27. दयालु सामरी की कहानी

एक दिवस, यहूदी व्यवस्था को एक विशेषज्ञ यीशु को जवळ आयो. वो सर्वो ला यो देखावनो चाहत होतो की यीशु गलत रित शिक्षा देत होतो. यकोसाठी ओन बलीस, “हे गुरु अनंत जीवन पाबसाठी मी काय करू?” यीशु न उत्तर देईस, “परमेश्वर की व्यवस्था मा काय लिखीस हा?”

ओन व्यक्ती न बलीस, “वा बलते की, आपलो परमेश्वर संग आपलो सर्वो मन, प्राण, सामर्थ अन् बुद्धी न प्रेम ठेव अन् आपलो पडोसी संग आपलो समान प्रेम ठेव. यीशु न उत्तर देईस, “तू एकदम बरोबर हास, जर तू अश्यो करस, त तोला अनंत जीवन प्राप्त होन.”

पण वो व्यवस्था को विशेषज्ञ लोकमानला देखावतो चाहत होतो की, ओको जीवन जीने को तरीका बरोबर होतो, यकोसाठी ओन यीशु ला विचारिस, “ठीक हा, त मोरो पडोसी कौन हा?”

यीशु न वो व्यवस्था को विशेषज्ञ ला एक कहानी सांगबोको यकोन उत्तर देईस. “एक यहुदी व्यक्ती होतो, जो एक सडकलक होयकेन्या यरूशलेम लक यरीहो की यात्रा करत होतो.

"पण काई डाकूओ न ओला देखीस अन् ओको बऱ्या हमला कर टाकिस. उन्होन ओको सर्वो काई लेय लेईस अन् ओला लगभग मरब पर्यंत मारीस-पीटीस तब वय चली गया.”

"ओको तुरन्त बाद, एक यहूदी याजक ओनो सडकलक होयकेन्या गयो. ओन याजक न वो व्यक्ती ला सडक बऱ्या पडे हुये देखीस. जब ओन ओला देखीस त वो सडक की दुसरो कजता जायकेन्या सामन्या बढ गयो. ओन वो व्यक्तीला पुरो तरहन अनदेखा कर देईस.”

"यको बाद काई वेळ बीतबोको बाद, एक लेवी वो सडक बऱ्या आयो, (लेवी यहुदीयो को एक गोत्र होतो, जिन्होन मंदिर मा याजको की सहायता करीस होती) वो लेवी पण सडक को दुसरो कुदयालक निकर गयो, ओन पण वो व्यक्तीला अनदेखा कर देईस.”

"अगलो जन जो वा सडक बऱ्या आयो वो सामरीया को एक पुरुष होतो (सामरी अन् यहुदी एक दुसरा संग नफरत करत होता). वो सामरी न सडक बऱ्या वो व्यक्तीला देखीस. ओन देखीस की वो यहुदी होतो, अजून पण ओन ओको बऱ्या मोठो तरस खाईस. आखिर वो ओको जवळ गयो अन् ओको पाय बऱ्या पट्टी बांधिस.”

"मंग वो सामरी न ओन व्यक्तीला आपलो गधा बऱ्या टाकिस अन् ओला वो सडक लक एक सराय मा लेय गयो. जमा ओन ओकी देखभाल करबोको चालू ठेईस.”

अगलो दिवस, वो सामरी ला आपली यात्रा ला चालू ठेबकी आवश्यकता होती. ओन वो सराय का प्रभारी व्यक्तीला काई धन देईस. ओन उनला बलीस, “येन व्यक्ती की देखभाल करस. जर येन धन को अलावा तोरो काई अजून धन खर्च होन त वापस आयो बऱ्या मी तोरो खर्च को भुगतान कर देऊन.”

अजून यीशु न वो व्यवस्था को विशेषज्ञ ला विचारिस, “तू काय विचार करण्यास? येन तीन लोकमानलक कोन वो व्यक्ती को पडोसी हा, जेला लुटीस अन् पीटीस गयो होतो?” ओन उत्तर देईस, “वोच जो ओको बऱ्या कृपालु होतो.” यीशु न ओला बलीस, “तू जा अन् अश्योच कर.”