमी मोरो संग खरं बोलण्यावं?

वो स्वर्गदूत न जकर्याह ला उत्तर देईस, “तोरो पास योन शुभ संदेश ला लेय आबसाठी मी परमेश्वर पासलक पठायो गयो हून. कारण तून मोरो बऱ्या विश्वास नई करेस, यकोसाठी पोऱ्या को जन्म लेब लक तू बोलब साठी सक्षम नई होस.” तुरंच जकर्याह बोलबसाठी असमर्थ होतो, तब वो स्वर्गदूत जकर्याह पासलक चलो गयो. यको बाद जकर्याह घर लौटकेन्या आयो अन् ओकी बायको गर्भवती भई.

जब एलीशिबा छः महीना की गर्भवती होती, त वोच स्वर्गदूत अचानक लक एलीशिबा को रिश्तेदार बऱ्या प्रकट भयो, जेको नाव मरियम होतो. मरियम कुवारी होती अन् विवाह होबसाठी युसुफ नाव को एक पुरुष को संग ओकी मंगनी भयी होती. स्वर्गदूत न बलीस, “तू गर्भवती होस अन् एक पुत्रला जन्म देस. तोला ओको नाव यीशु ठेबको हा, वो सर्वशक्तिमान परमेश्वर को पुत्र होन अन् सदा साठी शासन करन.

मरियम न उत्तर देईस, “यो कश्यो होन, कारण मी त कुआरी हाऊन?” ओन स्वर्गदूत न समझाईस, “ पवित्र आत्मा तोरो बऱ्या आवन, अन् परमेश्वर कि सामर्थ तोरो बऱ्या छाया करन. यकोसाठी वो शिशु पवित्र होन अन् वो परमेश्वर को पुत्र होन.” जो ओन स्वर्गदूत न बलीस ओको बऱ्या मरियम न विश्वास करीस.

यो होबोको तुरंत बाद, मरियम न जायकेन्या एलीशिबा संग भेट करीस, जसो हि मरियम न ओला नमस्कार करीस, एलीशिबा को शिशु ओको अंदर उछ्ले. उनको साठी परमेश्वर न जो करीस होती, ओको बाऱ्या मा वय बाईमान एक साथ आनंदित भयी. एलीशिबा को संग तीन महिना रयबोको बाद, मरियम घर लौट आयी.

यकोबाद एलीशिबा न आपलो पोऱ्या ला जन्म देईस. जकर्याह अन् एलीशिबा न वो पोऱ्या को नाव यूहन्ना ठेईस. जसे की ओन स्वर्गदूत न आदेश देईस होती. तब परमेश्वर न जकर्याह ला बोलबला सक्षम करीस. जकर्याह न बलीस, "परमेश्वर की स्तुति हो, कारण ओन आपलो लोकमान की सहायता करबसाठी स्मरण ठेईस. हे मोरो पुत्र तू सर्वो शक्तिमान परमेश्वर को भविष्यद्वक्ता होस. तू लोकमानला सांगस की वय कसे आपलो पाप साठी क्षमा प्राप्त कर सकन.