21. परमेश्वर मसीह की प्रतिज्ञा करत हा

जब परमेश्वर न संसार की सृष्टि करीस होती, ओला मालूम होतो कि, ओला बादमा कोणी दिन मसीहा ला पठाब लागन. ओन आदम अन् हवा संग प्रतिज्ञा करीस होती कि वो अश्यो करन. ओन बलीस कि हवा लक एक वंशज जन्म लेन जो साप को सिर ला कुचलन. जेन साप न हवा ला धोका देईस, ओ निसंदेह शैतान होतो. परमेश्वर को अर्थ होतो की मसीहा पुरो तरहन शैतान ला पराजित कर देन.

परमेश्वर न अब्राहम संग प्रतिज्ञा करीस होती कि, ओको यकोन संसार का सर्वा जातीय आशिष पायेगी. परमेश्वर बाद मा काई वेळ ला मसीहा ला पठाबोको यकोन या प्रतिज्ञा ला पुरो करन. ओ मसीहा संसार का हर एक जाती लक लोकमानला उनका पापलक सोडवन.

परमेश्वर न मूसा संग प्रतिज्ञा करीस होती कि, भविष्य मा वो मूसा को सरिखो एक अन्य भविष्यवक्ता ला पठावन. यो भविष्यवक्ता मसीहा रहन. योन रित न परमेश्वर न अजून प्रतिज्ञा करीस की, वो मसीहा ला पठावन.

परमेश्वर न राजा दाऊद संग प्रतिज्ञा करीस होती की, ओको एक वंशज मसीह होन. ओ राजा होन अन् परमेश्वर का लोकमान बऱ्या सदा को साठी शासन करन.

परमेश्वर न यिर्मयाह भविष्यद्वक्ता संग गोष्ट करीस अन् बलीस की, एक दिवस ओ एक नवीन वाचा बांधन. वा नवीन वाचा इस्राएल को सीने बऱ्या बांधिस पुरानी वाचा सारखी नही रहन. जब लोकमान संग ओ आपली नवीन वाचा ला बांध, त ओ उनको बऱ्या स्वताह ला व्यक्तिगत रूप न प्रगट करन. हर एक जन ओको संग प्रीती ठेवन. परमेश्वर न बलीस कि या ओकी व्यवस्था को उनको दिल बऱ्या लिख देबोको जसे होन. वय उनका लोकमान होवन अन् परमेश्वर उनको पापला क्षमा करन. वो मसीह होन जो ओको संग उनकी नवीन वाचा ला बांधन.

परमेश्वर को भविष्यद्वक्ताओं न यो भी बलीस कि, मसीह एक भविष्यद्वक्ता होन. एक भविष्यद्वक्ता वह व्यक्ति हा जो परमेश्वर को वचनला आयकते अन् मंग अजून लोकमान बऱ्या परमेश्वर को संदेश कि घोषणा करत हा. जेला पठाबकी परमेश्वर न प्रतिज्ञा करीस होती. वो मसीहा एक सिद्ध भविष्यवक्ता होन. योको मतलब वो मसीह परमेश्वर का संदेश ला चांगलो तरहन आयकन अन् ओ लोकमानला वय संदेशला चांगलो तरहन सिखावन.

इस्राएली याजकों न लोकमानसाठी परमेश्वर को सामन्या बलिदान चढवनो चालू ठेईस. यो बलिदान लोकमानला पापो साठी उनला परमेश्वर पासलक दंडीत करबोको ठिकाण बऱ्या चढाईस होतो. याजको न लोकमानसाठी प्रार्थना पण करीस, पण वो मसीह सिद्ध महायाजक होन, जो परमेश्वर को देबसाठी एक सिद्ध बली को रूप मा स्वयं ला चढाय देन. योको मतलब वो कबच पाप नही करन अन् जब वो खुद ला बली होबसाठी देन, त संसार का कोणतोच अन्य बली आवश्यक नई होन.

लोकमान को समूहबऱ्या राजा अन् प्रधान शासन करत होतो अन् कब-कब वय गलतिया करत होतो, राजा दाऊद न फक्त इस्राएली बऱ्या शासन करीस. पण राजा दाऊद को वंशज मसीह, पुरो संसार बऱ्या शासन करन अन् वो सदा को साठी शासन करन. योको अलावा, वो हमेशा न्याय पूर्ण रितीन शासन करन अन् सई निर्णयला लेन.

परमेश्वर को भविष्यद्वक्ताओं न मसीह को बारा मा लगीत सारी गोष्टीला बलीस. उदाहरण को साठी, मलाकी न बलीस की, मसीह को आबो को पहिले एक अन्य भविष्यवक्ता आवन, वो भविष्यवक्ता लगीत महत्वपूर्ण होन. योको अलावा, यशायाह भविष्यवक्ता न लीखीस की, मसीह एक कुवारी लक जन्म लेन. अन् मिका भविष्यवक्ता न बलीस की मसीह बैतलहम नगर लक जन्म लेन.

यशायाह भविष्यद्वक्ता न बलीस की, मसीह गलील की कषेतर मा वास करन. जो लोक लगीत दुखी हा, मसीहा उनला शांती देन, वो कैदीयो ला पण स्वतंत्र करन. मसीह बिमार ला अन् जो आयकब नई सकत, बोल नई सकत, या चल नई सकत उनला पण चंगा करन.

यशायाह भविष्यद्वक्ता न यो पण बलीस की, लोक मसीह संग नफरत करन अन् ओला स्वीकार करबसाठी मना कर देन. अन्य भविष्यवक्ताओ न बलीस की, मसीह को एक साथी ओको विरुद्ध उठन. जकर्याह भविष्यद्वक्ता न बलीस की, ओको यो साथी अश्यो करबसाठी दुसरा लोकमानला चांदीका तीस सिक्का लेन. योको अलावा काई भविष्यवक्ता न बलीस की, लोक मसीह ला मार टाकन अन् यो की वय ओको वस्त्र साठी जुआ खेलन.

भविष्यद्वक्ताओं न यो पण सांगीस कि मसीह कश्यो मरन. यशायाह न भविष्यद्वाणी करीस की, लोक मसीह बऱ्या थुकन, ओको मजाक उडावन. अन् ओला पिटन. वय ओला छेद देन अन् वो मोठी पीडा अन् यातना मा मर जान, जबकी ओन काई पण गलत नई करीस होती.

भविष्यद्वक्ताओं न यो पण सांगीस, की मसीह पाप नई करन. वो सिद्ध रहन. पण वो यकोसाठी मरन, परमेश्वर ओला अन्य लोकमान को पापो को कारण दंडीत करन. ओको मरबलक लोक परमेश्वर को संग मेल करबला सक्षम होन. यकोसाठी परमेश्वर चाहत होतो की मसीह मरे.

भविष्यद्वक्ताओं न यो पण सांगीस की, परमेश्वर मसीह ला मऱ्या हुवो मातलक जीवित करन. यो दर्शातो हा की, या सर्व नई वाचा ला बांधबकी परमेश्वर कि योजना होती, ताकी वय ओनो लोकमानला बचाय सकन, जिन्होन ओको विरुद्ध पाप करीस हा.

परमेश्वर न भविष्यद्वक्ताओं बऱ्या मसीह को बाऱ्या मा लगीत सी गोष्ट ला प्रकट करीस, पण मसीह ओ भविष्यवक्ताओ मातलक कोणी को पण जीवन काल मा नही आयो होतो. येन भविष्यवाणीयो ला देब जाबोको 400 से अधिक साल को बाद, सही वेळ बऱ्या, परमेश्वर मसीह ला येन संसार मा पठावन.